(ភ្នំពេញ)៖ ថ្លែងនៅក្នុងសន្និបាទសារព័ត៌មាន ទិវារត់ប្រណាំងម៉ារ៉ាតុងអន្តរជាតិ​ចក្រភព​អង្គរ ឆ្នាំ២០២៥ នៅអាគារគណៈកម្មាធិការជាតិអូឡាំពិកកម្ពុជា កាល​ពីរសៀលថ្ងៃទី២៣ ខែ មិថុនា ឆ្នាំ២០២៥។ ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំយុវជននិងកីឡា និង ជាអគ្គលេខាធិការ គណៈកម្មាធិការជាតិអូឡាំ​ពិកកម្ពុជា បានថ្លែងរំលេចថា ជាការកត់សម្គាល់ ទិវារត់ប្រណាំងម៉ារ៉ាតុងអន្តរជាតិ​ចក្រភពអង្គរ ឆ្នាំ២០២៥នេះ វិញ្ញាសា full marathon៤២គីឡូម៉ែត្រ ដែលភាគ​ច្រើនមានតែជនបរទេសចូលរួមច្រើនជាងគេនោះ តែឥលូវបែជាមានអ្នក​រត់នៅក្នុង​ស្រុកដែលជាអត្តពលិកខ្មែរចូលរួមក្នុងវិញ្ញសានេះជាច្រើនផងដែរ។

ឯកឧត្តម វ៉ាត់ ចំរើនថា វត្តមានដ៏ច្រើនពីអ្នកនិយមកីឡារត់ ជនជាតិខ្មែរលើវិញ្ញាសា full marathon បែបនេះបានបង្ហាញពីសុខភាពបេះដូងដ៏ល្អ របស់ប្រជាពលរដ្ឋ ក៏ដូចជាចំណង់ចំណូលចិត្តកាន់តែកើនឡើងលើការរត់ផ្លូវឆ្ងាយ។ សម្រាប់​ចំនួន​អ្នក​ចុះឈ្មោះចូលរួមគិតដល់ថ្ងៃប្រកាសនេះ មានប្រមាណ ៣០០០នាក់ហើយ ចំនួន​នេះ គណៈកម្មការរៀបចំ រំពឹងអាចឈានដល់ទៅ ៥០០០នាក់ ខណៈកាលពី​ឆ្នាំ២០២៤ យើងទទួលបានមអ្នកចូលរួម ២៨០០នាក់ប៉ុណ្ណោះ។ សម្រាប់ជន​បរទេសដែលកំពង់ចុះឈ្មោះច្រើនជាងគេ គឺជនជាតិចិន និងបន្តបន្ទាប់មាន​ជន​ជាតិជប៉ុន ម៉ាឡេស៊ី ចិនតៃប៉ិ និង ចក្រភពអង់គ្លេស។

មូលហេតុមានជនជាតិចិនចុះឈ្មោះច្រើនជាងគេនោះ ឯកឧត្ដម វ៉ាត់ ចំរើន បញ្ជាក់ថា ដោយសារមានការចុះអនុស្សារណៈយោគយល់រវាង គណៈកម្មការរៀបចំម៉ារ៉ាតុង​កម្ពុជា និង ខេត្តយូណាន ទើបមានការសម្រួលឱ្យចូលរួម។ ឯកឧត្ដមសង្ឃឹម​យ៉ាង​មុតមាំថា តាមរយៈកិច្ចសហការនេះជាមួយភាគីចិន ប៉ុន្មានឆ្នាំទៀត នឹងអាចស្រូប​ទាញបានអ្នករត់ជនជាតិចិនយ៉ាងហោចណាស់៥០០០នាក់ ចូលរួមទិវារត់ប្រណាំង​ម៉ារ៉ាតុងអន្តរជាតិចក្រភពអង្គ។

ជុំវិញគោលបំណងសំខាន់ នៃ ការរៀបចំទិវារត់ប្រណាំងម៉ារ៉ាតុងអន្តរជាតិ​ចក្រភព​អង្គរ គឺជួយជំរុញសន្ទ្សន៍ទេសចរណ៍អំឡុង រដូវវស្សា ឬ Green Season ដែលមិន​សូវសម្បូរភ្ញៀវទេសចរ។ ដូច្នេះគណៈកម្មការរៀបចំសង្ឃឹមថា ប្រសិនបើទទួលបាន​អ្នកចូលរួមរត់ដល់ទៅខ្ទង់ ៤០០០ទៅ ៥០០០នាក់ដូចការរំពឹងមែននោះ នឹងអាច​ជួយបានច្រើនដល់ ទេសចរណ៍ ក្នុងខេត្តសៀមរាប។ មិនតែប៉ុណ្ណោះ ព្រឹត្តិការណ៍នេះ​ក៏ជួយជាសកម្មភាព សប្បុរសធម៌ ជួយដល់ មន្ទីរពេទ្យនានាផងដែរ។

ដោយឡែក លោក សែម ផល្លា នាយកបច្ចេកទេសគណៈកម្មការម៉ារ៉ាតុង បានទទូច​អំពាវ​នាវដល់អ្នកមានបំណងចង់ចូលរួម រួសរាន់ធ្វើការចុះឈ្មោះឲ្យបានទាន់​ពេល​វេ​លា ដើម្បីងាយស្រួលគណៈកម្មការរៀបចំសម្ភារៈជូន ពិសេសគឺការចូលរួមឲ្យបាន​ច្រើនកុះករ ដើម្បីផ្សព្វផ្សាយពីព្រឹត្តិការណ៍ម៉ារ៉ាតុងតែមួយគត់នៅកម្ពុជានេះ​លើឆាក​អន្ដរជាតិ ក្នុងនាមសមាជិកគណៈកម្មាធិការម៉ារ៉ាតុងអន្ដរជាតិមួយ ក្នុងចំណោម​សមា​ជិកទាំង ១១២ប្រទេសលើពិភពលោក។ សូមបញ្ជាក់ថា ទិវារត់ប្រណាំង​ម៉ារ៉ាតុង​ចក្រភព​អង្គរ លើកទី១០នេះ គឺមាន ៤វិញ្ញាសា ក្នុងនោះ មានរត់ចម្ងាយ ៤២គីឡូ​ម៉ែត្រ, ២១គីឡូម៉ែត្រ, ១០គីឡូម៉ែត្រ និងរត់កម្សាន្ដលក្ខណៈគ្រួសារ ៣គីឡូម៉ែត្រ៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ