កំពង់ធំ៖ព្រះទេពសត្ថា សៀង សុខ ព្រះរាជាគណៈថ្នាក់ចត្វានិងជាព្រះសត្ថាបារមីព្រះមេគណខេត្តកំពង់ធំ បាន​ដឹកនាំព្រះសង្ឃ គណៈកម្មការអាចារ្យវត្ត និងពុទ្ធបរិស័ទជាង៥០០អង្គនិងនាក់ប្រារព្ធពិធីបង្សុកូល សមាធិរយៈពេល ៥នាទីឧទ្ទិសមហាកុសលជូនដល់វិញ្ញាណក្ខន្ធវីរយុទ្ធជនពលីនៅសមរភូមិការពារបូរណភាពទឹកដីនៅទិសព្រំដែនកម្ពុជា-ថៃ។ពិធីនេះប្រព្រឹត្តទៅនៅបរិវេណវត្តឥន្រ្តីយ៍សំវរៈ ហៅវត្តកំពង់ធំ ក្នុងភូមិក្តី សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំកាលពីព្រឹកថ្ងៃទី៩ ខែសីហា ឆ្នាំ២០២៥។

ក្នុងពិធីនេះព្រះទេពសត្ថា សៀង សុខ មានសង្ឃដីកាសោកស្ដាយអាឡោះអាល័យជាពន់ពេកចំពោះ​ការបាត់បង់វីរ​យុទ្ធជនដែលបានលះបង់អាយុជីវិតដ៏អង់អាចខ្លាហាននៅក្នុងសមរភូមិ ដើម្បីបុព្វហេតុការពារបូរណភាពទឹកដី និងការពារប្រជាជនកម្ពុជា ពីការបំពានទឹកដីពីសំណាក់ពួកឈ្លានពាន។ ការលះបង់ដ៏ធំធេងនេះ ក្នុងនាមជាព្រះ​សង្ឃទាំងអស់ ជាប្រជាជនកម្ពុជាចងចាំជានិច្ចមិនអាចបំភ្លេចបានឡើយ៕

ដោយ៖​ប៊ុន​រដ្ឋា