មន្ត្រីព្រឹទ្ធសភា៖ នយោបាយការទូតសភា បានរួមចំណែកជួយពង្រឹងសន្តិភាព និងនយោបាយនៅកម្ពុជា
ភ្នំពេញ៖ព្រឹទ្ធសភា នីតិកាលទី៥ ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រធានបានប្រកាសនៅ ក្នុងកិច្ចប្រជុំដំបូងនៃអាណត្តិថ្មីរបស់ព្រឹទ្ធសភា អំពីការធ្វើនយោបាយការទូតសភា ដែលជាកិច្ចការងារមួយដ៏សំខាន់ក្នុងការចូលរួមចំណែកធានានិរន្តរភាពសុខសន្តិភាព និងនយោបាយនៅក្នុងប្រទេសកម្ពុជា ព្រមទាំងការចងភ្ជាប់ ចំណងទាក់ទងកម្ពុជា ជាមួយប្រទេសជាមិត្ត កាន់តែរឹងមាំឡើងបន្ថែមទៀត ។
នេះជាការគូសបញ្ជាក់របស់ឯកឧត្តមបណ្ឌិត ចែម វីឌ្យ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាននៃព្រឹទ្ធសភា(គណៈកម្មការទី៥)ក្នុងឱកាសអញ្ជើញចូលរួមជាវាគ្មិនក្នុងវេទិកាពិភាក្សាលើប្រធានបទ «នយោបាយការទូតសភា» កាលពីព្រឹកថ្ងៃទី១៩ ខែមិថុនា ឆ្នាំ២០២៥ នៅវិមានព្រឹទ្ធសភា រាជធានីភ្នំពេញ ។វេទិកានេះរៀបចំដោយក្លិបអ្នកកាសែតកម្ពុជាសហការជាមួយគណៈកម្មការទី៥ នៃព្រឹទ្ធសភា។
ថ្លែងទៅកាន់អ្នកសារព័ត៌មានចូលរួមប្រមាណ៨០រូបមកពី ៦០ស្ថាប័នផ្សេងៗគ្នាឯកឧត្តមបណ្ឌិត ចែម វីឌ្យ៉ា បានគូសរំលេចថា នៅក្នុងអាណត្តិរបស់សម្ដេចតេជោ ហ៊ុន សែន ប្រធានព្រឹទ្ធសភាសម្ដេចបានកំណត់វិសាលភាពលើកិច្ចការងារចំនួនពីរសំខាន់ គឺការលើកកម្ពស់ការទូតសភា និងការប្រាស្រ័យទាក់ទងឱ្យកាន់តែជិតស្និទ្ធ ជាមួយអង្គបោះឆ្នោត ។ នយោបាយការទូតសភា បានចូលរួមចំណែកយ៉ាងសំខាន់ជួយពង្រឹងសន្តិភាព និងនយោបាយនៅក្នុងប្រទេសកម្ពុជា តាមរយៈកិច្ចការងារទូតជាមួយបណ្តាប្រទេសផ្សេងៗ ដើម្បីឱ្យរាជរដ្ឋាភិបាល អាណិត្តទី៧ នៃរដ្ឋសភាដឹកនាំប្រទេសដោយរលូន។
ប្រធានគណៈកម្មការរូបនេះបានបន្ថែមថា បច្ចុប្បន្នក្នុងឋានៈជាប្រធានព្រឹទ្ធសភា ដែលជាស្ថាប័ននីតិបញ្ញត្តិ សម្ដេចតេជោ ហ៊ុន សែន បាននិងកំពុងពង្រឹង និងពង្រីកវិសាលភាពការងារ និងតួនាទីភារកិច្ចផ្នែកអំណាចនយោបាយ របស់ព្រឹទ្ធសភាកាន់តែសកម្មខ្លាំងក្លា និងប្រសិទ្ធភាពខ្ពស់ ពិសេសគឺនយោបាយការទូតសភា ដើម្បីធ្វើទំនាក់ទំនងសភា ជាមួយបណ្ដាសភាប្រទេសជាមិត្ត ជុំវិញពិភពលោក សំដៅចងភ្ជាប់ចំណងទាក់ទងកាន់តែរឹងមាំ រវាងប្រទេសនិងប្រទេស ។
សូមជម្រាបថា ព្រឹទ្ធសភានីតិកាលទី៥ ដឹកនាំដោយសម្តេចតេជោ ហ៊ុន សែន មានសមាជិកចំនួន ៦២រូប ដោយសមាជិក ៥៨រូប ត្រូវបានជ្រើសតាំងតាមរយៈការបោះឆ្នោតអសកល ក្នុងនេះ ៥៥រូប ពីគណបក្សប្រជាជនកម្ពុជា និង ៣រូបមកពីគណបក្សឆន្ទៈខ្មែរ។ ដោយឡែកសមាជិក ២រូប ត្រូវបានជ្រើសរើសដោយព្រះមហាក្សត្រ និង ២រូបទៀត ជ្រើសរើសដោយរដ្ឋសភា ។
ព្រឹទ្ធសភា ក្រោមការដឹកនាំរបស់សម្ដេចតេជោ បានបន្តនិរន្តរភាពពង្រឹងបន្ថែមឧត្តមានុភាព និងពង្រឹងវិសាលភាពការងាររបស់ខ្លួនឱ្យកាន់តែមានប្រសិទ្ធភាពខ្ពស់ សំដៅរួមចំណែក ដល់ដំណើរការលទ្ធិប្រជាធិបតេយ្យភាវូបនីយកម្ម ការកសាង និងអភិវឌ្ឍប្រទេសជាតិស្របតាមមុខងារទាំង៣ គឺ នីតិកម្ម ,តាមដានការអនុវត្តច្បាប់ និងមុខងារតំណាង ៕
អត្ថបទ៖ វណ្ណលុក
រូបភាព៖ វ៉េង លីមហួត
