បរទេស ៖ កាលពីថ្ងៃអាទិត្យ យោធាអ៊ីស្រាអែល បានព្រមានឲ្យប្រជាពលរដ្ឋ ហ្គាហ្សា ភាគខាងជើង ជម្លៀសខ្លួន ស្របពេលដែលសង្គ្រាម បានអូសបន្លាយ អស់រយៈពេលជាង ២០ខែមកហើយ រវាងអ៊ីស្រាអែល និងពួកហាម៉ាស។

អ្នកនាំពាក្យយោធា អ៊ីស្រាអែល លោក Avichay Adraee បាននិយាយ នៅក្នុងសេចក្តីថ្លែងការណ៍មួយ ប្រាប់អ្នកស្រុកឱ្យ ជម្លៀសចេញភ្លាមៗ ទៅកាន់តំបន់ Al-Mawasi ដើម្បីសុវត្ថិភាព។ លោកថា កងកម្លាំងអ៊ីស្រាអែល “នឹងធ្វើប្រតិបត្តិការជាមួយកម្លាំងខ្លាំង នៅក្នុងតំបន់ទាំងនេះ ហើយប្រតិបត្តិការយោធាទាំងនេះ នឹងកាន់តែខ្លាំង និងពង្រីក… ដើម្បីបំផ្លាញសមត្ថភាព របស់អង្គការភេរវករ”។

ដោយមានកាន់ពូក និងកាបូប របស់របរ នានា ប្រជាពលរដ្ឋហ្គាហ្សាបានភៀសខ្លួនពីសង្កាត់ Al-Tuffah និង Al-Daraj តាមការបញ្ជាឱ្យជម្លៀស របស់កងទ័ពអ៊ីស្រាអែល។

អ្នកស្រុក ឈ្មោះ Mervat Fasfous និយាយថា «យើងរៀបចំសំលៀកបំពាក់ អាហារ និងតង់ របស់យើង ហើយរត់ចោលផ្ទះ សម្បែង យើងមិនដឹងថា ត្រូវទៅទីណា ហើយយើងមានព្រះតែមួយ»៕

ប្រភពពី AFP ប្រែសម្រួល៖ សារ៉ាត