(ភ្នំពេញ)៖ គណៈកម្មាធិការគោលនយោបាយសេដ្ឋកិច្ច និង​ហិរញ្ញ​វត្ថុ សម្រេចជាវិធានការ ដើម្បីអនុវត្តការងារគ្រប់គ្រង​ធនធានទឹក ដោយបានកំណត់ការដោះស្រាយជា ៣ដំណាក់​កាល រួមមាន៖ វិធានការចំពោះមុខ, វិធានការរយៈពេលខ្លី និងវិធានការរយៈពេលមធ្យម និងវែង ។ នេះបើតាមលទ្ធផល​នៃកិច្ចប្រជុំគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ស្ដីពី ស្ថានភាពទឹកស្អាត និងទឹកប្រើប្រាស់​សម្រាប់វិស័យកសិកម្ម ដោយផ្តោតលើស្ថានភាព និងបញ្ហា​ប្រឈមនៃទឹកស្អាត និងទឹកសម្រាប់វិស័យកសិកម្ម នាថ្ងៃទី០៥ ខែ មីនា ឆ្នាំ២០២៥ នៅទីស្ដីការក្រសួងសេដ្ឋកិច្ច និងហិរញ្ញវត្ថុ ក្រោមអធិបតីភាពឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ.) ដោយមានការអញ្ជើញចូលរួម​ពីថ្នាក់ដឹកនាំជាន់ខ្ពស់ នៃក្រសួង ស្ថាប័នពាក់ព័ន្ធ ។

ធនធានទឹក គឺជាវិស័យអាទិភាពមួយក្នុងចំណោមវិស័យ​អាទិភាពទាំង ៥ ក្នុងក្របខ័ណ្ឌយុទ្ធ-សាស្ត្របញ្ចកោណ ដំណាក់កាលទី ១ ដែលរួមមាន មនុស្ស ផ្លូវ ទឹក ភ្លើង និងបច្ចេកវិទ្យា ។ ស្របតាមទិសដៅនេះ, ការធានាបាន​នូវសន្ដិសុខនៃធនធានទឹក និងការប្រើប្រាស់ធនធានទឹក​ប្រកបដោយចីរភាព ត្រូវបានកំណត់ជាអាទិភាព ។

ជាចលនការនៃការអភិវឌ្ឍសេដ្ឋកិច្ច ជាអាទិ៍ ការកើនឡើង​ផ្ទៃដី​ដាំដុះ, ការរីកលូតលាស់យ៉ាងឆាប់រហ័សនៃមូល​ដ្ឋានឧស្សា​ហកម្ម​ក្នុងរយៈពេលប៉ុន្មានឆ្នាំចុងក្រោយនេះ, ការប្រើប្រាស់​របស់ប្រជាពលរដ្ឋ និងការប្រើប្រាស់សម្រាប់គាំទ្រ​ដល់ស​កម្ម​ភាពសេដ្ឋកិច្ចផ្សេងៗ ជាពិសេស នៅក្នុងរដូវប្រាំង តម្រូវជាការ​ចាំបាច់ឲ្យបង្កើននូវប្រភពទឹកស្អាតដែលប្រើប្រាស់បាន ។

ស្ថានភាពដែលតម្រូវការប្រើប្រាស់ទឹកមានការកើនឡើងនេះ ទាមទារឱ្យមានការគិតគូរទៅលើប្រសិទ្ធភាពនៃការវិនិយោគ និងរក្សាតុល្យភាពនៃការបែងចែកធនធានទឹក សំដៅធានាបាន​នូវ​ការផ្គត់ផ្គង់ទឹក ក្នុងកម្រិតសុភបរមា ដែលមានលក្ខណៈ​ប្រ​ទាក់​ក្រឡា ទៅដល់គ្រប់តួអង្គក្នុងសង្គម-សេដ្ឋកិច្ច ។

កិច្ចប្រជុំបានសម្រេចជាវិធានការ ដើម្បីរៀបចំអនុវត្តការងារ​គ្រប់​គ្រងធនធានទឹកនេះ ដោយបានកំណត់ការដោះស្រាយជា ៣ ដំណាក់កាលរួមមាន៖

១. វិធានការចំពោះមុខ៖ សម្រាប់ដោះស្រាយបញ្ហា កង្វះទឹក ក្នុងរដូវប្រាំងខាងមុខនេះ តាមរយៈការផ្ដល់ព័ត៌មាន ទៅដល់ ប្រជាពលរដ្ឋ និងអាជ្ញាធរមានសមត្ថកិច្ចក្នុងការការពារ និង រក្សាប្រភពទឹក ក៏ដូចជា ត្រៀមបម្រុងធនធានហិរញ្ញវត្ថុសម្រាប់ អន្តរាគមន៍ក្នុងករណីចាំបាច់ ។

២. វិធានការរយៈពេលខ្លី៖ សម្រាប់អនុវត្តក្នុងរយៈពេល ១ ទៅ ២ ឆ្នាំ ដោយផ្ដោតលើការវាយតម្លៃឡើងវិញលើការវិនិយោគ លើវិស័យធនធានទឹក និងសមត្ថភាពផ្គត់ផ្គង់ទឹកឱ្យឆ្លើយ តប នឹងតម្រូវការប្រើប្រាស់ និងសម្រាប់គាំទ្រដល់វិស័យកសិកម្ម និងឧស្សាហកម្ម ។

៣. វិធានការរយៈពេលមធ្យម និងវែង៖ ដោយផ្ដោតលើការរៀបចំផែនការមេគ្រប់ជ្រុងជ្រោយដើម្បីអភិវឌ្ឍ, គ្រប់គ្រង និងប្រើប្រាស់ធនធានទឹក និងការបន្ដយកចិត្តទុកដាក់លើការកែទម្រង់ និងពង្រឹងយន្ដការគ្រប់គ្រងសម្រាប់សាមីក្រសួង ស្ថាប័នដែលពាក់ព័ន្ធ ។

ក្នុងកិច្ចប្រជុំនេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងអំណរគុណ និងវាយតម្លៃខ្ពស់ចំពោះការចូលរួមគាំទ្រ និងផ្ដល់កិច្ចសហការពីថ្នាក់ដឹកនាំគ្រប់ក្រសួង ស្ថាប័នពាក់ព័ន្ធ និងក្រុមការងារបច្ចេកទេសអគ្គលេខាធិការដ្ឋាន គ.ស.ហ. ដែលបានខិតខំរៀបចំ និងសិក្សាលើ ស្ថានភាពទឹកស្អាត និងទឹកប្រើប្រាស់សម្រាប់វិស័យកសិកម្ម នេះឡើង ៕

អត្ថបទ៖ វណ្ណលុក
រូបភាព៖ វ៉េង លីមហួត