ភ្នំពេញ៖ ពិធីបុណ្យចូលឆ្នាំថ្មីប្រពៃណីចិន-វៀតណាមបាននាំមកនូវលំហូរភ្ញៀវទេសចរយ៉ាងច្រើនមកកាន់ប្រទេសកម្ពុជា ដោយមានភ្ញៀវទេសចរជាតិ និងអន្តរជាតិជាង ១លាន ៥ម៉ឺននាក់ធ្វើដំណើរកម្សាន្តនៅទូទាំងប្រទេសចាប់ពីថ្ងៃទី ៩ ដល់ ១១ ខែកុម្ភៈ ឆ្នាំ ២០២៤។

របាយការណ៍​របស់​ក្រសួង​ទេសចរណ៍ចេញផ្សាយនៅថ្ងៃទី១២ ខែកុម្ភៈបានឱ្យ​ដឹងថា ភ្ញៀវទេសចរជាតិមានជិតមួយលាននាក់ និងភ្ញៀវទេសចរបរទេសជាងប្រាំម៉ឺននាក់។ មានប្រាំខេត្តដែល​ទទួល​បាន​ភ្ញៀវ​ទេសចរច្រើន​ជាងគេរួមមាន ព្រះសីហនុ សៀមរាប បាត់ដំបង ប៉ៃលិន និង ខេត្តកែប។

​ខេត្ត​ព្រះសីហនុឈរលំដាប់លេខ១ ដោយ​ទទួល​បាន​ភ្ញៀវទេសចរជាតិសរុបជិត៣០ម៉ឺននាក់ និងភ្ញៀវបរទេសជាង១០ម៉ឺននាក់​។​ លោក ឡុង ឌីម៉ង់ អភិបាលរងខេត្តព្រះសីហនុឱ្យដឹងថា ចំនួនភ្ញៀវទេសចរនេះបានកើនឡើង ២០ភាគរយ ធៀបនឹងឆ្នាំមុន។ ឆ្នេរស្អាតៗរបស់ខេត្តនេះ ដូចជា ឆ្នេរកោះរ៉ុង ឆ្នេរអូរឈើទាល និងឆ្នេរអូរត្រេះ ជាកន្លែងទាក់ទាញភ្ញៀវបានច្រើនបំផុត។

ខេត្ត​កែបថ្មីៗនេះ​ទទួល​បាន​ពាន​រង្វាន់​ទីក្រុង​ទេសចរណ៍​ស្អាត​អាស៊ាន​លើក​ទី៤ឆ្នាំ ២០២៤។ ខេត្តនេះមានភ្ញៀវ​ទេសចរ​ជាតិ និង​ភ្ញៀវ​ទេសចរ​អន្តរជាតិ ប្រមាណ​ ៧ម៉ឺននាក់ពោលគឺកើនឡើងជាង ៨ភាគរយធៀបនិងរយៈពេលដូចគ្នា ក្នុងឆ្នាំ២០២៣។ នេះបើតាមការឱ្យដឹងពី ឯកឧត្តម សោម ពិសិដ្ឋ អភិបាល​ខេត្ត​កែប។

ខេត្តសៀមរាប ដែលមានបេតិកភណ្ឌវប្បធម៌ដ៏សម្បូរបែប មានភ្ញៀវទេសចរជាង១១ម៉ឺននាក់ ក្នុងអំឡុងពេលពិធីបុណ្យនេះកើនឡើង ១១ភាគរយ ធៀបនឹងឆ្នាំមុន ដែលបង្ហាញពីការចាប់អារម្មណ៍ខ្លាំងឡើងលើតំបន់ទេសចរណ៍ប្រវត្តិសាស្ត្រ និងវប្បធម៌របស់កម្ពុជា។

កំណើនទេសចរណ៍នេះ ជួយជំរុញសេដ្ឋកិច្ចសហគមន៍ ក្នុងស្ថានភាពសេដ្ឋកិច្ចមិនប្រាកដប្រជា។ យ៉ាងណាក៏ដោយ បញ្ហាចរាចរណ៍នៅតែជាក្តីកង្វល់។ អ្នកនាំពាក្យរងក្រសួងមហាផ្ទៃ លោក ទូច សុឃៈ បានឲ្យដឹងថា ត្រឹមរយៈពេលបីថ្ងៃនៃពិធីបុណ្យចូលឆ្នាំចិននេះ គ្រោះថ្នាក់ចរាចរណ៍បានផ្ដាច់ជីវិតមនុស្ស២៣នាក់ និងរបួស៤១នាក់នៅ​ទូទាំងប្រទេស៕

ដោយ៖សែន ដាវិត

រូបថតក្រសួងទេសចរណ៍