(ប៊ុលហ្គារី)៖ ឯកឧត្តមបណ្ឌិត ជា ច័ន្ទបូរីបូរណ៌ ឯកអគ្គរាជទូតនៃព្រះរាជាណាចក្រកម្ពុជា ប្រចាំសាធារណរដ្ឋប៊ុលហ្គារី បានស្នើការរៀបចំការតាំងពិព័រណ៍រូបថតអំពីប្រទេសកម្ពុជានៅសកលវិទ្យាល័យ Sofia ដើម្បីណែនាំវប្បធម៌ខ្មែរដល់និស្សិត ។

ឯកឧត្តមបណ្ឌិត បានលើកឡើងពីប្រវត្តិសាស្ត្រដ៏យូរលង់ និងសម្បូរបែបរបស់កម្ពុជា ដោយកត់សម្គាល់ថា ប្រទេសកម្ពុជាធ្លាប់ជាអាណាចក្រមួយ ហើយចាប់តាំងពីពេលនោះមកបានឆ្លងកាត់ទម្រង់អភិបាលកិច្ចផ្សេងៗ។

ឯកឧត្តមក៏បានចែករំលែកការឆ្លុះបញ្ចាំងផ្ទាល់ខ្លួនកាលនៅជានិស្សិតនៅប្រទេសប៊ុលហ្គារី ដោយផ្តល់នូវការយល់ដឹងអំពីគន្លងប្រវត្តិសាស្ត្ររបស់ប្រទេសកម្ពុជា ចាប់ពីសម័យអាណានិគមបារាំង តាមរយៈរបបខ្មែរក្រហម រហូតដល់ការងើបឡើងវិញ និងការរីកចម្រើនរបស់ប្រទេសចាប់តាំងពីទសវត្សរ៍ឆ្នាំ១៩៩០ ។

ឯកឧត្តមបណ្ឌិត ជា ច័ន្ទបូរីបូរណ៌ បានស្នើនេះ ក្នុងកិច្ចប្រជុំមួយ កាលពីថ្ងៃទី ២១ ខែកក្កដា ឆ្នាំ ២០២៥ រវាងលោកស្រីសាស្ត្រាចារ្យ Mira Markova ព្រឹទ្ធបុរសនៃមហាវិទ្យាល័យប្រវត្តិសាស្រ្តនៃសាកលវិទ្យាល័យ Sofia លោកស្រីសាស្ត្រាចារ្យបណ្ឌិត Milena Petkova ព្រឹទ្ធបុរសរងនៃមហាវិទ្យាល័យប្រវត្តិសាស្រ្ត និងលោកស្រីសាស្រ្តាចារ្យ Rumyana Marinova-Christidi ប្រធានផ្នែកសិក្សាជ្វីហ្វ ។

លោកស្រី សាស្ត្រាចារ្យ Markova ស្នើឱ្យបង្កើតកិច្ចព្រមព្រៀងមួយសម្រាប់ការផ្លាស់ប្តូរនិស្សិត និងព័ត៌មានសិក្សារវាងមហាវិទ្យាល័យប្រវត្តិសាស្រ្តនៃសាកលវិទ្យាល័យ Sofia និងសាកលវិទ្យាល័យភូមិន្ទភ្នំពេញ។ ជាមួយគ្នានោះលោកស្រីក៏បានស្នើឱ្យរៀបចំពិធីជប់លៀងវប្បធម៌ឧទ្ទិសដល់ទំនាក់ទំនងកម្ពុជា-ប៊ុលហ្គារី ដែលជាកន្លែងបង្ហាញម្ហូបប្រពៃណី តន្ត្រី និងទំនៀមទម្លាប់។

ដោយឡែក លោកស្រីសាស្ត្រាចារ្យ Rumyana Marinova-Christidi បានឱ្យដឹងថា សាកលវិទ្យាល័យ Sofia គឺមានតែមួយគត់នៅក្នុងតំបន់សម្រាប់ការផ្តល់ជូននូវកម្មវិធីពេញលេញនៅក្នុងការសិក្សាជ្វីហ្វ។ លោកស្រីបានបង្ហាញពីចំណាប់អារម្មណ៍ក្នុងការអភិវឌ្ឍន៍កិច្ចសហប្រតិបត្តិការលើវិស័យដូចជា បុរាណវិទ្យា ការអភិរក្សបេតិកភណ្ឌវប្បធម៌អចលនវត្ថុ ការសិក្សាប្រវត្តិសាស្រ្តទំនើប និងផ្នែកផ្សេងទៀតតាមរយៈការផ្លាស់ប្តូរការសិក្សា។

ឯកឧត្តមបណ្ឌិត ជា ច័ន្ទបូរីបូរណ៌ បានស្វាគមន៍ចំពោះគំនិតនេះ ហើយបានសម្តែងការប្តេជ្ញាចិត្តក្នុងការគាំទ្រកិច្ចសហប្រតិបត្តិការនេះ។ បេសកកម្មរបស់ ឯកឧត្តម នៅប្រទេសប៊ុលហ្គារី គឺជួយលើកកម្ពស់ការយល់ដឹងគ្នាទៅវិញទៅមក និងមិត្តភាពរវាងប្រជាជនកម្ពុជា និងប៊ុលហ្គារី ជំរុញកិច្ចសហប្រតិបត្តិការ ដើម្បីផលប្រយោជន៍ប្រជាជាតិទាំងពីរ ៕

ដោយ ៖ ហេង សម្បត្តិ+ថេត វិចិត្រ