ស្រីលង្កាចាប់ខ្លួនមនុស្សជិត ១៥ ០០០ នាក់ ក្នុងការបង្រ្កាបគ្រឿងញៀន
កូឡុំបូ៖ប៉ូលិសស្រីលង្កាបានឱ្យដឹងកាលពីថ្ងៃអាទិត្យទី២៤ ខែធ្នូ បានចាប់ខ្លួនមនុស្សជិត ១៥ ០០០ នាក់ ក្នុងអំឡុងចុះបង្រ្កាបបទល្មើសគ្រឿងញៀនរយៈពេលមួយសប្ដាហ៍កន្លងមក។នេះបើតាមការចុះផ្សាយរបស់ទីភ្នាក់ងារសារព័ត៌មាន AFP ដែលថា ការបង្រ្កាបនេះរងការរិះគន់ពីសកម្មជនសិទ្ធិមនុស្ស។
ប៉ូលិសនិយាយថា ប្រតិបត្តិការ «Yuktiya» ឬ «យុត្តិធម៌» បានរឹបអូសថ្នាំញៀនជិត ៤៤០ គីឡូក្រាម រួមទាំងកញ្ឆា ២៧២ គីឡូក្រាម ,ហាស៊ីស ៣៥ គីឡូក្រាម និងហេរ៉ូអ៊ីន ៩ គីឡូក្រាម។ ប៉ូលិសជឿថា ប្រទេសស្រីលង្កាត្រូវបានគេប្រើប្រាស់ជាច្រកជួញដូរគ្រឿងញៀន។
បើតាមសេចក្ដីថ្លែងការណ៍របស់ប៉ូលិសមនុស្សទាំងជិត ១៥ ០០០ នាក់ មានជនសង្ស័យ ១៣ ៦៦៦ នាក់ត្រូវបានខ្លួន ខណៈអ្នកសេពគ្រឿងញៀនជិត ១ ១០០ នាក់ត្រូវបានចាប់ឃុំខ្លួន ហើយបញ្ជូនទៅមណ្ឌលកែប្រែគ្រប់គ្រងដោយយោធា។
ប្រព័ន្ធផ្សព្វផ្សាយក្នុងស្រុក បានបង្ហាញពីខ្សែវិដេអូដែលប៉ូលិស និងទាហានស្រីលង្កា ដែលរួមសហការក្នុងការបង្រ្កាបជាមួយគ្នា ប្រើឆ្កែដើម្បីហិតខ្លិន ដើម្បីឆែកឆេរកន្លែងផ្សេងៗជាពិសេសក្នុងរដ្ឋធានីកូឡំបូ។ បើតាមប៉ូលិស ការបង្រ្កាបត្រូវផ្អាកសិននៅថ្ងៃឈប់សម្រាកបុណ្យណូអែល ដោយសារតែត្រូវការមន្រ្តីមានសមត្ថកិច្ចដើម្បីដាក់ពង្រាយការពារសន្តិសុខ មុននឹងបន្តប្រតិការបង្រ្កាបឡើងវិញនៅថ្ងៃអង្គារ។
គេមើលឃើញថា ការបង្រ្កាបគ្រឿងញៀនរបស់អាជ្ញាធរស្រីលង្កា បានរងការរិះគន់ពីក្រុមសិទ្ធិមនុស្ស។ សកម្មជនសិទ្ធិមនុស្សស្រីលង្កា លោកស្រី Ambika Satkunanathan បានបង្ហោះសារនៅលើបណ្ដាញសង្គមថា ការស្វែងរករបស់ប៉ូលិស មិនផ្អែកលើភស្តុតាងទេ ប៉ុន្តែដាក់គោលដៅតែលើតំបន់ក្រីក្រ។ លោកស្រីបន្ថែមថា ប៉ូលិសចាប់ខ្លួនអ្នកប្រើប្រាស់គ្រឿងញៀន និងអ្នកជួញដូរតូចតាច ប៉ុន្តែមិនផ្តោតលើអ្នកជួញដូរទ្រង់ទ្រាយធំៗទេ៕
ប្រែសម្រួល៖ហួន ឌីណា
