បរទេស ៖ ប្រជាជនប៉ាឡេស្ទីន បាននិយាយថា កុមារស្លាប់ កាន់តែច្រើន ខណៈដែលកង្វះអាហារូបត្ថម្ភកើនឡើង នៅតំបន់ហ្គាហ្សា ដែលជាទីតាំងប្រយុទ្ធគ្នា រវាងទាហានអ៊ីស្រាអែល និង ក្រុមសកម្មប្រយុទ្ធហាម៉ាស់។

ប្រជាជនប៉ាឡេស្ទីន បានលើកឡើងបែបនេះ ក្នុងពេលបានលាគ្នា ទៅកាន់ទារក ដែលបានស្លាប់ ដោយសារកង្វះអាហារូបត្ថម្ភ នៅមន្ទីរពេទ្យ Nasser ក្នុងទីក្រុង Khan Yunis ថ្មីៗនេះ។

សមាជិកគ្រួសារម្នាក់ និយាយថា «គាត់ស្លាប់ដោយសារកង្វះអាហារូបត្ថម្ភ ដោយសារគ្រួសារគាត់មិនអាចចិញ្ចឹមគាត់បាន» ។

ប្រជាជននៅតំបន់ហ្គាហ្សា ជាងពីរលាននាក់ កំពុងប្រឈមមុខនឹងការខ្វះខាតស្បៀងអាហារ និងសម្ភារៈសំខាន់ៗផ្សេងទៀត យ៉ាងធ្ងន់ធ្ងរ ដោយវេជ្ជបណ្ឌិត ទីភ្នាក់ងារការពារជនស៊ីវិល និង អង្គការសប្បុរសធម៌វេជ្ជសាស្ត្រ ឬ Doctors Without Borders ហៅកាត់ MSF បានរាយការណ៍ពីការកើនឡើងនៃករណីកង្វះអាហារូបត្ថម្ភក្នុងរយៈពេលប៉ុន្មានថ្ងៃថ្មីៗនេះ។

ការវាយប្រហារឆ្នាំ ២០២៣ របស់ក្រុមហាម៉ាស បាននាំឱ្យមានមនុស្សស្លាប់ចំនួន ១២១៩នាក់ ដែលភាគច្រើន ជាជនស៊ីវិល នេះបើយោងតាមការបូកសរុប របស់ AFP ដោយផ្អែកលើតួលេខផ្លូវការ។

ការវាយលុកសងសឹក របស់អ៊ីស្រាអែល បានសម្លាប់ជនជាតិប៉ាឡេស្ទីន យ៉ាងហោចណាស់ ចំនួន៥៨,៨៩៥នាក់ ដែលភាគច្រើន ជាជនស៊ីវិល នេះបើយោងតាមក្រសួងសុខាភិបាលរបស់ហាម៉ាស គ្រប់គ្រងតំបន់ហ្គាហ្សា។ អង្គការសហប្រជាជាតិចាត់ទុកតួលេខទាំងនេះថា អាចទុកចិត្តបាន៕

ប្រភព AFP ប្រែសម្រួល៖ សារ៉ាត