មន្រ្តីជាន់ខ្ពស់ក្រសួងព័ត៌មាន៖ ការបើកសិក្ខាសាលាស្តីពីប្រវត្តិចលនាអន្តរជាតិរវាងក្រសួងព័ត៌មាន និងកាកបាទក្រហកម្ពុជាបានផ្តល់ប្រយោជន៍សំខាន់សម្រាប់អ្នកសារព័ត៌មាន
(ភ្នំពេញ)៖ សិក្ខាសាលាមួយដែលបានធ្វើការផ្សព្វផ្សាយដល់អ្នកសារព័ត៌មាន ពិសេសមន្រ្តីរាជការនៃក្រសួងព័ត៌មានត្រូវបានចាត់ទុកថាផ្តល់ប្រយោជន៍សំខាន់ពីប្រវត្តិចលនាអន្តរជាតិ គោលការណ៍គ្រឹះច្បាប់ មនុស្សធម៌ អន្តរជាតិក្នុងបរិការណ៍សាកលលោកបច្ចុប្បន្ន និងកាកបាទក្រហមកម្ពុជា។
ឯកឧត្តម ជុំ កុសល រដ្ឋលេខាធិកាក្រសួងព័ត៌មាន បានថ្លែងពិធីក្នុងបើកសិក្ខាសាលា នារសៀលថ្ងៃទី០៦ ខែសីហា ឆ្នាំ២០២៥ នៅទីស្តីការក្រសួងព័ត៌មាន បានបញ្ជាក់ថា សិក្ខាសាលានាពេលនេះពិតជាមានសារៈសំខាន់ណាស់ក្នុងការផ្សព្វផ្សាយពីគោលការណ៍ និងតួនាទីរបស់កាកបាទក្រហម។
ឯកឧត្តម លើកឡើងថា៖ «វាជាសិក្ខាសាលាដែលរៀបចំឡើងនៅពេលនេះគឺស្របពេលនឹងស្ថាន ភាពរបស់កម្ពុជា ដែលបានកំពុងរងការឈ្លានពានពីសំណាក់ភាគីថៃជាជាអមិត្តបានធ្វើការឃ្លានពានលើដែនអធិបតេយ្យកម្ពុជា។ កាកបាទក្រហមគឺជាស្ថាប័នដ៏ធំមួយនៅក្នុងប្រទេសកម្ពុជា ក្នុងការជួយសង្គ្រោះប្រជាពលរដ្ឋដែលជួបទុក្ខភ័យដោយមិនប្រកាន់ជាតិសាសន៍ និងនិន្នាការនយោបាយឡើយ”។
ឯកឧត្តម ជុំ កុសល បានថ្លែងដែរថា កាកបាទក្រហម និង អឌ្ឍច័ន្ទ ក្រហម កម្ពុជា មានតួនាទីជាចម្បងក្នុងការផ្តល់ជំនួយ និងការការពារសិទ្ធិ ដល់ជន រងគ្រោះក្នុងស្ថានភាពសង្គ្រាម ដោយការពារជីវិតជនរងគ្រោះ ដោយធានាថាសេចក្តី ថ្លៃថ្នូរ និងជីវិតមិនត្រូវបានរើសអើង ឬបំពានទោះបីជាមានសង្គ្រាមកើតឡើង ក៏ ដោយ ។
ទាក់ទិនក្នុងរឿងនេះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជាបានឱ្យដឹងថាសិក្ខាសាលានេះ ក៏នឹងចូលរួមលើកកម្ពស់ ការយល់ដឹងបន្ថែមទៀតពីការការពារ និងគោរព ពីតួនាទីកាកបាទក្រហម និង យល់ដឹងពីច្បាប់មនុស្សធម៌អន្តរជាតិ ហើយយើងក៏បានយល់ដឹងពីតួនាទី ភារកិច្ច របស់កាកបាទក្រហមកម្ពុជាតើមានអ្វីក្នុងការជួយនៅពេលបច្ចុប្បន្ន។ កាកបាទ ក្រហមកម្ពុជាបានរៀបចំសិក្ខាសាលានេះឡើងស្របស្ថានភាពកម្ពុជាដែលត្រូវបានថៃធ្វើការឈ្លានពាននៅតាមបណ្តោយព្រំដែនដែលជាដែនអធិបតេយ្យកម្ពុជា៕
ដោយ ៖ ម៉ាដេប៉ូ
រូបភាព ៖ រិន រចនា
