អ៊ីរ៉ង់កោះហៅអ្នកការទូតរុស្ស៊ី ជុំវិញសេចក្តីថ្លែងការណ៍ស្តីពីប្រជុំកោះជម្លោះនៅឈូងសមុទ្រពែក្ស
តេហេរ៉ង់៖ទីភ្នាក់ងារសារព័ត៌មានរដ្ឋអ៊ីរ៉ង់ IRNA បានរាយការណ៍កាលពីថ្ងៃអាទិត្យទី២៤ ខែធ្នូ ឆ្នាំ២០២៣ថា អ៊ីរ៉ង់បានកោះហៅបេសកជនការទូតរុស្ស៊ី បន្ទាប់ពីទីក្រុងមូស្គូ និងបណ្តាប្រទេសអារ៉ាប់បានចេញសេចក្តីថ្លែងការណ៍រួមមួយកាលពីដើមសប្តាហ៍នេះ ប្រឆាំងនឹងការទាមទាររបស់អ៊ីរ៉ង់លើកោះជម្លោះនៅឈូងសមុទ្រពែក្ស។ នេះបើតាមការរាយការណ៍បន្តរបស់ទីភ្នាក់ងារសារព័ត៌មាន AP។
IRNA ផ្សាយថា រដ្ឋាភិបាលអ៊ីរ៉ង់បានកោះហៅបេសកជនរុស្ស៊ីកាលពីថ្ងៃសៅរ៍ ហើយបានប្រគល់លិខិតមួយជូនទៅកាន់រដ្ឋាភិបាលរុស្ស៊ី ដើម្បីប្រឆាំងតវ៉ានឹងសេចក្តីថ្លែងការណ៍ចេញពីវេទិកាសហប្រតិបត្តិការអារ៉ាប់-រុស្ស៊ីលើកទី៦ ដែលអំពាវនាវឱ្យមានដំណោះស្រាយដោយសន្តិវិធី ដើម្បីដោះស្រាយវិបត្តិរវាងអ៊ីរ៉ង់ និងអេមីរ៉ាត់អារ៉ាប់រួមលើកោះជម្លោះ។
ដាច់ដោយឡែកពីការកោះហៅនេះកាលពីព្រឹកថ្ងៃសៅរ៍ រដ្ឋមន្ត្រីការបរទេសអ៊ីរ៉ង់លោក Hossein Amirabdollahian បានប្រាប់សមភាគីរុស្ស៊ីតាមទូរសព្ទថា «ការគោរពអធិបតេយ្យភាព និងបូរណភាពរបស់ប្រទេស គឺជាគោលការណ៍ជាមូលដ្ឋានក្នុងទំនាក់ទំនងរវាងប្រជាជាតិទាំងពីរ។
គេមើលឃើញថា នេះជាលើកទី២ហើយនៅឆ្នាំ ២០២៣ ដែលអ៊ីរ៉ង់បានកោះហៅប្រេសិតរុស្ស៊ី ដើម្បីប្រឆាំងតវ៉ាជុំវិញការអត្ថាធិប្បាយលើកោះជម្លោះ។ ទីក្រុងតេហេរ៉ង់ បានកោះហៅឯកអគ្គរដ្ឋទូតរុស្ស៊ីកាលពីខែកក្កដា ជុំវិញការចេញសេចក្តីថ្លែងការណ៍ស្រដៀងគ្នានេះ។
ជម្លោះការទូត គឺជារឿងដ៏កម្រមួយ រវាងរុស្ស៊ី និងអ៊ីរ៉ង់ ដោយសារតែប្រទេសដែលរងទណ្ឌកម្មលោកខាងលិចទាំង២មានទំនាក់ទំនងយ៉ាងស៊ីជម្រៅ ជាពិសេសរាប់តាំងពីរុស្ស៊ីចូលឈ្លានពានអ៊ុយក្រែន។ អ៊ីរ៉ង់បានផ្គត់ផ្គង់ដ្រូនដល់ប្រទេសរុស្ស៊ី ដើម្បីយកទៅប្រើបប្រាស់ក្នុងសង្រ្គាម។ប្រទេសទាំងពីរ ក៏ជាអ្នកគាំទ្រដ៏សំខាន់សម្រាប់ប្រធានាធិបតីស៊ីរី លោក Bashar Assad ក្នុងសង្គ្រាមស៊ីវិលរបស់ប្រទេសនេះផងដែរ។
ពាក់ព័ន្ធនឹងកោះជម្លោះនៅឈូងសមុទ្រពែក្ស រុស្ស៊ីមិនមែនជាប្រទេសជាមិត្តតែមួយដែលអ៊ីរ៉ង់កោះហៅប្រេសិតនោះទេ។នៅឆ្នាំ ២០២២ អ៊ីរ៉ង់បានកោះហៅបេសកជនការទូតរបស់ចិន ជុំវិញការចេញសេចក្តីថ្លែងការណ៍រួមស្រដៀងគ្នាជាមួយប្រទេសអារ៉ាប់។
អ៊ីរ៉ង់បានកាន់កាប់កោះជម្លោះ ៣ រួមមានកោះ Abu Musa កោះ Greater Tunb និងកោះ Lesser Tunb បន្ទាប់ពីកងកម្លាំងអង់គ្លេសបានដកខ្លួននៅឆ្នាំ ១៩៧១។ អ៊ីរ៉ង់បានចាត់ទុកកោះទាំងនេះថាជាផ្នែកមួយនៃទឹកដីរបស់ខ្លួន «ដែលមិនអាចបំបែកចេញបាន» ដោយវាជាទឹកដីនៃរដ្ឋពែក្សតាំងពីសម័យបុរាណរហូតដល់អង់គ្លេសចាប់ផ្ដើមកាន់កាប់នៅដើមសតវត្សទី ២០។ប៉ុន្តែអេមីរ៉ាតអារ៉ាប់រួម ក៏ទាមទារកោះទាំង៣នេះផងដែរ ហើយបានទាមទារជាយូរមកហើយឱ្យមានការចរចារកដំណោះស្រាយ។
គួរបញ្ជាក់ថា កោះទាំងបីគ្របដណ្តប់លើផ្លូវទៅកាន់ច្រកសមុទ្រយុទ្ធសាស្ត្រ Hormuz ដែលជាផ្លូវទឹកដ៏សំខាន់ ដោយ ១ភាគ៥ នៃប្រេងផ្គត់ផ្គង់ពិភពលោក ត្រូវបានគេដឹកឆ្លងកាត់ផ្លូវមួយនេះ៕
ប្រែសម្រួល៖ហួន ឌីណា
