មន្រ្តីមន្ទីរព័ត៌មានខេត្តកំពង់ចាមបន្តយុទ្ធនាការប្រឆាំងនឹងព័ត៌មានក្លែងក្លាយនៅស្រុកស្ទឹងត្រង់
កំពង់ចាម៖លោកស្រី សម ផល្លា ប្រធានមន្ទីរព័ត៌មានខេត្តកំពង់ចាម បានរំលឹកដល់អ្នកសារព័ត៌មានឌីជីថល ក៏ដូចជាអ្នកប្រើបណ្តាញសង្គមត្រូវប្រកាន់ខ្ជាប់នូវក្រមសីលធម៌ វិជ្ជាជីវៈ ដោយផ្សព្វផ្សាយតែការពិត។ ការដាស់តឿនបែបនេះក្នុងឱកាសបន្តយុទ្ធនាការផ្សព្វផ្សាយបញ្ជ្រាបការយល់ដឹងអំពីព័ត៌មានក្លែងក្លាយក្រោមពាក្យស្លោក «និយាយថាទេចំពោះព័ត៌មានក្លែងក្លាយ» នៅស្រុកស្ទឹងត្រង់កាលពីព្រឹកថ្ងៃទី៤ ខែសីហា ឆ្នាំ២០២៥ ។
លោកស្រីប្រធានមន្ទីរក៏បានអំពាវនាវដល់សាធារណជនទាំងអស់ ត្រូវផ្ទៀងផ្ទាត់ប្រភពព័ត៌មានឱ្យបានច្បាស់លាស់ មុននឹងជឿជាក់ ជាពិសេសត្រូវពិចារណាឱ្យបានច្បាស់លាស់ មុននឹងចែករំលែកព័ត៌មានទាំងនោះបន្ត ទៅលើបណ្ដាញសង្គម និងចែករំលែកដល់មិត្តភក្ដិ ឬក្រុមគ្រួសារ ព្រោះការបង្កើត ព័ត៌មានក្លែងក្លាយ គឺជាទង្វើដែលសង្គមមិនគាំទ្រនោះទេ ។
ទាក់ទងនឹងយុទ្ធនាការ លោកស្រីប្រធានមន្ទីរព័ត៌មាន បានបញ្ជាក់ថា យុទ្ធនាការ «និយាយថាទេចំពោះព័ត៌មានក្លែងក្លាយ»រៀបចំឡើងក្នុងគោលបំណងកាត់បន្ថយជាអតិបរមានូវរាល់ប្រភេទព័ត៌មានក្លែងក្លាយ និង ឈានទៅលុបបំបាត់ព័ត៌មានក្លែងក្លាយពីលំហព័ត៌មាន ក្នុងសង្គមកម្ពុជា សំដៅធានាសន្តិសុខ ព័ត៌មាន ពោលគឺការទទួលព័ត៌មានប្រកបដោយគុណភាព និង សុវត្ថិភាព។យុទ្ធនាការនេះនឹងបន្តចុះធ្វើនៅគ្រប់បណ្តាក្រុង-ស្រុកនានានៅទូទាំងខេត្តកំពង់ចាម៕
ដោយ៖លី ពៅ
