វិនិយោគិនម្នាក់៖ ចង់វិនិយោគលើវិស័យកសិកម្មជោគជ័យ ត្រូវសម្លឹងទៅទីផ្សារអន្តរជាតិ និងដាំដំណាំផ្តល់ផលរយៈពេលខ្លី
កំពង់ចាម៖អ្នកឧកញ៉ា ហេង ឡុង ប្រធានអគ្គនាយកក្រុមហ៊ុន ឡុង ស្រេង ដែលមានពិសោធន៍ក្នុងការវិនិយោគលើដំណាំកៅស៊ូ ដំណាំចេក និងទុរេន រួមនិងរោងចក្រឧហ្សាហកម្មមួយចំនួនស្ថិតនៅស្រុកស្ទឹងត្រង់ ខេត្តកំពង់ចាម បានចែករំលែកបទពិសោធន៍ទៅកាន់អ្នកចង់វិនិយោគលើវិស័យកសិកម្មថា មុនវិនិយោគ គួរតែសិក្សាឱ្យបានស៊ីជម្រៅ ហើយត្រូវសម្លឹងមើលទីផ្សារអន្តរជាតិជាមុនសិន និងដាំដំណាំណាដែលមានតម្រូវការខ្ពស់លើទីផ្សារអន្តរជាតិ ហើយ ដំណាំនោះដាំរយៈពេលខ្លីទទួលបានផលត្រឡប់មកវិញឆាប់។
ប្រាប់ក្រុមអ្នកកាសែតដែលរៀបចំដោយក្លិបអ្នកាសែតកម្ពុជាកាលពីចុងសប្ដាហ៍នេះអ្នកឧកញ៉ា បានអធិប្បាយលើចំណុចដែលលោកបានចែករំលែកខាងលើថា ការដាំដំណាំដែលហុចផលត្រឡប់មកវិញលឿន គឺជាផលល្អវិជ្ជមានសម្រាប់អ្នកវិនិយោគដំណាំកសិកម្ម ។មានន័យថា យើងអាចប្រមូលទុនត្រឡប់មកវិញជាបណ្តើរៗ ។ជួយមិនឱ្យយើងកប់ដើម។
អ្នកឧកញ៉ាមានបទពិសោធន៍ជាង២០ឆ្នាំវិនិយោគលើវិស័យកសិកម្មរូបនេះ បានពន្យល់ទៀតថា ដំណាំកសិកម្មគឺជាកាំបិតមុខពីរប្រសិនបើខ្វះបច្ចេកទេស និងមិនមានទីផ្សារច្បាស់លាស់និងធ្វើឱ្យអ្នកវិនិយោគលើការដាំដុះកសិកម្មមិនជោគជ័យ និងក្ស័យធន។
ទោះជាដូចនេះក្តី អ្នកឧកញ៉ាក៏បានអំពាវនាវដល់អ្នកមានលុយនៅកម្ពុជាងាកសម្លឹងមកវិនិយោគលើដំណាំកសិកម្ម ដើម្បីជួយលើកកម្ពស់សេដ្ឋកិច្ចប្រទេស ព្រោះបច្ចុប្បន្នការវិនិយោគលើវិស័យកសិកម្មមានឱកាសចំណេញខ្ពស់ ដោយសារតែដីមានច្រើន និងមានតម្លៃទាបនៅឡើយ។ការជ្រើសរើសមកវិនិយោគលើវិស័យកសិកម្ម គឺជួយផ្តល់ឱកាសការងារជូនប្រជាពលរដ្ឋនៅក្នុងមូលរដ្ឋាន និងក្នុងស្រុក។ ជួយកាត់បន្ថយការធ្វើចំណាកស្រុករបស់ប្រជាពលរដ្ឋខ្មែរទៅធ្វើការក្រៅប្រទេស។
សូមជម្រាបថា អ្នកឧកញ៉ា ហេង ឡុង ប្រធានអគ្គនាយក ក្រុមហ៊ុន ឡុង ស្រេង បាននិងកំពុងគ្រប់គ្រងលើក្រុមហ៊ុនជាច្រើន ក្នុងស្រុកស្ទឹងត្រង់ ខេត្តកំពង់ ចាម ក្នុងនេះមានរោងចក្រផលិតកៅស៊ូក្រែប រោងចក្រផលិតក្រដាសវេចខ្ចប់ រោងចក្រផលិតជីធម្មជាតិ និងជាម្ចាស់ចម្ការដំណាំសក្កានុពលជាច្រើនមានដូចជា ទុរេន ចេក ម្នាស់ និងមង្ឃុតជាដើម លើផ្ទៃដីជិតមួយម៉ឺនហិកតា និងបង្កើតការងារជូនប្រជាពលរដ្ឋជាង៦ ០០០នាក់ ៕
រូបភាព ជីម ភារ៉ា អត្ថបទ៖ ជាវ ចន្ធូ
