ក្រុមហ៊ុនចំនួន៦ ផ្តល់ឱកាសការងារជិតមួយម៉ឺនកន្លែងសម្រាប់ប្រជាពលរដ្ឋខេត្តកំពង់ចាម និងពលករទើបត្រឡប់មកពីប្រទេសថៃ
កំពង់ចាម៖ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក គន់ សុភា អភិបាលរងខេត្តកំពង់ចាមកាលពីព្រឹកថ្ងៃទី៧ ខែកក្កដា ឆ្នាំ២០២៥ បានអញ្ជើញបើក «វេទិកាការងារ» របស់ទីភ្នាក់ងារជាតិមុខរបរនិងការងារ (NEA)នៅស្រុកកំពង់សៀម ខេត្តកំពង់ចាម ដើម្បីផ្តល់ឱកាសការងារជូនប្រជាពលរដ្ឋ ជាពិសេសពលករខ្មែរដែលទើបត្រឡប់មកពីប្រទេសថៃឱ្យទទួលបានការងារភ្លាមៗពីក្រុមហ៊ុនធំៗចំនួន៦ ដែលមានតម្រូវការកម្លាំងពលកម្មប្រមាណជិតមួយម៉ឺនកន្លែង។
អនុវត្តប្រសាសន៍ណែនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាឱ្យក្រសួងការងារ ស្វែងរកការងារ ជូនប្រជាពលរដ្ឋខ្មែរដែលទើបវិលត្រលប់ពីប្រទេសថៃនោះ ឯកឧត្តម ហេង សួរ បាននាំយកក្រុមហ៊ុនធំៗចំនួន៦ មកដាក់ទីតាំងនៅស្រុកកំពង់សៀម ខេត្តកំពង់ចាម ដើម្បីឱ្យពលករខ្មែរដែលទើបត្រឡប់មកពីប្រទេសថៃ បានសម្ភាសន៍ផ្ទាល់ជាមួយក្រុមហ៊ុន ។ក្រុមហ៊ុនធំៗទាំងនោះដូចជា តំបន់សេដ្ឋកិច្ចពិសេស ជាំងស៊ូ នៅស្រុកជើងព្រៃជាដើម ។
ឯកឧត្តម ហេង សួរ រដ្ឋមន្រ្តីក្រសួងការងារបានបញ្ជាក់ថា បច្ចុប្បន្នកម្ពុជាមានការងារសម្បូរបែបរាប់ម៉ឺនកន្លែង ។កម្ពុជាមិនខ្វះការងារសម្រាប់បងប្អូនត្រឡប់ពីប្រទេសថៃវិញនោះទេ។ឯកឧត្តមលើកឡើងទៀតថា ការត្រឡប់មកធ្វើការងារនៅក្នុងប្រទេសវិញ គឺជាការបង្ហាញពីមនសិការស្នេហាជាតិ ក៏ដូចជាចូលរួមលើកកម្ពស់ការងារក្នុងស្រុកកាន់តែរីកចម្រើនឆាប់រហ័សថែមទៀត៕
ដោយ៖លី ពៅ
