ភ្នំពេញ៖ ក្នុងពិធីចុះអនុសារណៈយោគយល់ជាមួយ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសនីយ៍ និងទូរគមនាគមន៍ កាលពីថ្ងៃទី២៧ កុម្ភៈ ២០២៤ ឯកឧត្តម ជីវ កេង ប្រធានតុលាការកំពូលលើកឡើងថា សំណុំរឿងជាង ១ម៉ឺនករណីបានតំកល់ទុករាប់ឆ្នាំមកហើយនៅតុលាការកំពូល។ បដិវត្តន៍បច្ចេកវិទ្យានៅតុលាការកំពូលនឹងចាប់ផ្តើមពីការប្រែក្លាយឯកសារឿងក្តីដែលគរទុកទាំងនោះទៅជាឯកសារអេឡិចត្រូនិច ដើម្បីសុវត្ថិភាព និងភាពត្រឹមត្រូវ ។ ចំណែករឿងក្តីថ្មីៗក៏នឹងត្រូវបញ្ជូលក្នុងថ្នាលបច្ចេកវិទ្យានេះផងដែរ ដែលនឹងផ្តល់ភាពងាយស្រួលក្នុងការដោះស្រាយវិវាទ។

ឯកឧត្តម ជីវ កេង បញ្ជាក់ថា ការប្រើប្រាស់ប្រព័ន្ធឌីជីថល ជាធាតុមួយចាំបាច់ដើម្បីជំរុញល្បឿនការងារ ផ្តល់សេវាយុត្តិធម៌ប្រកដោយភាពត្រឹមត្រូវ ឆាប់រហ័ស និងមានប្រសិទ្ធភាព ។

ក្រៅពីការប្រើថ្នាលឌីជីថលនេះ ក្រសួងប្រៃសណីយ៍ ក៏នឹងបំពាក់ប្រព័ន្ធបច្ចេកវិទ្យាចាំបាច់ បណ្តុះធនធានមនុស្សក្នុងតុលាការកំពូល និងផ្តល់កុំព្យូទ័រផងដែរ ដើម្បីឱ្យតុលាការកំពូលមួយនេះក្លាយជាគំរូឈានមុខគេនៅក្នុងវិស័យតុលាការនៅកម្ពុជា។ នេះជាការប្តេជ្ញាចិត្តរបស់ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍។

ថ្នាលបច្ចេកវិទ្យា verify.gov.kh ប្រៀបដូចជាជម្រុកឯកសាអេឡិចត្រូនិចដែលត្រូវបានប្រើប្រាស់ក្នុងគោលបំណងលុបបំបាត់ការក្លែងបន្លំឯកសារ ផ្តល់ភាពងាយស្រួលក្នុងការប្រើប្រាស់ និងផ្ទៀងផ្ទាត់ភាពត្រឹមត្រូវនៃឯកសារ ដើម្បីបង្កើនទំនុកចិត្ត ចំណេញពេលវេលា និងកាត់បន្ថយការចំណាយនានា។ ផ្តួចផ្តើមបង្កើតឡើងដោយ ក្រសួងប្រៃសណីយ៍ និងទូរគមនាគមន៍ ថ្នាលនេះដណ្តើមបានមេដាយមាសនៃពានរង្វាន់ឌីជីថលអាស៊ាន ឆ្នាំ២០២៤ នៅប្រទេសសិង្ហបុរី។ រហូតមកដល់ពេលនេះ មានក្រសួងនិងគ្រឹះស្ថានអប់រំចំនួន៣៦ កំពុងប្រើប្រាស់ថ្នាលនេះ រួមទាំងក្រសួងយុត្តិធម៌ផង។

គួរសម្គាល់ថា ការកែទម្រង់ប្រព័ន្ធយុត្តិធម៌គឺជាអាទិភាពចម្បងរបស់រដ្ឋាភិបាលអាណត្តិថ្មី។ ប្រព័ន្ធយុត្តិធម៌ដែលប្រជាជនមួយចំនួនរិះគន់ពីប្រសិទ្ធិភាព និងការផ្តល់យុត្តិធម៌។ ដើម្បីកែលម្អ ក្រសួងយុត្តិធម៌កំពុងអនុវត្តវិធានការ៣គឺ ការរៀបចំដោះស្រាយវិវាទក្រៅប្រព័ន្ធតុលាការ ការជំរុញនិងពន្លឿនដោះស្រាយរឿងក្តីនៅតាមប្រព័ន្ធតុលាការ និងការត្រួតពិនិត្យនឹងដោះស្រាយភាពមិនប្រក្រតីនៅតាមតុលាការ។ អាជ្ញាធរជាតិដោះស្រាយវិវាទក្រៅប្រព័ន្ធតុលាការក៏ត្រូវបានបង្កើតឡើងផងដែរដើម្បីពន្លឿនល្បឿនដោះស្រាយ និងតម្លាភាព តបតាមអភិក្រមទាំង៤របស់ក្រសួងយុត្តិធម៌គឺ លឿន ត្រឹមត្រូវ យុត្តិធម៌ និងមិនពុករលួយ៕

អត្ថបទ ង៉ាន់មទិត្យ
រូបភាព រិន រចនា