(ភ្នំពេញ)៖ ក្នុងឱកាសប្រារព្វខួបលើកទី១៣១នៃទិវាអូឡាំពិក (Olympic Day) ឆ្នាំ២០២៥ នៅពហុកីឡដ្ឋានជាតិមរតកតេជោ កាលពីថ្ងៃទី២២ ខែមិថុនា ឆ្នាំ២០២៥ ឯកឧត្តមបណ្ឌិត ថោង ខុន ទេសរដ្ឋមន្រ្តីទទួលបន្ទុកជំរុញការអភិវឌ្ឍ​ចលនាកីឡា និងជាប្រធានគណៈកម្មាធិការជាតិអូឡាំពិកកម្ពុជា បានលើកឡើងថា យោងតាមរបាយការណ៍ស្រាវជ្រាវរបស់អង្គការ WHO បានបង្ហាញថា មនុស្សពេញ​វ័យ ១ នាក់ក្នុងចំណោម ៤ នាក់ និង ៨០% នៃយុវជនមិនបានធ្វើលំហាត់ប្រាណ ឬលេងកីឡាឱ្យបានគ្រប់គ្រាន់តាមកម្រិតអប្បបរមា ដែលត្រូវការសម្រាប់ទទួល​បាន​សុខភាពល្អនោះទេ។ បញ្ហាអសកម្មជាសកលនៃការធ្វើលំហាត់ប្រាណ និងកីឡា​លេង​កីឡារបស់កុមារ យុវជន និងមនុស្សពេញវ័យគឺជាក្តីបារម្ភមួយសម្រាប់ពិភព​លោកទាំងមូលលើបញ្ហាសុខភាព។ដូច្នោះហើយ ទើបគណៈកម្មាធិការអូឡាំពិក​អន្តរជាតិ បានយកឱកាសនៃវេទិកាប្រារព្វពិធីអបអរសាទរខួបលើកទី១៣១ នៃ​ទិវាអូឡាំពិក ឆ្នំា២០២៥ នៅទូទាំងពិភពលោកនេះ ដើម្បីគាំទ្រដល់បេសកកម្ម​របស់​អង្គការ WHO ក្នុងការបំផុសស្មារតី ហាត់ប្រាណ ឬលេងកីឡាយ៉ាងតិច ១ម៉ោង ក្នុង ១ថ្ងៃ សម្រាប់កុមារ និងយុវជន និង៤៥នាទី ក្នុង ១ថ្ងៃ សម្រាប់មនុស្សពេញវ័យ នៅទូទាំងពិភពលោកឱ្យមានទម្លាប់ហាត់ប្រាណ និងលេងកីឡាជាប្រចាំ ដើម្បីលើក​កម្ពស់សុខុមាលភាព។

ប្រធាន NOCC គូសបញ្ជាក់ថា ពិធីអបអរសាទរខួបលើកទី១៣១ នៃទិវាអូឡាំពិក ឆ្នំា២០២៥ នេះរៀបចំឡើងក្រោមមូលបទ «ធ្វើចលនាទាំងអស់គ្នា-Let’s Move» ជាមួយយុទ្ធនាការជាតិ យុវជនម្នាក់ ចេះកីឡាមួយប្រភេទយ៉ាងតិចប្រចាំជីវិត ដែលបានដាក់ចេញនៅក្នុងយុទ្ធបញ្ចកោណដំណាក់ទី១របស់រាជរដ្ឋាភិបាល នីតិ​កាលទី៧ នៃរដ្ឋសភាព ក្រោមការដឹកនាំដ៏ត្រឹមត្រូវ និងឈ្លាសវៃ ប្រកបដោយ​ថាមពលរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ចលនាអូឡាំពិក គឺជាចលនាកីឡាទូទាំងពិភពលោក ក្នុងទិសដៅរួមចំណែក​កសាងពិភពលោកប្រកបដោយសន្តិភាព និងកាន់តែស្រស់បំព្រង តាមរយៈកីឡា​ស្របតាមទស្សនវិជ្ជាអូឡាំពិក ។ ជាមួយគុណតម្លៃស្នូលទាំង ៣ រួមមាន៖ ឧត្តមភាព ការគោរព និងមិត្តភាព ។

ស្របជាមួយនឹងការលើកកម្ពស់ចលនាអូឡាំពិក គណៈកម្មាធិការអូឡាំពិកអន្តរជាតិ (IOC) តែងរៀបចំការប្រកួតកីឡាអូឡាំពិករៀងរាល់ ៤ឆ្នាំម្តង ដែលជាឱកាស​ក្នុងការ​នាំមនុស្សគ្រប់ជាតិសាសន៍មកពីជុំវិញពិភពលោក មកជួបជុំរួមរស់ជាមួយគ្នា​ប្រកប​ដោយ​សន្តិភាព និងសាមគ្គីភាព ដែលបង្ហាញយ៉ាងច្បាស់ពីចក្ខុវិស័យ​របស់ចលនា​អូឡាំពិក ក្នុងការកសាងពិភពលោកប្រកបដោយសន្តិភាព និងកាន់តែស្រស់បំព្រង។ សម្រាប់ការប្រារព្វខួបលើកទី១៣១ នៃទិវាអូឡាំពិក ឆ្នំា២០២៥ នាពេលនេះ ក៏មាន​​ការចូលរួមពីអត្តពលិកអូឡាំពិក (Olympian) មួយចំនួនផងដែរ ដែលសិស្សា​នុសិស្ស និងអត្តពលិកទាំងអស់ទើបតែបានស្តាប់នូវការចែករំលែកអំពីឧត្តមានុវត្ត និងបទពិសោធន៍ល្អៗនូវការបំផុសស្មារតី និងការចងចាំ ដែលមិនអាចបំភ្លេចបាន​របស់អត្តពលិកអូឡាំពិកក្នុងការចូលរួមការប្រកួតកីឡាអូឡាំពិកនៅក្នុងកម្មវិធី វេទិកាអត្តពលិកជាតិ ដែលបានធ្វើឡើងក្នុងថ្ងៃជាមួយគ្នានេះ។

ឯកឧត្តមបណ្ឌិត ថោង ខុន ក៏បានអំពាវនាវឱ្យយុវជន សិស្សានុសិស្ស និងអត្តពលិក ទាំងអស់ចូលរួមអនុវត្ត និងផ្សព្វផ្សាយយុទ្ធនាការជាតិ «យុវជនម្នាក់ចេះកីឡា មួយ​ប្រភេទយ៉ាងតិចប្រចាំជីវិត» ជាមួយនឹងការបំផុសចលនា «ហាត់ប្រាណ និងលេង​កីឡា​អស់មួយជីវិត» ដើម្បីទទួលបាន សុខភាពល្អទាំងសុខភាព រាងកាយ ស្មារតី និង​បញ្ញាញាណ ក្នុងគោលដៅ អភិវឌ្ឍមូលធនមនុស្ស ប្រកបដោយ គុណភាពខ្ពស់ និង​សុខភាព ដែលជាលក្ខខណ្ឌចាំបាច់មិនអាចខ្វះបានសម្រាប់អភិវឌ្ឍសេដ្ឋកិច្ច និង​សង្គម​ជាតិ ប្រកបដោយបរិយាបន្ន និងភាពធន ក៏ដូចជាបង្កើតមូលដ្ឋាន​អត្ត​ព​លិក យុវជនថ្នាលប្រកបដោយគុណវុឌ្ឍិ ដើម្បីឈានឆ្ពោះទៅធ្វើជាម្ចាស់ផ្ទះ ការប្រកួ​ត​កី​ឡាយុវជនអាស៊ី និងកីឡាយុវជនអាស៊ីប៉ារ៉ាហ្គេម ឆ្នាំ២០២៩ នៅកម្ពុជា៕

រូបភាពហ្វិកប្រភព NOCC
អត្ថបទ ៖ ជាវ ចន្ធូ