នាយករដ្ឋមន្ត្រីកម្ពុជា បង្ហាញផែនការអភិវឌ្ឍន៍ប្រព័ន្ធដឹកជញ្ជូន អន្តរមធ្យោបាយ និង ភស្តុភារកម្មកម្ពុជាចំនួន ១៧៤គម្រោង តម្លៃជាង ៣៦ប៊ីលានដុល្លារ ដល់ធុរជនអន្តរជាតិ
(ឡាវ)៖ នាយករដ្ឋមន្ត្រីកម្ពុជា បង្ហាញផែនការអភិវឌ្ឍន៍ប្រព័ន្ធ ដឹកជញ្ជូនអន្តរមធ្យោបាយ និងភស្តុភារកម្មកម្ពុជា ចំនួន ១៧៤គម្រោង តម្លៃជាង ៣៦ប៊ីលានដុល្លារ ដល់ធុរជនអន្តរជាតិ ដើម្បីទាក់ទាញវិនិយោគិន អន្តរជាតិបន្ថែមទៀត។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងដូច្នេះទៅកាន់បណ្តាធុរជនអន្តរជាតិ ក្នុងកម្មវិធីអាហារ ពេលព្រឹក ស្វែងរកដៃគូ នៃកិច្ចប្រជុំកំពូលធុរកិច្ច និងវិនិយោគ អាស៊ាន ឆ្នាំ២០២៤ នាថ្ងៃទី១០ ខែតុលា ឆ្នាំ២០២៤ ។
សម្តេចធិបតី ហ៊ុន ម៉ាណែត បានលើកឡើងថា ផែនការនេះ បានបង្ហាញ ពីកាលានុវត្តភាពដ៏ពិសេស និងគ្មានដែនកំណត់ សម្រាប់វិនិយោគិនក្នុងតំបន់ និងអន្តរជាតិ ជាពិសេស ការពិចារណា ទៅលើការអភិវឌ្ឍតាមយន្តការភាពជាដៃគូរ រវាងរដ្ឋ និងឯកជន (PPP) ។
សម្តេចធិបតី មានប្រសាសន៍ផងដែរថា កម្ពុជា តែងតែប្រកាន់ភ្ជាប់ជានិច្ច នូវអភិក្រមធុរកិច្ច ដែលមិនមានការរើសអើង និងឈរលើមូលដ្ឋាន អ្នកមកមុន បានមុន ដោយមិនគិតពីប្រភពដើមនៃការវិនិយោគនោះឡើយ ដរាបណា ពួកគេមានឆន្ទៈពិតប្រាកដ ក្នុងការកសារទំនាក់ទំនង ដែលផ្តល់ផលប្រយោជន៍ទៅវិញទៅមក និងអាចគាំទ្រដល់ការរីកចម្រើន និងការអភិវឌ្ឍដោយចីរភាព។
យោងតាមផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា២០២៣-២០៣៣ បានឱ្យដឹងថា ផែនការមេនេះ មានគោលដៅធំ៤ រួមមាន៖ (១) ពង្រីក និងធ្វើឱ្យកាន់ តែប្រសើរឡើងនូវវិសាលភាព គ្របដណ្តប់ និងសមត្ថភាពនៃប្រព័ន្ធហេដ្ឋារចនាសម្ព័ន្ធ ដឹកជញ្ជូន, (២) ធ្វើឱ្យប្រសើរឡើងនូវប្រសិទ្ធភាព និងស័ក្ដិសិទ្ធិភាពនៃសេវានិងហេដ្ឋារចនាសម្ព័ន្ធដឹកជញ្ជូន, (៣) ជំរុញ និងលើក កម្ពស់ហេដ្ឋារចនាសម្ព័ន្ធដឹកជញ្ជូនសំដៅគាំទ្រ គោលនយោបាយអភិវឌ្ឍន៍ជាតិ និង (៤) ពង្រឹងប្រសិទ្ធភាពសេវា និងចំណាយឡូជីស្ទិក។
ផែនការមេកំណត់បាននូវគម្រោងអាទិភាពចំនួន១៧៤ ក្នុងនោះគម្រោងផ្លូវថ្នល់មានចំនួន៩៤ គម្រោងផ្លូវ ដែកមានចំនួន៨ គម្រោងដឹកជញ្ជូនតាមផ្លូវទន្លេមានចំនួន២៣ គម្រោងដឹកជញ្ជូនតាមផ្លូវសមុទ្រមានចំនួន២០ គម្រោងផ្លូវអាកាសមានចំនួន១០ គម្រោងប្រព័ន្ធឡូជីស្ទីក មានចំនួន១៥ និងគម្រោងបន្ថែមផ្សេងៗមានចំនួន៤។ គម្រោងទាំងនោះ រួមបញ្ចូលនូវគម្រោងតភ្ជាប់ពីមធ្យោបាយ ដឹកជញ្ជូនមួយទៅមធ្យោបាយដឹកជញ្ជូនផ្សេងទៀត និងទៅកាន់មណ្ឌលឡូជីស្ទីក ព្រមទាំងបែងចែកជារយៈពេលខ្លី និងមធ្យមចំនួន៩០គម្រោង និងរយៈពេលវែងចំនួន ៩១គម្រោង។
តាមការប៉ាន់ស្មានគម្រោងទាំងនេះ តម្រូវការហិរញ្ញប្បទាន សរុបប្រមាណ ៣៦ ៦៧៩លានដុល្លារអាម៉េរិក ដែលក្នុងនោះ តម្រូវការក្នុងរយៈពេលខ្លី និងមធ្យម ពីឆ្នាំ២០២៣ ដល់ ២០២៧ មានប្រមាណ ១៩,៩២៦លានដុល្លារអាម៉េរិក ស្មើនឹង ៣,៩៨៥លានដុល្លារអាម៉េរិក ជាមធ្យមប្រចាំឆ្នាំ ៕
ដោយ ៖ វណ្ណលុក
