ម៉ិកស៊ីកូ៖ជនចំណាកស្រុករាប់ពាន់នាក់​បានធ្វើដំណើរទៅដល់​ទីក្រុងAlvaro Obregon នៅ​ភាគខាងត្បូងនៃ​ប្រទេស​​ម៉ិ​កស៊ិក​កា​លពីថ្ងៃទី២៤ ខែធ្នូ ហើយបានចំណាយពេលវេលា​បុណ្យណូអែលរបស់ខ្លួននៅ​លើទីលាន​សាធារណៈ​ដោយ​គ្មាន​ទី​ជម្រក មុនពេលបន្ត​ដំណើរទៅភាគខាង​ដើម្បីឆ្លងប្រទេស និងឆ្ពោះទៅ​កាន់​ព្រំដែន​​សហរដ្ឋអាមេរិក។​

ក្រុមជនចំណាកស្រុកដែលភាគច្រើនមកពីអាមេរិកកណ្តាល និងតំបន់ការាបៀនភាគច្រើនបានដើរចម្ងាយ ១៥ គី​ឡូម៉ែ​ត្រពីទីក្រុង Tapachula ភាគខាងត្បូងព្រំដែន​​ម៉ិ​កស៊ិក ដើម្បីឆ្ពោះទៅទីក្រុង Alvaro Obregon ព្រមជាមួយ​នឹងគម្រោង​ចេញដំណើរម្តងទៀតនៅម៉ោងបួនភ្លឺនៅថ្ងៃបន្ទាប់។​

សកម្មជនសិទ្ធិជនចំណាកស្រុក លោក Luis Garcia Villagran បានជំរុញថា​ជនចំណាកស្រុក​មិនគួរ​ត្រូវបាន​​ក្លាយ​ជា​​ឧបករណ៍នយោបាយសម្រាប់ការបោះឆ្នោតប្រធានាធិបតីសហរដ្ឋអាមេរិក​នាពេល​ខាងមុខនោះ​ទេ ដោយលោក​អះអាងថា ក្រុមរបស់ខ្លួននឹងបន្តដើរ ដោយមិនឈប់នោះទេ។​

បើតាមអាជ្ញាធរ​មូលដ្ឋាន​បាន​ប៉ាន់​ប្រមាណ​ថា​ទំហំ​នៃ​ក្បូនដើរ​នេះ​មាន​មនុស្ស​ជា​មធ្យម​ប្រហែលប្រាំបីពាន់​នាក់​ក្នុង​មួ​យ​ថ្ងៃ។ បើតាមសាក្សីម្នាក់ដែលធ្វើដំណើរជាមួយក្បូននេះបានថ្លែងប្រាប់សារព័ត៌មាន Reuters ថា ជនចំណាកស្រុ​កភាគច្រើន​មក​ពីអាមេរិក​កណ្តាល និងខាងត្បូង ហើយក៏មានតំបន់ការីប៊ីនផងដែរ។​

ចំណែក​ជនចំណាកស្រុកជនជាតិហៃទីម្នាក់ឈ្មោះ Ysguel Jean ដែលកំពុងកាន់​ឈើឆ្កាង​ពណ៌សជា​មួយអក្សរ «ព្រះយេស៊ូគ្រីស្ទ» បាននិយាយ​ថា​លោក​បានចាកចេញពីប្រទេសកំណើត​​​ដោយសារ​តែបញ្ហា​ឧក្រិដ្ឋកម្ម​និងអំពើ​ពុករលួយ​​ដ៏ច្រើនសន្ធឹកសន្ធាប់ ហើយម្យ៉ាងដោយសារតែលោកចង់ឱ្យកូនស្រី​ទាំងពីរ​របស់​ខ្លួនមានអនាគត​ប្រសើរ​ជាងនេះ។​

លោក Ysguel Jean បញ្ជាក់ថា ៖ «បីខែនៅទីក្រុង Tapachula ខ្ញុំព្យាយាមស្នើសុំ​ឯកសារ​ហើយ​ខ្ញុំនៅតែ​គ្មាន​លទ្ធផល​អ្វីសោះ ខ្ញុំធុញទ្រាន់នឹងការរង់ចាំនៅ Tapachula ពួកយើងឃ្លាន ហើយមិនអាចរកប្រាក់​ចំណូល​បាន​សោះឡើ​យ​។ ដូច​អ្នក​ដទៃ​ដែរ ខ្ញុំ​ចង់​ទៅ​ដល់ទឹកដី​សហរដ្ឋ​អាមេរិក»។​

គួរជម្រាបថា កាលពី​ឆ្នាំ២០១៨ និង២០១៩ ក្បួន​ដើរ​ធំៗ​ភាគច្រើន​ជា​ជនជាតិ​អាមេរិក​កណ្តាល​បាន​ឆ្លង​កាត់​ម៉ិកស៊ិក​​ទៅ​ដល់​សហរដ្ឋ​អាមេរិក ហើយប៉ុន្មានឆ្នាំថ្មីៗកន្លងទៅ​នេះ សកម្មភាពទាំងនេះត្រូវបាន​បន្តដោយ​ក្រុម​​ដើរតូចៗ។ ចំណែកកាល​ពី​ឆ្នាំ​​មុន ចំនួន​ជន​ចំណាក​ស្រុកដែល​​ព្យាយាម​​ឆ្លង​កាត់​ព្រំដែន​អាមេរិក-ម៉ិកស៊ិក​ដោយ​ខុស​ច្បាប់ក៏មានច្រើសន្ធឹកសន្ធាប់ផងដែរ៕​

ដោយ៖ស្រ៊ុន សិរីវឌ្ឍនៈ