ការ៉ាកាស៖ ទាហានវេណេស៊ុយអេឡាបានបណ្តេញមនុស្សជាង ១២០០នាក់ ភាគច្រើន ជាកុមារ ចេញពីតំបន់អណ្តូងរ៉ែមាសខុសច្បាប់ ដែលទើបកើតហេតុការណ៍ បាក់ដួលរលំ ស្លាប់មនុស្ស ១៦នាក់។

កងកម្លាំងប្រដាប់អាវុធបាននិយាយ កាលពីថ្ងៃអាទិត្យថា ក្រុមដែលត្រូវបានបណ្តេញនេះរួមមាន ទាំងអនីតិជនចំនួន ១៣១នាក់ ផងដែរ។ ពួកគេត្រូវបានបង្ខំឲ្យចាកចេញ ពីអណ្តូងរ៉ែ Bulla Loca ក្នុងតំបន់ Bolivar នៃប្លុក Amazon។

ឧត្តមសេនីយ Domingo Hernandez Larez មេបញ្ជាការនៃប្រតិបត្តិការកម្លាំងប្រដាប់អាវុធបាននិយាយថា «ការការពារធម្មជាតិ គឺជាភារកិច្ចរបស់មនុស្សគ្រប់រូប»។ លោកបន្តថា «ការបណ្តេញចេញកំពុងបន្តធ្វើ ហើយនេះគឺជាការរុះរើរចនាសម្ព័ន្ធរុករករ៉ែខុសច្បាប់ ដែលបានសាងសង់នៅក្នុងព្រៃអភិរក្ស»។

គួរឲ្យដឹងថា តំបន់នេះសម្បូរទៅដោយមាស ពេជ្រ ដែក បុកស៊ីត រ៉ែថ្មខៀវ និងកូលតាន់។ ក្រៅពីសកម្មភាពជីករករ៉ែ របស់រដ្ឋ ក៏មានឧស្សាហកម្មចម្រាញ់ ដោយខុសច្បាប់ផងដែរ។

កាលពីខែកុម្ភៈ មនុស្ស ១៦នាក់បានស្លាប់ ក្នុងព្រឹត្តិការណ៍បាក់រលំអណ្តូងរ៉ែ ក្នុងរូងភ្នំ។ កាលពីខែធ្នូ ឆ្នាំមុន មនុស្ស ១២ នាក់បានស្លាប់ ក្នុងពេលដែលអណ្តូងរ៉ែមួយនៅក្នុងសហគមន៍ជនជាតិដើមភាគតិច Ikabaru ក្នុងតំបន់ដូចគ្នានេះ បានដួលរលំ។

អង្គការ SOS Orinoco និយាយថា យ៉ាងហោចណាស់មនុស្ស៥៤ នាក់បានស្លាប់ នៅក្នុងឧបទ្វេហេតុបាក់រលំអណ្តូងរ៉ែមាស ចំនួន ១៧លើក នៅក្នុងតំបន់នោះ ចន្លោះឆ្នាំ២០១៧ ដល់ ២០២២។ ក្រុមសកម្មជនបរិស្ថានរិះគន់ពីបញ្ហាអេកូឡូស៊ី ហើយថែមទាំងបានអះអាងថា នៅទីនោះ ក៏មានការកេងប្រវ័ញ្ចលើកុមារ ឲ្យធ្វើការច្រើនម៉ោង ដោយគ្មានការការពារ ទៀតផង៕

ប្រភពពី AFP ប្រែសម្រួល៖ សារ៉ាត