ថៃចង់ដណ្តើមយកវត្តកែវសិក្ខាគិរីស្វារៈ និងបង្កើនការវាយប្រហារនៅតាមសមរភូមិជាច្រើនទៀត
(ភ្នំពេញ)៖ ដើម្បីបំពេញមហិច្ឆតារបស់ខ្លួន និងក៏ដូចជាបានកំពុងរំលោភបំពាន ឈ្លានពានទឹកដីកម្ពុជាយ៉ាងងងើល ពេលនេះកងទ័ពឈ្លានពានប្រទេសថៃកំពុង ចង់ដណ្តើមយកវត្តកែវសិក្ខាគិរីស្វារៈដែលជាទឹកដីកម្ពុជាថែមទៀត ។
ថ្លែងក្នុងសន្និសីទសារព័ត៌មាន ស្តីពីបច្ចុប្បន្នភាពនៃការឈ្លានពានរបស់កងទ័ពថៃមកលើទឹកដីកម្ពុជា លោកជំទាវឧត្តមសេនីយ៍ឯក ម៉ាលី សុជាតា នៅព្រឹកថ្ងៃទី ២៨ ខែកក្កដា ឆ្នាំ ២០២៥នេះឱ្យដឹងថា៖កងទ័ពឈ្លានពានថៃថ្ងៃទី ២៨ ខែកក្កដា ឆ្នាំ ២០២៥បើទោះបីមានការកំណត់នូវកិច្ចប្រជុំពិសេស កម្រិតរាជរដ្ឋាភិបាលនៃប្រទេសទាំងពីរ នៅទីក្រុងកូឡាឡាំពួរក្នុងប្រទេសម៉ាឡេស៊ី ក្នុងគោលបំណងចរចាឱ្យបាននូវបទឈប់បាញ់គ្នាក៏ដោយ នៅថ្ងៃនេះក៏ដោយ តែនៅវេលាម៉ោង ៣,១០នាទីរំលងអាធ្រាតុ ភាគីថៃ នៅបន្តបើកការវាយប្រហារមុន មកលើកម្ពុជានៅតំបន់ប្រាសាទតាមាន់ធំ ប្រាសាទតាក្របី ដោយបាញ់ស្រោចរហូតដល់ម៉ោង ៥,០៧នាទីព្រឹកនេះ ។ ចំពោះសភាពការណ៍នៅតាម ប្រាសាទតាមាន់ធំ ជប់គគីរ តាដូន វាលឥន្រ្ទី ៥មករា តាថាវ ភ្នំខ្មោច អានសេះថៃបានវាយយ៉ាងខ្លាំង និងកងទ័ពឈ្លានពានថៃមានបំណងដើម្បីដណ្តើម វត្តកែវសិក្ខាគិរីស្វារៈ និងព្រមជាមួយគ្នានេះបានបង្កើនសមរភូមិ នៅជប់គគីរថ្មដូន ឱ្យឆេះរាលដាលសន្ធោសន្ធៅ។
លោកជំទាវឧត្តមសេនីយ៍ឯក ម៉ាលី សុជាតាបានថ្លែងដែរថាទោះបីមានការរំលោភបំពានពីសំណាក់កងទ័ពថៃយ៉ាងណាក្តី តែកងទ័ពកម្ពុជាដ៏អង់អាចក្លាហានម៉ោះមុត នៅឈររឹងមាំ តស៊ូយ៉ាងស្វិតស្វាញមិនញញើតនឹងសត្រូវឈ្លានពានសូម្បីតែបន្តិចសោះឡើយ និងកំពុងឈរយ៉ាងរឹងមាំតាមខ្សែបន្ទាត់ព្រំដែន។
គួរបញ្ជាក់ថា វត្តកែវសិក្ខាគិរីស្វារៈ ឬហៅថា វត្តព្រះវិហារស្ថិតនៅទឹកដីកម្ពុជា ដែលថៃមានមហិច្ឆតាចង់លេបត្របាក់ជាយូរណាស់មកហើយ។ នៅទីនោះមានផ្ទាំងថ្មមួយដុំធំជាកន្លែងដែលឧត្ដមសេនីយ៍មេបញ្ជាការទ័ពសៀមម្នាក់ឈ្មោះកាណុក បានដឹកនាំទាហានថៃ ប្រមាណពី ៤៥០ ទៅ៧០០នាក់ ចូលឈ្លានពានឈរជើងកាន់កាប់ក្នុងទីអារាមខ្មែរ នៅ ថ្ងៃទី១៥ កក្កដា ឆ្នាំ២០០៨ ខណៈព្រះសង្ឃខ្មែរជាច្រើនអង្គកំពុងគង់នៅទីនោះជាប្រចាំទៀតផង។ យ៉ាងណាក្តីវត្តអារាមកម្ពុជាមួយនេះដែលថៃចង់លេបយកត្រូវបានអាមាសដោយសារកម្ពុជាម្តងរួចមកហើយ ។ ដោយមហិច្ឆតារបស់ខ្លួនសៀមចង់លេបត្របាក់ម្តងទៀត ៕
ដោយ ៖ ម៉ាដេប៉ូ
