និស្សិតជំនាន់ Z របស់វៀតណាមបង្ហាញពីការប្តេជ្ញាចូលរួមបំពេញមហិច្ឆតារបស់ប្រទេសខ្លួនដែលចង់ក្លាយជាមជ្ឈមណ្ឌលបន្ទះឈីប (Chip)។  
 
យុវតី Nguyen Phuong Linh វ័យ២១ឆ្នាំ ដែលជានិស្សិតស្ថិតក្នុងចំណោមក្រុមនិស្សិតជំនាន់អេឡិចត្រូនិក ឬ ជំនាន់ Z បានប្រាប់ AFP ថានាងចង់បណ្តុះបណ្តាលមនុស្សជំនាន់ថ្មី ដែលអាចជួយទាក់ទាញអ្នកវិនិយោគបរទេស ដែលចង់ធ្វើពិពិធកម្មផលិតកម្មពាក់កណ្តាលសម្រេច ឬ semiconductor ខ្លាំងជាង ប្រទេសចិន។
 
ជំនាន់ Z ដែលជារឿយៗ គេហៅថា “ជនជាតិដើមឌីជីថល” រួមមានបុគ្គលដែលកើតធំធាត់ឡើងក្នុងអំលុងពាក់កណ្តាលទសវត្សរ៍ឆ្នាំ ១៩៩០ ដល់ដើមទសវត្សរ៍ឆ្នាំ ២០១០។ ជារយៈពេលដែលត្រូវបានសម្គាល់ដោយការរីកចម្រើននៃបច្ចេកវិទ្យាឌីជីថល។ ជំនាន់នេះត្រូវគេចាត់ទុកថា មានទេពកោសល្យអំណោយផលទាក់ទងនឹងបច្ចេកវិទ្យា គំនិតច្នៃប្រឌិត និងការត្រៀមខ្លួនទទួលយកភាពចម្រុះបែបមិនថាក្នុងការរស់នៅ ឬប្រកបការងារ។
 
វៀតណាមត្រូវបានចាត់ទុក ជាទិសដៅល្អសម្រាប់ការផលិតសម្លៀកបំពាក់ ស្បែកជើង និងគ្រឿងសង្ហារិម ប៉ុន្តែ ពេលនេះ វៀតណាមកំពុងសម្លឹងមើលការកើនឡើងយ៉ាងឆាប់រហ័សនូវខ្សែសង្វាក់ផ្គត់ផ្គង់ពិភពលោក ហើយបានចាត់ទុក បន្ទះឈីប ជាបេះដូងនៃផែនការអភិវឌ្ឍន៍របស់ខ្លួន។
 
ក្នុងអំឡុងដំណើរទស្សនកិច្ចទៅវៀតណាម កាលពីឆ្នាំមុន ប្រធានាធិបតីសហរដ្ឋអាមេរិក លោក Joe Biden បានប្រកាសពីកិច្ចព្រមព្រៀង គាំទ្រដល់ឧស្សាហកម្មបន្ទះឈីបរបស់វៀតណាម៕ ប្រភពពី AFP ប្រែលសម្រួល៖ សារ៉ាត