មន្ទាយមានជ័យ៖គ្រូពេទ្យកម្ពុជានៅខេត្តព្រំដែនបានជួយសង្គ្រោះនិងព្យាបាល​អ្នកជំងឺជនជាតិថៃ ខណៈប្រទេសថៃមាន​ពួក​ជ្រុល​និយមមួយចំនួនកំពុងញុះញង់​ឱ្យមានការរើសអើងជាតិសាសន៍ពិសេសចំពោះប្រជាពលរដ្ឋខ្មែរ ។នេះបើតាម​ការលើក​ឡើងរបស់ប្រធានមន្ទីរសុខាភិបាលខេត្តបន្ទាយមានជ័យក្នុង ទិវាអភិវឌ្ឍន៍វិជ្ជា​ជីវៈ​វេជ្ជសាស្ត្រ​បន្តលើកទី២២​នៅ​សាល​ប្រជុំមន្ទីរសុខាភិបាលខេត្តបន្ទាយមានជ័យកាល​ពីថ្ងៃទី១១ខែកក្កដាឆ្នាំ២០២៥។

ក្នុងទិវាអភិវឌ្ឍន៍វិជ្ជាជីវៈវេជ្ជសាស្ត្របន្តលើកទី២២ឆ្នាំ២០២៥ ក្នុងទិវាអភិវឌ្ឍន៍​វិជ្ជាជីវៈវេជ្ជសាស្ត្របន្តលើកទី២២ ឆ្នាំ២០២៥ បន្ទាប់ពីលោកវេជ្ជបណ្ឌិតឯកទេស គៀត ម៉េងហៀង ប្រធានក្រុមប្រឹក្សាគណៈគ្រូពេទ្យខេត្តបន្ទាយ មានជ័យបានបង្ហាញពី​លទ្ធផលលើ​ការពង្រឹង​ការងារសេវាសុខភិបាលរួចមក លោកវេជ្ជបណ្ឌិត ឡេ ចន្ទ័សង្វាត ប្រធានមន្ទីរ​សុខាភិបាលខេត្តបន្ទាយមានជ័យ បានមានប្រសាសន៍ថា វេជ្ជបណ្ឌិត​និងគ្រូពេទ្យយើង ជាពិសេស មណ្ឌលសុខភាព មន្ទីរពេទ្យបង្អែកនៅក្រុង​ប៉ោយប៉ែត​ក៏ដូចបណ្ដា​ស្រុក​ព្រំដែនក្នុងភូមិសាស្ត្រខេត្តបន្ទាយមានជ័យ បានជួយ​សង្រ្គោះនិង​ព្យាបាល​​អ្នកជំងឺជនជាតិថៃទាំងជំងឺ​ស្រាលនិងធ្ងន់ ខណៈ​ដែលពួកគេ​មកស្នាក់នៅធ្វើការ​ឬប្រកបមុខរបរ ក្នុងទឹក​ដីខេត្ត​បន្ទាយមានជ័យជាខេត្តព្រំដែន​កម្ពុជា-ថៃ។

ដោយមិនបានបង្ហាញពីអត្តសញ្ញាណអ្នកជំងឺជនជាតិថៃទាំងនោះ លោកប្រធាន​មន្ទីរបានបន្តថា យើងព្យាបាល​ដោយ​សុទ្ធចិត្ត ដ្បិតពួកគេមិនហ៊ានត្រឡប់ទៅព្យាបាល​ជំងឺ​នៅប្រទសពួកគេ​ដ្បិតពេលនេះ​មានពួក​ជ្រុលនិយមថៃបាន​ញុះញង់ឱ្យមានការ​រើសអើងនឹងជាតិសាសន៍បរទេស ពិសេសរើសអើងប្រជាពលរដ្ឋខ្មែរ។

បន្ថែមពីលើនេះទាក់ទងនឹងការព្យាបាលជំងឺជូនប្រជាពលរដ្ឋ លោកប្រធានមន្ទីរ​សុខាភិបាលខេត្ត​បានក្រើនរំលឹក​ដល់គ្រូពេទ្យបម្រើសេវាសុខាភិបាលរដ្ឋ និងឯកជន​ត្រូវយកចិត្តទុកដាក់ក្នុងការពិនិត្យ​ព្យាបាលអ្នកជំងឺ។

ទន្ទឹមនេះលោកវេជ្ជបណ្ឌិត ឡេ ចន្ទ័សង្វាត ប្រធានមន្ទីរសុខាភិបាលខេត្ត​បន្ទាយ​មានជ័យ​បានអំពាវនាវដល់​ប្រជាពលរដ្ឋដែលជំងឺ សូមមកទទួលសេវាសុខភាព​ក្នុងស្រុក​ ។សូមមានជំនឿលើវិស័យសុខាភិបាលក្រោមការដឹកនាំរបស់​សម្តេច​ធិបតី ហ៊ុន ម៉ាណែត នាយករដ្ឋមន្រ្តីកម្ពុជា៕
ដោយ៖ គៀន ច័ន្ទហ៊ីន