បើកវគ្គបណ្តុះបណ្តាលលើកកម្ពស់អក្ខរកម្មហិរញ្ញវត្ថុ និងទីផ្សារឌីជីថលសម្រាប់សេដ្ឋកិច្ចក្រៅប្រព័ន្ធ
កំពង់ធំ៖មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកំពង់ធំ បានបើកវគ្គបណ្តុះបណ្តាលអំពីអក្ខរកម្មហិរញ្ញវត្ថុ និងជំរុញការលក់តាមទីផ្សារឌីជីថលសម្រាប់សេដ្ឋកិច្ចក្រៅប្រព័ន្ធ នៅសណ្ឋាគារកំពង់ធំ រ៉ូយ៉ាល់កាលពីព្រឹកថ្ងៃទី១ ខែកក្កដា ឆ្នាំ ២០២៥។
វគ្គនេះមានគោលបំណងបង្កើនការយល់ដឹង និងសមត្ថភាពរបស់អ្នកចូលរួមក្នុងវិស័យសេដ្ឋកិច្ចក្រៅប្រព័ន្ធដើម្បីជួយពង្រឹងសមត្ថភាពរបស់អាជីវកម្មឯករាជ្យក្នុងសហគមន៍។
នេះជាលទ្ធផលគឺជាកិច្ចសហការរវាងមន្ទីរ S&T ក្រុមហ៊ុន Grow4Growth (G4G) និងមូលនិធិអភិវឌ្ឍន៍ (SDF)ដោយមានសិក្ខាកាមជាង ១០០នាក់ចូលរួម ក្នុងនេះជាថ្នាក់ដឹកនាំមន្ទីរចំនួនប្រាំ មន្រ្តីរដ្ឋបាលស្រុកស្ទោង ។
លោកស្រី គីម តុលតាន់ ស្ថាបនិក G4G បាននិយាយថា អាជីវកម្មក្រៅប្រព័ន្ធភាគច្រើននៅកម្ពុជា មិនទាន់បានចុះបញ្ជីជាមួយអាជ្ញាធរដែលពាក់ព័ន្ធ។ ដូច្នេះអាជីវកម្មទាំងនោះតែងតែប្រឈមនឹងការខ្វះការការពារផ្លូវច្បាប់ ការចូលរួមក្នុងប្រព័ន្ធសង្គមសន្តិសុខ និងមិនអាចប្រើប្រាស់សេវាហិរញ្ញវត្ថុផ្លូវការ។ដូច្នេះ ការផ្តល់ចំណេះដឹង និងជំនាញជាក់លាក់គឺជាផ្នែកសំខាន់ក្នុងការជំរុញឱ្យពួកគេប្តូរទិសដៅទៅរកភាពច្បាស់លាស់និងរឹងមាំក្នុងអាជីវកម្ម។
លោក ប្លោក ចន្ទរដ្ឋា ប្រធានមន្ទីរឧស្សាហកម្មខេត្តកំពង់ធំ បានបញ្ជាក់ថា មន្ទីរតែងតែសហការជាមួយដៃគូអភិវឌ្ឍន៍ ដើម្បីលើកស្ទួយវិស័យសេដ្ឋកិច្ចក្រៅប្រព័ន្ធ និងជំរុញឱ្យអាជីវកម្មដើរតាមផ្លូវច្បាប់លោកបន្តថា កន្លងមក មន្ទីរបានធ្វើការសិក្សាបញ្ហាប្រឈម ផ្សព្វផ្សាយ ចងក្រងស្ថិតិ និងចែករំលែកព័ត៌មានពាក់ព័ន្ធ ដោយសហការជាទៀងទាត់ជាមួយក្រសួង អាជ្ញាធរមូលដ្ឋាន និងអង្គភាពពាក់ព័ន្ធផ្សេងទៀត។
ចំណែកលោក គី សុខគីម នាយកប្រតិបត្តិ SDF បានបញ្ជាក់ថា វគ្គបណ្តុះបណ្តាលនេះជាផ្នែកមួយនៃការអនុវត្តយុទ្ធសាស្ត្រជាតិ ២០២៣–២០២៨ ស្តីពីសេដ្ឋកិច្ចក្រៅប្រព័ន្ធ។លោកបន្ថែមថា តាមរយៈវគ្គនេះ នឹងជំរុញឱ្យអាជីវកម្មឯករាជ្យនៅមូលដ្ឋានអាចសម្រេចបាននូវការរីកចម្រើនដ៏ចីរភាព និងរួមចំណែកក្នុងសេដ្ឋកិច្ចជាតិបានយ៉ាងសកម្ម៕
ដោយ៖ប៊ុន រដ្ឋា
