អភិបាលខេត្តនិងក្រុមប្រឹក្សាខេត្តកែប ដឹកនាំគណៈប្រតិភូរដ្ឋបាលខេត្តអញ្ជើញសួរសុខទុក្ខវីរកងទ័ពដែលកំពុងសម្រាកព្យាលរបួស និងជូនអំណោយដល់ជនភៀសសឹកនៅខេត្តព្រះវិហារ
អត្ថបទដោយ៖
សិលា សារិន
ឯកឧត្តមបណ្ឌិត សោម ពិសិដ្ឋ អភិបាលខេត្តកែប និងលោកជំទាវ ឯកឧត្ដម អ៊ុក ថា ប្រធានក្រុមប្រឹក្សាខេត្តកែប បានដឹកនាំគណៈប្រតិភូរដ្ឋបាលខេត្តកែបអញ្ជើញសួរសុខទុក្ខ និងជូនថវិកាដល់វីរកងទ័ពដែលរងរបួសដោយការវាយប្រហារពីយោធាថៃនាពេលកន្លងមក និងកំពុងសម្រាកព្យាបាលចំនួន ៩៧នាក់ នៅមណ្ឌលសុខភាពគូលែន ស្រុកគូលែន ខេត្តព្រះវិហារ។
ក្នុងឱកាសនោះ ឯកឧត្ដមបានសម្តែងនូវការដឹងគុណដល់នាយទាហាន នាយទាហានរង ពលទាហានទាំងអស់ ដែលបានលះបង់ជីវិតដើម្បីការពារបូរណភាពទឹកដី និងសូមជូនពរឱ្យឆាប់ជាសះស្បើយ និងមានសុខភាពល្អឡើងវិញ។
ខេត្តព្រះវិហារដដែលគណៈប្រតិភូរដ្ឋបាលខេត្តកែបបានអញ្ជើញសួរសុខទុក្ខ និងឧបត្ថម្ភគ្រឿងឧបភោគ បរិភោគ សម្ភារៈប្រើប្រាស់ និងថវិកាមួយចំនួនជូនដល់ប្រជាពលរដ្ឋភៀសសឹកដែលកំពុងស្នាក់នៅវត្តមណ្ឌលវិប្បសនាធុរៈភូមិភាគឥសាន្ត ហៅ វត្តពោធិប្រាំពាន់ដើម៕
ដោយ៖សិលាសារិន
