ក្រសួងមហាផ្ទៃកំពុងជំរុញឱ្យអាជ្ញាធរទាំង ២៥រាជធានីខេត្ត ពង្រឹងការអនុវត្តគោលនយោបាយភូមិ ឃុំ មានសុវត្ថិភាព
ភ្នំពេញ៖ក្រសួងមហាផ្ទៃកំពុងចុះជំរុញឱ្យអាជ្ញាធរទាំង២៥រាជធានីខេត្តពង្រឹងការអនុវត្តគោលនយោបាយភូមិ ឃុំ-សង្កាត់ មានសុវត្ថិភាព ដែលផ្ដោតទៅលើការយកចិត្តទុកដាក់លុបបំបាត់ការជួញដូរ និងការប្រើប្រាស់គ្រឿងញៀននៅក្នុងសហគមន៍។
ឯកឧត្តម ទូច សុខៈ អ្នកនាំពាក្យរងក្រសួងមហាផ្ទៃ បានប្រាប់ឱ្យដឹងនៅថ្ងៃ២៥ ខែធ្នូថា លក្ខណៈសម្បត្តិគោលនយោបាយភូមិ ឃុំ-សង្កាត់ មានសុវត្ថិភាពមានប្រាំពីរចំណុចសំខាន់ ដែលមន្ត្រីក្រសួងកំពុងចុះពង្រឹងការអនុវត្តគោលនយោបាយនេះ គឺនៅទូទាំងរាជធានីខេត្តរបស់ប្រទេសកម្ពុជា ដើម្បីធ្វើយ៉ាងណាឱ្យការអនុវត្តប្រកបដោយប្រសិទ្ធភាព ធានាដល់បរិយាកាសសង្គម ដែលមានសន្តិភាព និងសុវត្ថិភាពល្អប្រសើរ ជាពិសេសផ្ដល់ភាពកក់ក្ដៅជូនប្រជាពលរដ្ឋ។
បើតាមអ្នកនាំពាក្យរងក្រសួងមហាផ្ទៃ ចំណុចគោលសំខាន់ទាំងនេះរួមមាន៖ ទី១. ផ្តល់សេវាសាធារណៈ ជាពិសេស សេវារដ្ឋបាលប្រកបដោយគុណភាព តម្លាភាព និងទទួលបានជំនឿទុកចិត្ត, ទី២. គ្មានបទល្មើ ស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ, ទី៣. មានសណ្តាប់ធ្នា ប់សាធារណៈល្អ ជាពិសេស គ្មានគ្រោះថ្នាក់ចរាចរណ៍, ទី៤. គ្មានអំពើអនាចារ គ្មានការជួញដូរមនុស្ស ពិសេសស្ត្រី និងកុមារគ្មានអំពើហិង្សាក្នុងគ្រួសារ និងគ្មានក្មេងទំនើង, ទី៥. ដោះស្រាយវិវាទនៅមូលដ្ឋានក្រៅប្រព័ន្ធតុលាការប្រកបដោយគុណភាព និងប្រសិទ្ធភាព, ទី៦.មានអនាម័យ មានសោភណភាពល្អ និងបរិស្ថានល្អ និងទី៧. គឺឆ្លើយតបបានទាន់ពេលវេលាចំពោះគ្រោះមហន្តរាយ និងរាល់ជំងឺឆ្លងរាតត្បាតកាចសាហាវប្រកបដោយប្រសិទ្ធភាព។
ឯកឧត្តម ទូច សុខៈ បានថ្លែងថា ការចុះទៅជំរុញពង្រឹងគោលនយោបាយភូមិ ឃុំ សង្កាត់ មានសុវត្ថិភាពនេះ គឺមានសារៈសំខាន់ខ្លាំងណាស់ បានជាថ្នាក់ដឹកនាំបង្កើតឡើង ដែលក្នុងនោះក្រសួងជាអ្នកជួយគាំទ្រ ត្រួតពិនិត្យដល់មន្ត្រីថ្នាក់ក្រោមជាតិដែលប្រឈមបញ្ហាផ្សេងៗ។រាល់ការត្រួតពិនិត្យទាំងអស់ហ្នឹង គឺមិនមែនដាក់បន្ទុកកំហុសលើថ្នាក់ក្រោមជាតិនោះទេ ប៉ុន្តែយើងចូលរួមគាំទ្រ និងផ្ដល់អនុសាសន៍ផ្សេងៗជូនពួកគាត់។
នៅអាណត្តិថ្មីនេះដែរ ក្រសួងមហាផ្ទៃ ក៏បានដាក់ទិសដៅអាទិភាពចំនួន ៦ចំណុច ដោយផ្តោតលើបញ្ហាគ្រឿងញៀន, បញ្ហាចរាចរណ៍, បញ្ហាបទល្មើសនានា ដែលកើតឡើងនៅតាមមូលដ្ឋាន, ការគ្រប់គ្រងក្រុមក្មេងទំនើង, បញ្ហាការជួញដូរមនុស្ស និង ញ្ហាដែលកើតឡើងនៅតាមបណ្ដាព្រំដែនជាប់ប្រទេសកម្ពុជា។ ទិសដៅអាទិភាពទាំងនេះ គឺមិនមែនសម្រាប់តែអនុវត្តនៅឆ្នាំ២០២៤ខាងមុខនេះនោះទេ ប៉ុន្តែវាជាទិសដៅសម្រាប់អនុវត្តក្នុងអាណត្តិទី៧នេះតែម្តង។ នេះបើតាមការលើកឡើងបន្ថែមពីឯកឧត្តម ទូច សុខៈ។
ឯកឧត្តមបានបន្ថែមថា ៖ «ទិសដៅអាទិភាពទាំង ៦ចំណុចនេះ វាក៏ស៊ីចង្វាក់គ្នាទៅនឹងលក្ខណៈសម្បត្តិនៃគោលនយោបាយ ភូមិ ឃុំ-សង្កាត់ មានសុវត្ថិភាព ។ដូច្នេះមន្ត្រីក្រសួងដែលចុះទៅធ្វើការផ្សព្វផ្សាយ និងជំរុញលើការងារនេះ នឹងណែនាំឱ្យអាជ្ញាធរខេត្តផ្តោតលើការយកចិត្តទុកដាក់ក្នុងការកាត់បន្ថយ និងឈានទៅដល់ការលុបបំបាត់ការជួញដូរ និងការប្រើប្រាស់គ្រឿងញៀននៅក្នុងសហគមន៍»។
សូមបញ្ជាក់ថា នៅក្នុងខែធ្នូនេះ ក្រសួងមហាផ្ទៃ បានចាត់មន្ត្រីចុះទៅជំរុញពង្រឹងការអនុវត្តគោលភូមិ ឃុំ-សង្កាត់មានសុវត្ថិភាព បានចំនួន ៥ខេត្តហើយ ។ក្នុងនោះមាន ខេត្តបាត់ដំបង កំពង់ស្ពឺ មណ្ឌលគិរី ព្រៃវែង និងខេត្តព្រះសីហនុ៕
ដោយ៖ជា សុខនី
