អភិបាលខេត្តកំពង់ចាមអញ្ជើញសំណេះសំណាល និងផ្ដល់អំណោយដល់ពលករ ពលការិនីមកពីប្រទេសថៃ
កំពង់ចាម៖ អភិបាលខេត្តកំពង់ចាម ឯកឧត្តម អ៊ុន ចាន់ដា និងក្រុមការងារ បានអញ្ជើញជួបសំណេះសំណាលជាមួយពលករ ពលការិនី ដែលមកពីប្រទេសថៃចំនួន ៩៦ នាក់ ស្ថិតនៅឃុំវិហារធំ ស្រុកកំពង់សៀម។
ក្នុងជំនួបកាលពីព្រឹកថ្ងៃទី២៧ ខែកក្កដា ឆ្នាំ២០២៥ ឯកឧត្តមអភិបាលខេត្តបានបញ្ជាក់ថា រហូតមកដល់ពេលនេះ មានពលករ ពលការិនីមកកាន់មូលដ្ឋានវិញនៅខេត្តកំពង់ចាមមានចំនួនជាង ១ ៧០០ នាក់ហើយ នៅក្នុងនោះមានអ្នកខ្លះបានធ្វើដំណើរដោយខ្លួនឯង និងខ្លះទៀតធ្វើដំណើរតាមរថយន្ត ដែលអាជ្ញាធរខេត្តបានសម្របសម្រួល ដោយមានអភិបាលរងខេត្ត ព្រមទាំងក្រុមការងារចម្រុះចាំទទួលនៅតាមព្រំដែនកម្ពុជា-ថៃ មាន នៅច្រកដូង ក្នុងខេត្តបាត់ដំបង និងច្រកអន្តរជាតិប៉ោយប៉ែត ខេត្តបន្ទាយមានជ័យ ។ ឯកឧត្តមបានលើកទឹកចិត្តឱ្យពលករ ពលករនី មកដាក់ពាក្យមកមន្ទីរការងារខេត្តកំពង់ចាម ដើម្បីឱ្យមន្ត្រីរកកន្លែងការងារជូន ខណៈបច្ចុប្បន្នមានកន្លែងការងាររហូតដល់ទៅ ១ ៨០០០ កន្លែងកំពុងរង់ចាំអ្នកធ្វើ។
ពលករ ពលការនីចំនួន ៩៦ នាក់ខាងលើមានលំនៅដ្ឋានក្នុងឃុំទាំង ១៥ នៃស្រុកកំពង់សៀម។ពួកគេបានទទួល អំណោយ មានដូចជា អង្ករ មី ត្រីខកំប៉ុង ទឹកត្រី ទឹកស៊ីអ៊ីវ ដើម្បីយកទៅដោះស្រាយជីវភាព ក្នុងរយៈពេលខ្លី៕
ដោយ៖លី ពៅ
