(ភ្នំពេញ)៖ ក្នុងរដូវកាលពងកូនថ្មី គិតមកត្រឹមបំណាច់ខែធ្នូ ឆ្នាំ ២០២៣នេះ សំបុកអកត្រីក្បាលប្រផេះចំនួន៨ហើយត្រូវបានរកឃើញនៅក្នុងតំបន់រ៉ាមសារស្ទឹងសែន និងតំបន់រ៉ាមសារបឹងទន្លេឆ្មារ ។នេះបើតាមការឱ្យដឹង ពីសំណាក់អង្គការជីវិតធម្មជាតិនៅកម្ពុជា។

ប្រភពខាងលើដែលបានបញ្ចេញឱ្យដឹងនៅថ្ងៃទី ៣០ ខែធ្នូ ឆ្នាំ ២០២៣នេះថា ក្នុងចំណោមសំបុកអកត្រីក្បាលប្រផេះចំនួន៨នេះមាន៦ជាសំបុកថ្មី និង ២ជាសំបុកចាស់។

គួរបញ្ជាក់ថាអកត្រីក្បាលប្រផេះត្រូវបានចាត់ថ្នាក់ថាជាប្រភេទជិតរងការគំរាមកំហែងខ្លាំងក្នុងបញ្ជីក្រហម IUCN ដោយសារកត្តាបាត់បង់ទីជម្រក ការថយចុះនៃប្រភពចំណី និងសកម្មភាពរំខានរបស់មនុស្ស។

វត្តមានសំបុកពងកូនរបស់សត្វនេះ សបញ្ចាក់ថាតំបន់រ៉ាមសារសារស្ទឹងសែន និងតំបន់រ៉ាមសារបឹងទន្លេឆ្មារដែលស្ថិតក្នុងទន្លេសាបកំពុងដើរតួដ៏សំខាន់ក្នុងការគាំទ្រការរស់រានមានជីវិតរបស់សត្វអកត្រីក្បាលប្រផេះនេះ៕

ដោយ៖ម៉ាដេប៉ូ