(កំពង់ស្ពឺ)៖ ព្រឹត្តិការណ៍ប្រណាំងកង់ភ្នំ KAMPONG SPEU MTB CHELLENGE 2025 ដែលដំណើរការប្រកួតប្រជែង លើទឹកដីខេត្ត កំពង់ រយៈពេលចំនួន ២ថ្ងៃ បាន​បញ្ចប់ទៅដោយរលូន និងជោគជ័យ ដោយអ្នករៀបចំព្រឹត្តិការណ៍ អះអាងថា នឹងបន្ថែម វិញ្ញាសាថ្មីXCM Mountain Bike Marathon ចម្ងាយ៤៣.៥គីឡូម៉ែត្រ សម្រាប់កូនក្មេងមួយទៀត នៅក្នុងព្រឹត្តិការណ៍ការប្រណាំងបន្ទាប់ទៀត។

លោក ការី ផ្ជែ អ៊ីសប៉ាទ្រីស អ្នករៀបចំព្រឹត្តិការណ៍ប្រណាំងកង់ភ្នំ KAMPONG SPEU MTB CHELLENGE 2025 និងជាអគ្គលេខាធិការរងសហព័ន្ធខ្មែរ​កីឡា​ទោចក្រយាន បានបញ្ជាក់បន្ថែមទៀតថា សម្រាប់ការប្រណាំងថ្ងៃទី១ វិញ្ញាសាថ្មី XCM Mountain Bike Marathon ចម្ងាយ៤៣.៥គីឡូម៉ែត្រ គឺមានចំនួនកីឡាករ​កីឡាការិនីចូលរួមមានរហូតទៅដល់៦០នាក់ ហើយ អ្នកជិះដល់បញ្ចប់ទីមាន​រហូត​ដល់ ៩៥% ដែលកក្តាវិជ្ជមានទាំងនេះ ជំរុញលើកទឹកចិត្តនិងបន្ថែមសម្រាប់ពូល​កូនក្មេងមួយទៀត ក្នុងការប្រណាំងលើកក្រោយ។

អ្នករៀបចំព្រឹត្តិការណ៍រូបនេះ ក៏បានគូសបញ្ជាក់បន្ថែមថា សម្រាប់ការប្រណាំង​ថ្ងៃ​ទី២ វិញ្ញាសាប្រណាំងXCO MOUNTAIN BIKE CROSS COUNTRY OLYMPIC ការចូលរួមពីសំណាក់កីឡាករកីឡាការិនីក្នុងស្រុកក៏មានការកើនឡើងខ្លាំង និង​មាន​ការប្រកួតប្រជែងសមត្ថភាពកាន់តែខ្ពស់ គឺកីឡាករអាយុចន្លោះពី ១៥ឆ្នាំ​ដល់ជាង ២០ឆ្នាំ។

ដោយឡែកកីឡាករ សុខ ប៊ុនហុក មកពីក្លឹបកង់ សាគីសាយឃ្លីន បានលើកឡើងថា សម្រាប់វិញ្ញាសាប្រណាំងដែលគេចូលរួមប្រជែងនេះ សង្កេតឃើញថា កីឡាករ​យុវជន​​ដែលចូលរួមមានសមត្ថភាពខ្លាំង ធ្វើការប្រកួតប្រជែងមានកាន់តែខ្ពស់ ។ សម្រាប់ការរៀបចំវិញ មានលក្ខណៈស្តង់ដារ ពិសេស គឺផ្លូវប្រណាំង។ ទន្ទឹមជា​មួយ​គ្នានេះ កីឡាកររូបនេះ ក៏បានសូមពរដល់អ្នករៀបចំព្រឹត្តិការណ៍ បង្កើតព្រឹត្តិការណ៍​ប្រណាំងឱ្យបានច្រើនបន្ថែមទៀត ។ជាការផ្តល់ឱកាសឱ្យកីឡាករជម្រើសជាតិ​កង់ភ្នំ​បានប្រណាំងជាការដុះខាត់សមត្ថភាពត្រៀមសម្រាប់ស៊ីហ្គេម នៅប្រទេសថៃ នាអំឡុង​ខែធ្នូ ឆ្នាំ២០២៥ ខាងមុខនេះផងដែរ។

តាមគម្រោង លោក ការី ផ្ជែ អ៊ីសប៉ាទ្រីស អ្នករៀបចំព្រឹត្តិការណ៍ប្រណាំង បាន​បង្ហើប​ថា នៅចុងឆ្នាំ២០២៥នេះ ចន្លោះចុងខែតុលាដល់ដើមខែធ្នូ នឹងរៀបចំព្រឹត្តិការណ៍​ប្រ​ណាំងចំនួនពីរទៀត នៅលើទឹកដីខេត្ត កំពង់ស្ពឺដដែល គឺស្ថិតក្នុងឃុំ ក្រាំងអំពិល និង​នៅលើភ្នំគិរីរម្យ ។ហើយព្រឹត្តិការណ៍ពីរខាងលើនេះក៏បន្ថែមវិញ្ញាសា XCE ដែលជា​វិញ្ញា​​កង់​ភ្នំ​មានរយៈចម្ងាយខ្លី ដែលមាននៅក្នុងការប្រណាំងនៅស៊ីហ្គេមនៅថៃផងដែរ ៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ