បរទេស ៖ លោក Trump បានប្រកាសពីកិច្ចព្រមព្រៀងពាណិជ្ជកម្ម ជុំវិញរឿង ពន្ធគយ ជាមួយកូរ៉េខាងត្បូង ដែលជាដៃគូពាណិជ្ជកម្មធំបំផុត លំដាប់ទី៦ របស់សហរដ្ឋអាមេរិក។

ប្រធានាធិបតីអាមេរិក រូបនេះ បានប្រកាស កាលពីថ្ងៃពុធថា លោកបានចុះហត្ថលេខា លើកិច្ចព្រមព្រៀងពាណិជ្ជកម្ម ជាមួយកូរ៉េខាងត្បូង។

លោក Trump បានសរសេរ នៅលើបណ្តាញសង្គម Truth Social ថា ទំនិញរបស់កូរ៉េខាងត្បូង នឹងប្រឈមមុខនឹងពន្ធ ១៥% ដែល ទាបជាង ការកំណត់ ពីមុន ដែលធ្លាប់មាន ដល់ទៅ ២៥% ខណៈដែលការនាំចូល របស់សហរដ្ឋអាមេរិក ទៅកាន់កូរ៉េខាងត្បូង នឹងមិនប្រឈមមុខនឹងពន្ធ ឡើយ។

លោក បាននិយាយថា ប្រទេសកូរ៉េខាងត្បូង នឹងបើកការធ្វើពាណិជ្ជកម្ម ហើយនឹងទទួលយក រថយន្ត របស់សហរដ្ឋអាមេរិក។ កូរ៉េខាងត្បូង គឺជាដៃគូពាណិជ្ជកម្មដ៏សំខាន់ ចុងក្រោយបង្អស់ របស់សហរដ្ឋអាមេរិក ដែលឈានដល់កិច្ចព្រមព្រៀង ជាមួយរដ្ឋបាល របស់លោក Trump នៅមុនថ្ងៃផុតកំណត់ ត្រឹមថ្ងៃសុក្រនេះ។

បន្ថែមពីលើពន្ធ ១៥% លោក Trump បាននិយាយថា ក៏មានកិច្ចព្រមព្រៀង វិនិយោគ ផ្សេងៗទៀត ផងដែរ។ អាមេរិកបាននាំចូលទំនិញកូរ៉េខាងត្បូង តម្លៃ ១៣១.៥ ពាន់លានដុល្លារ ហើយកូរ៉េខាងត្បូងវិញ បានទិញទំនិញអាមេរិក ចំនួន ៦៥.៥ ពាន់លានដុល្លារ កាលពីឆ្នាំមុន៕

ប្រភពពី CBS ប្រែសម្រួល៖ សារ៉ាត