ភ្នំពេញ៖ ទារកអាយុទើបតែបាន៨ខែម្នាក់ រងរបួសធ្ងន់ ហើយត្រូវបានបញ្ជូនទៅសង្គ្រោះនៅឯមន្ទីពេទ្យភ្លាមៗ និងក្មេងចាស់ប្រុសស្រី៦នាក់រងរបួសរលាត់ដៃជើងស្រាល ពេលកំពុងជិះកង់បីឥណ្ឌាមួយគ្រឿង ត្រូវបានរថយន្តកូរ៉េមួយគ្រឿងបើកបត់ត្រឡប់ក្រោយបុកពេញទំហឹង បណ្តាលឲ្យកៀបជាប់គ្នារួចនាំគ្នារត់គេចខ្លួនបាត់អស់ កាលពីម៉ោង១០និង១០នាទីយប់ ថ្ងៃទី៧ ខែកក្តដា ឆ្នាំ២០១៩ ស្ថិតនៅខាងជើងវត្តឃ្មួញប្រមាណជាង២០០ម៉ែត្រ តាបណ្តោយផ្លូវភ្នំពេញហាណូយ ក្នុងភូមិឃ្មួញ សង្កាត់ឃ្មួញ ខណ្ឌសែនសុខ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុ គេយុវជនម្នាក់រួមដំណើរនឹងយុវជនពីរនាក់ទៀត បើករថយន្តកូរ៉េ ពណ៌ខៀវមួយគ្រឿង ពាក់ស្លាលេខភ្នំពេញ2A-5754 ធ្វើដំណើរទិសដៅពីត្បូងទៅជើង មកដល់ចំណុចកើតហេតុបានបត់ឆ្វេងដៃឆ្លងមកផ្លូវម្ខាងដើម្បីត្រឡប់ក្រោយបានជ្រុលទៅបុកកង់បីឥណ្ឌាមួយគ្រឿងពណ៌ស ពាក់ស្លាកលេខភ្នំពេញ1HQ-8983 បើកបរដោយបុរសម្នាក់ រួមដំណើរនឹងប្រពន្ធកូនប្រុសស្រីបីនាក់ និងប្អូនម្នាក់ព្រមទាំងក្មួយអាយុ៨ខែម្នាក់ទៀតសរុបទាំងអស់៧នាក់ បានធ្វើដំណើរទិសដៅពីជើងទៅត្បូង ចំផ្នែកខាងមុខចំហៀងខាងឆ្វេងពេញទំហឹង បណ្តាលឲ្យរថយន្ត និងកង់បីខ្ទាតមកចិញ្ចើមផ្លូវកៀបជាប់គ្នា រងការខូចខាតយ៉ាងដំណំ និងបណ្ដាលឲ្យទារកអាយុ៨ខែម្នាក់ រងរបួសធ្ងន់ត្រូវបនបញ្ជូនទៅសង្គ្រោះភ្លាមៗ។  ចំណែកក្មេងចាស់ប្រុសស្រី៦នាក់ទៀត រងរបួសរលាត់ដៃជើងស្រាល។

ដោយឡែកអ្នកបើកបររថយន្តបង្ក រួមនឹងបក្ខពួកនាំគ្នារត់គេចខ្លួនបាត់។ ក្រោយពេលកើតហេតុ សមត្ថកិច្ចមូលដ្ឋានបានចុះដល់ និងទំនាក់ទំនងទៅសមត្ថកិច្ចជំនញចុះវាស់វែងយករថយន្ត និងកង់បីឥណ្ឌា ទៅរក្សាទុកនៅអធិការដ្ឋាននគរបាលខណ្ឌសែនសុខ រង់ចាំដោះស្រាយគ្នាទៅតាមផ្លូវច្បាប់៕ធ.ដ