គូឡាឡាំពួរ៖ ក្រុមហ៊ុន Microsoft នៅថ្ងៃព្រហស្បតិ៍នេះ បានសន្យាថា នឹងបោះទុនការវិនិយោគចំនួន ២.២ពាន់លានដុល្លារ នៅក្នុងផ្នែកបញ្ញាសិប្បនិម្មិត AI និង Cloud computing នៅម៉ាឡេស៊ី ដើម្បីជួយអភិវឌ្ឍហេដ្ឋារចនាសម្ព័ន្ធ AI របស់ប្រទេសអាស៊ីនេះ។

នាយកប្រតិបត្តិក្រុមហ៊ុនបច្ចេកវិទ្យាអាមេរិក Microsoft លោក Satya Nadella កំពុងធ្វើដំណើរទស្សនកិច្ចទៅកាន់ប្រទេសចំនួន៣ នៅអាស៊ីអាគ្នេយ៍ ក្នុងនោះរួមមានឥណ្ឌូនេស៊ី ថៃ និងម៉ាឡេស៊ី ដើម្បីប្រកាសអំពីការវិនិយោគដ៏ធំសម្បើមទៅក្នុងមជ្ឈមណ្ឌលទិន្នន័យ AI និងសេវាកម្ម Cloud។

លោក Nadella បានបញ្ជាក់ពីទីក្រុងគូឡាឡាំពួរថា ថ្ងៃនេះ Microsoft សូមប្រកាសថា ខ្លួននឹងវិនិយោគជាង ២.២ពាន់លានដុល្លារក្នុងរយៈពេល ៤ឆ្នាំខាងមុខ ដើម្បីគាំទ្រដល់ការផ្លាស់ប្តូរឌីជីថលរបស់ប្រទេសម៉ាឡេស៊ី ដែលនេះជាការវិនិយោគដ៏ធំបំផុតតែមួយគត់ ក្នុងប្រវត្តិសាស្រ្តរយៈពេល ៣២ឆ្នាំរបស់ខ្លួន។

លោក Nadella បន្ថែមថា ការវិនិយោគនេះ នឹងជួយកសាងហេដ្ឋារចនាសម្ព័ន្ធ AI និងCloud នៅក្នុងប្រទេសម៉ាឡេស៊ី, បង្កើតមជ្ឈមណ្ឌល AI ដ៏ល្អឥតខ្ចោះ និងផ្តល់ការបណ្តុះបណ្តាល AI ដល់ប្រជាជនម៉ាឡេស៊ីរហូតដល់ ២០ម៉ឺននាក់។

ការសន្យាបែបនេះរបស់លោក Nadella កើតឡើងបន្ទាប់ពីរូបលោកបានប្រកាសពីការវិនិយោគរហូតដល់ ១.៧ពាន់លានដុល្លារនៅក្នុងប្រទេសឥណ្ឌូនេស៊ី និងបង្កើតតំបន់មជ្ឈមណ្ឌលទិន្នន័យដំបូងគេនៅក្នុងប្រទេសថៃ ក្នុងសប្តាហ៍នេះ ដើម្បីជំរុញហេដ្ឋារចនាសម្ព័ន្ធ Cloud និងបញ្ញាសិប្បនិម្មិត AI៕

ប្រភព៖ AFP ប្រែសម្រួលដោយ៖ ឈឹម ទីណា