ប្រធានក្រុមមេធាវី អាស៊ី កម្ពុជា នឹងសហការជាមួយក្រសួងយុត្តិធម៌ ដោះស្រាយ វិវាទក្រៅប្រព័ន្ធតុលាការដើម្បីជាការរួមចំណែកជួយលើកកម្ពស់ភាពសុខដុមរមនាក្នុងសហគមន៍ និងសន្តិភាពរបស់ប្រទេស
(ភ្នំពេញ)៖ ការដោះស្រាយវិវាទក្រៅប្រព័ន្ធតុលាការ ត្រូវបានចាត់ទុកជាការងារអាទិភាពដ៏សំខាន់មួយ ក្នុងការងារកែ ទម្រង់វិស័យយុត្តិធម៌ ដើម្បីធានានូវស្ថានភាពឈ្នះ-ឈ្នះទាំងអស់គ្នា ដែលជាការរួមចំណែកជួយលើកកម្ពស់ភាពសុខដុមរមនាក្នុងសហគមន៍ និងសន្តិភាពរបស់ប្រទេស ។ ទន្ទឹមនេះការដោះស្រាយ វិវាទក្រៅប្រព័ន្ធតុលាការ មិនត្រឹមតែអាចជួយដល់គូភាគីវិវាទអាចបញ្ចប់ទំនាស់ដោយ ឆាប់រហ័ស ដោយផ្អែកតាម គោល ការណ៍ឈ្នះ-ឈ្នះទាំងអស់គ្នានោះទេ ប៉ុន្តែអាចជួយកាត់បន្ថយការ កកស្ទះសំណុំ រឿងរដ្ឋប្បវេណីនៅតាមសាលាជម្រះក្តីផងដែរ ។
នេះជាការលើកឡើង របស់ឯកឧត្តម យ៉ម ផារ៉ូត ប្រតិភូរាជរដ្ឋាភិបាលនិងជាអគ្គ លេខាធិការនៃអាជ្ញាធរជាតិដោះស្រាយ វិវាទក្រៅ ប្រព័ន្ធតុលាការ ក្រសួងយុត្តិធម៌ តំណាង ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ក្នុងឱកាសអញ្ជើញជាអធិបតីបើកសិក្ខាសាលាស្តីពី “តួនាទីមេធាវីក្នុងប្រព័ន្ធយុត្តិធម៌ និងការអនុវត្តក្នុងសម័យរដ្ឋាភិ បាលឌីជីថល” ដោយមានការអញ្ជើញចូលរួមពីឯកឧត្តម ឧត្តមសេនីយ៍ឯក ជួន ណារិន្ន អគ្គស្នងការរង នៃអគ្គស្នងការដ្ឋាននគរបាលរាជធានីភ្នំពេញ និងលោកជំទាវ សេង វួចហ៊ុន ប្រធានសមាគមបញ្ញាវន្តកម្ពុជាដើម្បីអភិឌ្ឍន៍ ប្រធានក្រុមមេធាវី អាស៊ីកម្ពុជា សមាជិកក្រុមប្រឹក្សាអ្នកច្បាប់ នៅថ្ងៃទី១១ ខែតុលា ឆ្នាំ២០២៤ នាសណ្ឋាគារសូហ្វីតែលភូគីត្រាភ្នំពេញ ។
ឯកឧត្តមអគ្គលេខាធិការនៃអាជ្ញាធរជាតិដោះស្រាយ វិវាទក្រៅ ប្រព័ន្ធតុលាការ បានមានប្រសាសន៍ថា ក្រៅពីការការពារក្តីនៅតុលាការ និងក្នុងករណីដែលច្បាប់អនុញ្ញាត, មេធាវីគ្រប់រូប សូមព្យាយាមដើរតួនាទីជាអ្នកផ្សះផ្សារ ឬសម្រុះសម្រួលបញ្ចប់វិវាទនៅ ក្រៅប្រព័ន្ធតុលាការ ជាពិសេសករណីវិវាទគ្រួសារ វិវាទដីធ្លី វិវាទផ្នែករដ្ឋប្បវេណី និងវិវាទពាណិជ្ជកម្ម។ ទន្ទឹមនេះ អ.ដ.ក. បានចុះអនុស្សារណៈនៃការយោគយល់គ្នាជាមួយគណៈ មេធាវី កាលពីថ្ងៃទី៣០ ខែកក្កដា ឆ្នាំ ២០២៤ ដូច្នេះ មេធាវី ទាំងឡាយអាចនាំយកវិវាទដែលខ្លួនបានសម្រុះសម្រួលដោះស្រាយបញ្ចប់ ហើយស្នើមក អ.ដ.ក. ដើម្បីទទួលស្គាល់ និងចេញជាកំណត់ ហេតុព្រមព្រៀងបញ្ចប់វិវាទ ដែលតាម ច្បាប់កំណត់ហេតុនេះ មាន តម្លៃដូចសាលក្រមស្ថាពរ។
ឯកឧត្តម យ៉ម ផារ៉ូត បានបញ្ជាក់ថា ៖តួនាទីរបស់មេធាវីកាន់តែមានសារៈសំខាន់ថែមទៀត ដោយ សារការវិវត្តន៍នៃស្ថាន ភាពកាន់តែស្មុគស្មាញនៃសង្គម ជាពិសេសនៅក្នុងបរិបទនៃសង្គមនីតិរដ្ឋ ដែលច្បាប់ និងលិខិតបទដ្ឋានគតិយុត្ត មានកាន់តែច្រើនឡើងៗ ពីមួយថ្ងៃទៅមួយថ្ងៃ ពីមួយឆ្នាំទៅមួយឆ្នាំ។ ផ្អែកលើតួនាទីដ៏មានសារៈសំខាន់របស់មេធាវីនៅក្នុងវិស័យយុត្តិធម៌, មេធាវី គឺជាតួអង្គ ដៃគូដ៏សំខាន់មួយរបស់ក្រសួងយុត្តិធម៌ ក៏ដូចជា របស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ (ហៅកាត់ថា អ.ដ.ក.) នៅក្នុងការងារកែទម្រង់ច្បាប់ និងប្រព័ន្ធយុត្តិធម៌ ដែលជាកម្មវិធីនយោ បាយ អាទិភាពមួយរបស់រាជរដ្ឋាភិបាល នីតិកាលទី៧ នេះ ។
លោកជំទាវ សេង វួចហ៊ុន ប្រធានសមាគមបញ្ញាវន្តកម្ពុជាដើម្បីអភិវឌ្ឍន៍ ប្រធានក្រុមធាវីអាស៊ីកម្ពុជា សមាជិកក្រុមប្រឹក្សាអ្នកច្បាប់ អាជ្ញាកណ្តាលការ ងារ និងមជ្ឈត្តករ បានគូសបញ្ជាក់ថា សិក្ខាសាលានេះ រៀបចំឡើងក្នុងគោល បំណងធ្វើការផ្លាស់ប្តូរយោបល់ ការចែករំលែក ចំណេះដឹង បទពិសោធន៍ការងារ អំពីតួនាទីសំខាន់ៗរបស់មេធាវីវិស័យយុត្តិធម៌ ក្រោមប្រធានបទ “តួនាទីមេធាវីក្នុង ប្រព័ន្ធយុត្តិធម៌ និងការអភិវឌ្ឍក្នុងសម័យរាជរដ្ឋាភិបាលឌីជីថល។ លោកជំទាវ ជឿជាក់យ៉ាងមុតមាំថា សិក្ខាសាលានេះ គឺនឹងចូលរួមចំណែកផ្សព្វ ផ្សាយបន្ថែមទៀតនូវចំណេះដឹងចំណេះធ្វើ និងបង្កើនជំនាញសមត្ថភាពទៅដល់សិក្ខា កាមដើម្បីបញ្ជ្រាបក្នុងវិស័យយុត្តិធម៌ ជាពិសេសការ ប្រើប្រាស់បច្ចេកវិទ្យាឌីជីថល ដើម្បីពង្រឹងប្រសិទ្ធភាពការងារ ។
ឯកឧត្តមឧត្តម សេនីយ៍ឯក ជួន ណារិន្ទ ស្នងការដ្ឋាននគរបាល រាជធានីភ្នំពេញ បានមានប្រសាសន៍ថា ប្រធានបទ នៃសិក្ខាសាលាថ្ងៃនេះ គឺមានសារៈសំខាន់ មិនមែនត្រឹមតែសម្រាប់អ្នកជំនាញផ្នែកច្បាប់ប៉ុណ្ណោះទេ ប៉ុន្តែសម្រាប់គ្រប់វិស័យដែល ពាក់ព័ន្ធក្នុងការធានានូវសុចរិតភាពនៃយុត្តិធម៌នៅកម្ពុជា ៕
ដោយ ៖ ហេង សម្បត្តិ+ថេត វិចិត្រ
