ព្រះវិហារ៖សម្តេចអគ្គមហាសេនាបតីតេជោ នាយឧត្តមសេនីយ៍​ផុតលេខផ្កាយមាស៥ ហ៊ុន សែន បានថ្លែងថា បច្ចុប្បន្ន មិន​ដឹង​ថា អំណាចពិតប្រាកដរបស់ថៃ គឺជាអ្នកណានោះទេ ដែលធ្វើឱ្យ​ពិបាកក្នុងការដោះស្រាយបញ្ហាជាមួយកម្ពុជា ។ សម្ដេចសង្ឃឹមថា ប្រទេសថៃ នឹងមាននាយករដ្ឋមន្ត្រីថ្មី នាពេលឆាប់ៗខាងមុខ ដើម្បីដោះស្រាយបញ្ហាជាមួយកម្ពុជា ។

សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានថ្លែងដូច្នេះ ក្នុងឱកាសអញ្ជើញជួបសំណេះសំណាលសួរសុខទុក្ខ​ជនភៀស​ខ្លួននៅទីទួលសុវត្ថិភាពវត្តពោធិ ៥០០០ដើមខេត្តព្រះវិហារនា​ល្ងាច​ថ្ងៃទី២៦ ខែមិថុនា ឆ្នាំ២០២៥ ។

សម្ដេចតេជោ ហ៊ុន សែន បានគូសរំលេចថា ជំនាន់នាយក​រដ្ឋមន្ដ្រី​ថៃ ប្រាយុទ្ធ ចាន់អូចារ រយៈពេលជាង ១០ឆ្នាំ មិនមាន​បញ្ហា គឺកម្ពុជា-ថៃ បានឈានទៅភ្ជាប់ទំនាក់ទំនងខ្ពស់បំផុត ប៉ុន្តែឥឡូវនេះប្រទេសថៃ មានបញ្ហាជាមួយប្រទេសទាំងអស់​ជុំវិញ​ខ្លួន ខណៈដែលព្រំដែនកម្ពុជាត្រូវបានបិទក្រោយគេនោះទេ ។

ត្រង់ចំណុចនេះ សម្ដេចតេជោ សង្ឃឹមថា នឹងមាននាយក​រដ្ឋមន្ត្រី​ថ្មីមួយ ឡើងមកកែសម្រួល ហើយយើង នឹងត្រៀមខ្លួនធ្វើ​ការជា​មួយនឹងនាយករដ្ឋមន្ត្រី ក្រោយទៀត ។
សម្ដេចតេជោ ហ៊ុន សែន បញ្ជាក់ថា “យើងមិនជ្រៀតជ្រែកចូល​កិច្ចការផ្ទៃក្នុងថៃ នោះទេ ក៏ប៉ុន្តែខ្ញុំដឹងថា តម្រូវការរបស់​ប្រជាជន​ថៃ នៅពេលនេះ ក៏ត្រូវការមានមេដឹកនាំថ្មីដែរ” ។

សម្ដេចតេជោ​បន្តថា “តាមការសង្កេតរបស់ខ្ញុំយ៉ាងយូរ ៣ខែទៀត នឹងមាននាយករដ្ឋមន្ត្រីថ្មី ឡើងមកកាន់តំណែង ។ឥឡូវ​ចាំមើល​ទៅ បើខ្ញុំទាយខុស ទុកចោលទៅចុះ ចាត់ទុកថា ខ្ញុំខុស ។ប៉ុន្តែ​ប្រហែលជាមិនខុសទេ ។ តុលាការធម្មនុញ្ញ ឬក៏​ក្នុងសភារបស់ថៃ គេមិនអនុញ្ញាតឱ្យមនុស្សបែបនេះ ដឹកនាំប្រទេសទេ ហើយក៏មិន​ដឹង​ថា តើនាយករដ្ឋមន្ត្រី មានអំណាច ឬក៏កងទ័ពមានអំណាច ហើយយើងគោរពការសម្រេចចិត្តរបស់ប្រជាជនថៃ ។

សូមជម្រាបថា ក្រោយព្រឹត្តិការណ៍ថ្ងៃទី២៨ ខែឧសភា ឆ្នាំ២០២៥ ជម្លោះព្រំដែនកម្ពុជា-ថៃ​នៅមិនទាន់ត្រឡប់ មកសភាព​ប្រក្រតី​បាននៅឡើយ ដ្បិតកងទ័ពថៃ នៅតែសម្រេចចិត្តជាឯកតោភាគី ក្នុងការដាក់សម្ពាធ មកលើកម្ពុជា រួមទាំងការគំរាម​ផ្ដាច់អ៊ីនធឺ​ណិត អគ្គិសនី ទំនិញ ការកែសម្រួលម៉ោងចេញចូល នៅតាម​បណ្ដោយព្រំដែន និងការបិទច្រកព្រំដែនជាដើម ៕
ដោយ៖វណ្ណលុក