ឧត្តរមានជ័យ៖ ក្រោយពីបើកកិច្ចប្រជុំអស់រយៈពេលប្រមាណជា ១ម៉ោង នៅថ្ងៃអង្គារ ទី ២៩ ខែកក្កដានេះ មេបញ្ជាការភូមិភាគ៤ កម្ពុជា និងមេបញ្ជាការភូមិភាគទី២ ថៃ បានឯកភាពឈប់បាញ់គ្នាតទៅទៀត។
កិច្ចប្រជុំ រវាងឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ កម្ពុជា ជាមួយមេបញ្ជាការយោធភូមិភាគទី២ ថៃ បានចាប់ផ្តើមនៅម៉ោងប្រមាណ ១០ព្រឹកនៅថ្ងៃនេះ នៅច្រកទ្វារអន្តរជាតិអូស្មាច់ ខេត្តឧត្តរមានជ័យ។
ជាលទ្ធផល ភាគីទាំងពីរបានព្រមព្រៀងគ្នាលើបីចំណុច គឺ ទី១៖ យល់ព្រមឈប់បាញ់គ្នា តាមកិច្ចព្រមព្រៀង ។ ទី២៖ បង្កើនកិច្ចទំនាក់ទំនងរវាងគ្នា និងទី៣៖ បើមានបញ្ហាត្រូវរួមគ្នាដោះស្រាយរវាងភូមិភាគ៤ និងភាគ២ ដោយម្ខាង៤នាក់។
ការព្រមព្រៀងឈប់ប្រយុទ្ធគ្នារវាងកងទ័ពប្រទេសទាំងពីរ ធ្វើឡើងមួយថ្ងៃ ក្រោយពីប្រមុខរដ្ឋាភិបាលកម្ពុជា សម្តេចនាយករដ្ឋមន្ត្រី ហ៊ុន ម៉ាណែត បានសម្រេចកិច្ចព្រមព្រៀងឈប់បាញ់បន្ទាន់មួយជាមួយសមភាគីថៃ នៅទីក្រុងគូឡាឡាំពួរ៕

ដោយ Sou Vanlok