ពោធិសាត់៖ស្រុកកណ្តៀង ខេត្តពោធិ៍សាត់ កាលពីថ្ងៃទី១០ ខែកក្កដា ឆ្នាំ២០២៥​ត្រូវបានប្រកាសជ័យលាភី ជា​ស្រុកបញ្ចប់ការបន្ទោបង់ពាសវាលពាកាល ក្រោម​អធិបតីភាព លោក លឹម សុខតូ អភិបាលរងខេត្តតំណាងឯកឧត្តម ខូយ រីដា អភិបាលខេត្តពោធិ៍សាត់ ។

លោក ណារ៉ា ចំរើន អភិបាលស្រុកកណ្តៀងឱ្យដឹងថា ពាក់ព័ន្ធនឹងការងារវាយតម្លៃ ផ្ទៀងផ្ទាត់ការបញ្ចប់ការ​បន្ទោបង់​ពាសវាលពាសកាល រដ្ឋបាលស្រុកកណ្តៀង និងរដ្ឋបាលឃុំ បានទទួលការបណ្តុះបណ្តាលពីមន្ទីរអភិវឌ្ឍន៍ជនបទ​ខេត្ត​ពោធិ៍សាត់ ហើយបានរៀបចំបង្កើតក្រុមការងារស្រុក ក្រុមការងារឃុំ​ដើម្បីផ្ទៀងផ្ទាត់​ការបញ្ចប់​ការបន្ទោបង់ពាស​វាល​ពាសកាល។ជារួមសម្រាប់រដ្ឋបាលស្រុកកណ្តៀង គឺ ៩១ភាគរយនៃខ្នងផ្ទះមានបង្គន់អនាម័យ ។ដូច្នេះ គឺជាប់ជា​ស្រុក​ដែលបញ្ចប់ការ​បន្ទោបង់ពាសវាលពាសកាល។

 បញ្ជាក់បន្ថែមលើការងារនេះ លោក ប្លង់ បញ្ញា អនុប្រធានមន្ទីរអភិវឌ្ឍន៍ជន​បទខេត្តពោធិ៍សាត់ បានឱ្យដឹងថា មន្ទីរអភិវឌ្ឍន៍ជនបទ គឺជាសេនាធិការ​ឱ្យក្រសួងអភិវឌ្ឍន៍ជនបទ ដែលផ្តោតទៅលើការអភិវឌ្ឍផ្នែកហេដ្ឋា​រចនា​សម្ព័ន្ធរូបវ័ន្ត ផ្លូវថ្នល់ ស្ពាន លូ ប្រព័ន្ធចែកចាយទឹកខ្នាតតូច ស្រះ ទឹកសហគមន៍ អណ្តូងទឹក និងបង្គន់អនាម័យ។ ដើម្បីសម្រេចឱ្យបាននៅឆ្នាំ២០៣០ ប្រជាពលរដ្ឋនៅតាមជនបទ ត្រូវមានទឹកស្អាត និងអនាម័យ១០០ភាគរយ មន្ទីរបានសាងសង់ស្រះទឹក អណ្តូងទឹក និងបង្គន់អនាម័យជាច្រើន ក្នុងនោះក៏មានការជួយគាំទ្រ ជ្រោមជ្រែង និងចូលរួម​ចំណែក យ៉ាងសកម្មពីបណ្តាសប្បុរសជន អង្គការជាតិ អន្តរជាតិ ព្រមទាំងអ្នកពាក់​ព័ន្ធជាច្រើនទៀត។

លោកបានបញ្ជាក់ទៀតថា ខេត្តពោធិ៍សាត់ គឺជាខេត្តទី២៣ហើយ ដែលត្រៀមទទួល​ជោគជ័យ នៃការបិទបញ្ចប់​បន្ទោបង់ពាសវាលពាសកាលទូទាំងខេត្ត កម្រិត(ODF) ដែលនឹងប្រព្រឹត្តទៅ នាថ្ងៃទី២៨ ខែកក្កដា ឆ្នាំ២០២៥ខាងមុខ។

សូមជម្រាបថា កណ្តៀង គឺជាស្រុកមួយ ស្ថិតក្នុងចំណោមក្រុង ស្រុកទាំង៧ របស់ខេត្ត​ពោធិ៍សាត់ ដែលមាន​ទីតាំងនៅប៉ែកខាងជើងពីសាលាខេត្តពោធិ៍សាត់ ចម្ងាយ ៧គីឡូម៉ែត្រ។រដ្ឋបាលស្រុកស្ថិតនៅភូមិស្ថានីយ ឃុំកណ្ដៀង។ ស្រុកកណ្តៀង មានព្រំប្រទល់ខាងជើងទល់នឹងបឹង​ទន្លេសាប ខាងត្បូងទល់នឹងក្រុងពោធិ៍សាត់ ខាងកើតទល់នឹងស្រុកក្រគរ និងក្រុងពោធិ៍សាត់ ខាងលិចទល់នឹងស្រុកបាកាន និងក្រុងពោធិ៍សាត់ មានផ្ទៃដី​សរុបចំនួន ៧៣.០០០ហិកតា ក្នុងនោះ៖ ផ្ទៃដីត្រូវ​បានបែងចែកជា ៣តំបន់ គឺ ដីតំបន់១ ជាដីលំនៅឋាន និងដី​ស្រែចម្ការ មានផ្ទៃដី​សរុបចំនួន ៣៥.៩៤៦ហិកតា ដីតំបន់២ មានចំនួន ៣.៧៧៤ហិកតា និងដីតំបន់៣​ចំនួន ៣៣.២៨០ហិកតា។

 ស្រុកកណ្ដៀង ចែកចេញជា ៩ឃុំ មាន ១១២ភូមិ ក្នុងនោះ មានឃុំជាប់នឹងបឹង​ទន្លេសាបចំនួន ៤ឃុំ ដូចជា ឃុំរាំងទិល ឃុំស្រែស្តុក ឃុំស្យា ឃុំកញ្ជរ។ ប្រជាជន​សរុបចំនួន ១៩.៤២៦គ្រួសារ ក្នុងនោះគ្រួសារអចិន្រ្តៃយ៍ចំនួន ១៨.៨៨០ គ្រួសារ បណ្ដោះអាសន្នចំនួន ៥៤៦គ្រួសារ ប្រជាពលរដ្ឋសរុបចំនួន ៧២.០១៦នាក់ ស្រី ៣៧.២០៩នាក់៕
ដោយ៖ចេង ពុំ