អគារទីស្ដីការក្រសួងទេសចរណ៍ថ្មី កម្ពស់៧ជាន់ បានធ្វើពិធីក្រុងពាលី បញ្ចុះបឋមសិលាសាង់សង់ ក្នុងទំហំទឹកប្រាក់ ជិត២,៥លានដុល្លារ ដើម្បីបំពេញតម្រូវការការងារ ក្នុងវិស័យទេសចរណ៍ ដែល មានកំណើនឡើង។ ពិធីនេះធ្វើឡើងនាព្រឹកថ្ងៃទី០៧ ខែមិថុនា ឆ្នាំ២០១៩នេះ ក្រោមអធិបតីភាព ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងលោកស្រី ព្រមទាំងវត្តមានថ្នាក់ដឹកនាំ មន្ត្រីរាជការជាច្រើនរូបទៀត។

តាមការឲ្យដឹងពី ឯកឧត្តម ជា បូរ៉ា រដ្ឋលេខាធិការក្រសួងទេសចរណ៍ អគារថ្មីនេះមានកម្ពស់៧ជាន់ ដោយចំណាយថវិកាសាងសង់ប្រមាណជិត២,៥លានដុល្លារអាម៉េរិក។ ការសាងសង់នេះទៀតសោត គឺត្រូវចំណាយពេលប្រមាណ១៨ខែ ឬ ១ឆ្នាំកន្លះ។ ឯកឧត្តមបន្ថែមថា អគារថ្មីនេះ មានទាំងបន្ទប់ការិយាល័យ នាយកដ្ឋាន អគ្គនាយកដ្ឋាន និងបន្ទប់ការងារមួយចំនួនទៀត។

ឯកឧត្តម ជា បូរ៉ា បន្តថា វិស័យទេសចរណ៍កម្ពុជាកាន់តែមានការរីកចម្រើន កំណើនការងារ ក្នុងវិស័យទេសចរណ៍ក៏កាន់តែរីកធំឡើង ដែលទាមទារឲ្យមានការបន្ថែមអគារថ្មីនេះ សម្រាប់សម្រួលដល់ការបំពេញការងាររបស់មន្ត្រីរាជការផងដែរ៕ធ.ដ