បរទេស ៖ លោក Naim Qassem មេដឹកនាំក្រុម Hezbollah នៅប្រទេសលីបង់ បានអះអាង កាលពីថ្ងៃសុក្រ ថា ត្រៀមខ្លួនរួចជាស្រេច ដើម្បីធ្វើសង្គ្រាមតទល់ ជាមួយនឹងអ៊ីស្រាអែល ប្រសិនបើចាំបាច់ នេះបើតាមការចេញផ្សាយ របស់ទីភ្នាក់ងារព័ត៌មាន Xinhua។

លោកថា ក្រុមនេះត្រូវបានរៀបចំ យ៉ាងពេញលេញ ដើម្បីប្រឈមមុខនឹងអ៊ីស្រាអែលដោយយោធាប្រសិនបើចាំបាច់ ដោយព្រមានថា ប្រទេសលីបង់ ប្រឈមមុខនឹង “ការគំរាមកំហែងដែលមានស្រាប់” ពី “ការឈ្លានពានរបស់អ៊ីស្រាអែល” និងសម្ពាធក្នុងតំបន់ ដែលគាំទ្រដោយសហរដ្ឋអាមេរិក។

លោក Qassem បាននិយាយថា «យើងត្រូវបានរៀបចំ សម្រាប់ការប្រឈមមុខដាក់គ្នា ដើម្បី ការពារ។ ប្រសិនបើអ៊ីស្រាអែលឆ្លងកាត់បន្ទាត់ ហើយការឈ្លានពានឈាន ដល់ចំណុចមួយដែលចាំបាច់ត្រូវការពារ ពួកយើងបានត្រៀមខ្លួនរួចជាស្រេច សម្រាប់ជ័យជម្នះ»។

លោកបានចោទប្រកាន់សហរដ្ឋអាមេរិកថា បានគាំទ្រការរំលោភរបស់អ៊ីស្រាអែល និងព្យាយាមដាក់កិច្ចព្រមព្រៀងថ្មីមួយដែលនឹងធ្វើឱ្យមានការរំលោភបំពានអ៊ីស្រាអែល កន្លងមក និងណែនាំឡើងវិញនូវការទាមទារសម្រាប់ការរំសាយអាវុធ របស់ពួកហេសបូឡា។

លោកបាននិយាយថា «អ៊ីស្រាអែលមិនមែនគ្រាន់តែកាន់កាប់ នោះទេ វាកំពុងពង្រីក គ្រប់គ្រង និងផ្តាច់ការ» ដោយលើកហេតុផលថា ការរំសាយអាវុធ Hezbollah នឹងដកចេញនូវឧបសគ្គចុងក្រោយ ចំពោះអ្វីដែលលោកហៅថា “ការត្រួតត្រារបស់អ៊ីស្រាអែល-អាមេរិក” លើប្រទេសលីបង់។.

ថ្មីៗនេះ អ៊ីស្រាអែលបានបញ្ចេញ វីដេអូ បង្ហាញពីអ្វីដែលខ្លួននិយាយថា ជាការវាយប្រហារលើជ្រលង Bekaa ភាគខាងកើតប្រទេសលីបង់។ យោធាបាននិយាយថា ខ្លួនបានវាយប្រហារបរិវេណយោធា ដែលប្រើប្រាស់ដោយកងកម្លាំង Radwan ជាវរជនរបស់ Hezbollah និងកន្លែងផ្ទុកអាវុធ៕

ប្រភពី Xinhua ប្រែសម្រួល៖ សារ៉ាត