ក្រចេះ៖”ការបញ្ចេញព័ត៌មានពិតទាន់ពេលវេលា មានភាពចាំបាច់ណាស់​ក្នុងការឆ្លើយតបទៅនឹងតម្រូវការ​និងទំនោរ​ទទួលព័ត៌មាននៅក្នុងសម័យឌីជីថល ។នេះជាការបញ្ជាក់របស់ឯកឧត្តម ទេព អស្នារិទ្ធ អនុរដ្ឋលេខាធិការ​និងអ្នក​នាំពាក្យក្រសួងព័ត៌មាន នៅក្នុងបទអន្តរាគមន៍ស្តីពីការគ្រប់គ្រងព័ត៌មាន និងសាធារណមតិក្នុងរបត់ថ្មី ក្នុងវគ្គបំពាក់​បំប៉នស្តីពីការពង្រឹងសមត្ថភាព​លើការងារព័ត៌មាន និងសាធារណមតិ ។

ក្នុងវគ្គបំពាក់បំប៉នរយៈពេល២ថ្ងៃ​ចាប់ពីថ្ងៃទី១៣ ដល់ថ្ងៃទី១៤ខែសីហា ឆ្នាំ ២០២៥ នៅសាលាខេត្តក្រចេះ ជូនដល់ថ្នាក់ដឹកនាំនិងមន្ត្រីនៃមន្ទីរព័ត៌មាន​មកពីខេត្តក្រចេះ ព្រះវិហារ មណ្ឌលគិរី ស្ទឹងត្រែង និងខេត្តរតនគិរី​ ឯកឧត្តម​អ្នកនាំពាក្យបានបន្តថា ដោយឈរលើទំនោរ និងតម្រូវការដូចនេះ មន្ត្រីទទទួល​បន្ទុកព័ត៌មាន និង​សាធារណមតិនៅគ្រប់រាជធានីខេត្តទាំងអស់ត្រូវយក​ចិត្ត​ទុកបន្ថែមទៀតលើការរៀបចំនិងបញ្ចេញព័ត៌មានពិត មានទឡ្ហីករណ៍ច្បាស់លាស់ ចេញពីប្រភពផ្លូវការរបស់រាជរដ្ឋាភិបាល ស្ថាប័នជំនាញ និងសមត្ថកិច្ចពាក់ព័ន្ធនឹង​សាច់រឿង ប្រធានបទនីមួយៗ ដើម្បីចៀសវាងកុំឱ្យប្រជាពលរដ្ឋទទួលព័ត៌មាន​ក្លែង​ក្លាយ ឬព័ត៌មាន ពីប្រភពផ្សេង ដែលផ្សាយព័ត៌មានមិនពិត ឬការផ្សាយ​បែបញុះញង់ បង្កចលាចល ការរើសអើង ឬបង្កអរិភាពក្នុងសង្គម។

ក្នុងការអនុវត្តការងាររបស់ខ្លួន មន្ត្រីព័ត៌មាននិងសាធារណមតិនៃមន្ទីរព័ត៌មាន​ទាំងអស់ ត្រូវបន្តតាមដានក្តាប់ រាល់ស្ថានភាពក្នុងមូលដ្ឋានរបស់ខ្លួន ដើម្បី​រៀបចំបញ្ជីប្រធានបទ ពិសេសប្រមូលព័ត៌មានសំខាន់ៗ ដែល​សាធារណមតិ​កំពុងជជែក ឬចែករំលែកលើបណ្តាញសង្គម។នេះជាការបញ្ជាក់បន្ថែមរបស់​អ្នកនាំពាក្យ។

ឯកឧត្តម ទេព អស្នារិទ្ធ បានទាញអារម្មណ៍មន្រ្តីធ្វើកិច្ចការព័ត៌មានថា យន្តការការងារនេះ ត្រូវធ្វើឡើងដោយ ជាប់លាប់ជាប្រចាំ ដើម្បីកំណត់​បានច្បាស់អំពីបញ្ហា និងសំណូមពរនានារបស់ពលរដ្ឋ តាមបណ្តាសហគមន៍ និងអ្នកពាក់ព័ន្ធក្នុងមូលដ្ឋាន សម្រាប់ការធ្វើការសម្រេចចិត្ត និងការឆ្លើយតប​របស់ថ្នាក់ដឹកនាំ មន្ទីរអង្គភាពជំនាញ​ក្នុងខេត្ត សំដៅដោះស្រាយជូនពលរដ្ឋ​ចំបញ្ហា និងឱ្យទាន់ពេលវេលា ឆ្លើយតបទៅនឹងសេចក្តីត្រូវការជាក់ស្តែង។ មន្ត្រីមន្ទីរព័ត៌មានត្រូវបង្កើនកិច្ចសហការ និងសម្របសម្រួលការអនុវត្តការងារ​ជាប្រចាំជាមួយរដ្ឋបាលខេត្ត មន្ទីរ អង្គភាពជុំវិញខេត្ត និងជំនាញពាក់ព័ន្ធ ដើម្បីលើកកម្ពស់ប្រសិទ្ធភាពការងារ។

ឯកឧត្តមបានសង្កត់ធ្ងន់ថា៖ «ក្នុងប្រតិបត្តិការការងារ ប្រចាំថ្ងៃ មន្ត្រីព័ត៌មាន​និងសាធារណមតិមិន​ត្រូវទុកឱ្យរឿងរ៉ាវ​ណាមួយផ្ទុះឡើង ទុកឱ្យបណ្តែត​លើបណ្តាញទំនាក់ទំនងសង្គមឡើយ ព្រោះវា អាចបណ្តាលឱ្យប៉ះពាល់ដល់​សតិ​អារម្មណ៍របស់មហាជនឬអាចឈានដល់ធ្វើឱ្យប៉ះពាល់ដល់ការរក្សាសណ្តាប់ធ្នាប់ល្អ ធ្វើឱ្យខូចប្រយោជន៍សាធារណៈ ឬបង្កព្យសនកម្ម គ្រោះថ្នាក់ធ្ងន់ធ្ងរជាយថា​ហេតុដល់សង្គមជាតិទាំងមូល។

ឯកឧត្តមគូសរំលេចថា ការងារឆ្លើយតបព័ត៌មានសាធារណមតិត្រូវតែលឿនហើយ មិនរង់ចាំទេ គឺត្រូវធ្វើភ្លាមៗ តាមដានឆ្លើយតប ២៤ម៉ោងលើ២៤ម៉ោង ទៅតាម​ប្រធានបទនានាកើតឡើងទាំងថ្នាក់ក្រោមជាតិ និងជាតិ ព្រោះនៅក្នុងយុគសម័យ​នេះប្រជាពលរដ្ឋភាគច្រើនប្រើស្មាតហ្វូនស្ទើរតែគ្រប់ដៃ ងាយទទួលព័ត៌មាន​ចម្រុះទាំង​ព័ត៌មាន​ពិត និងព័ត៌មានក្លែងក្លាយ។»

ឯកឧត្តមបញ្ជាក់ថា នៅប្រទេសកម្ពុជាបច្ចុប្បន្ន មានប្រជាជនជាង១២លាន​នាក់កំពុងមានសកម្មលើបណ្តាញសង្គម។ ក្នុងនោះបើយើងពិនិត្យមើលថាត្រឹមតែ មួយភាគបួន ក្នុងចំណោមនេះ ផ្សាយ ឬចែកចាយព័ត៌មានមិនពិត ឬ​ព័ត៌មាន​ក្លែងក្លាយ នោះវានឹងធ្វើឱ្យសង្គមយើងមានភាពវឹកវរ ច្របូកច្របល់ អសន្តិសុខ ខូចសណ្តាប់ធ្នាប់ក្នុង​ការ​រស់នៅ មិនខាន ដែលធ្វើឱ្យប៉ះពាល់ដល់កិច្ចខិតខំរបស់​រាជរដ្ឋាភិបាលក្នុងការធានាសន្តិសុខ ការអភិវឌ្ឍសង្គម សេដ្ឋកិច្ចនិងរក្សា​សន្តិភាព។

ឯកឧត្តមអនុរដ្ឋលេខាធិការ ក៏បានមានប្រសាសន៍តម្រង់ទិសបន្ថែមដល់ សិក្ខាកាមទាំងអស់ អំពីភាពចាំបាច់ក្នុង​ការរៀបចំ និងអនុវត្តការងារជាប្រព័ន្ធ ដោយមានផែនការច្បាស់លាស់ និងការតាមដាន ត្រួតពិនិត្យ និងវាយតម្លៃ​ការងារជាប្រចាំ ដើម្បីលើកកម្ពស់តួនាទីនិងភារកិច្ចរបស់ មន្ទីរប្រសិទ្ធភាព និងគឺជារឿងសំខាន់មួយ​សម្រាប់​ប្រជាពលរដ្ឋ ក្នុងការសម្រេចចិត្ត និងបន្សាប​ព័ត៌មានក្លែងក្លាយ។

ឯកឧត្តមអ្នកនាំពាក្យក្រសួងព័ត៌មានបានរម្លឹកថា ក្នុងបរិបទនៃសង្គមឌីជីថល​នេះសំខាន់គឺ ត្រូវគ្រប់គ្រងខ្លឹមសារ និងល្បឿននៃការផ្សព្វផ្សាយ ទើបអាចគ្រប់​គ្រងព័ត៌មានបាន។ ដូច្នេះមន្ត្រីទទទួលបន្ទុកព័ត៌មាន និងសាធារណ​មតិទាំងអស់ ត្រូវពង្រឹងការអនុវត្តការងារ ដោយត្រូវដុះខាត់ជំនាញជាប្រចាំ ព្រមទាំងចាប់យក​ឱកាសថ្មីៗ ដើម្បីបំពាក់ជំនាញផ្នែកឌីជីថលបន្ថែម និងបច្ចេកទេសក្នុង​ការគ្រប់គ្រង ប្រើប្រាស់បណ្តាញសង្គមផ្លូវការរបស់ខ្លួន រួមមាន Facebook, TikTok, Instagram, YouTube, X (Twitter) និង Telegram ។ ជាងនេះទៀត ក្រុមការងារត្រូវពង្រឹងការចងក្រងបណ្តាញព័ត៌មានតាមក្រុង ស្រុក ឃុំ និងបណ្តាញការងារជាមួយ​អង្គភាពនានា​ជុំវិញខេត្ត ដើម្បីងាយស្រួលទទួល និងចែកចាយព័ត៌មានថ្មីៗ សេចក្តីជូនដំណឹង និងការផ្សព្វផ្សាយផ្សេងៗ ដែលមានសារៈសំខាន់សម្រាប់ប្រជាពលរដ្ឋក្នុងមូលដ្ឋាន និងចាំបាច់សម្រាប់​ការគ្រប់គ្រងព័ត៌មាននិង​សាធារណមតិ​ឱ្យមានប្រសិទ្ធភាព ឱ្យស្របនឹងចក្ខុវិស័យ​របស់ក្រសួងព័ត៌មានគឺ៖ លើកកម្ពស់តួនាទីជាស្ថាប័ន ទំនាក់ទំនង​សាធារណៈ​របស់​រាជរដ្ឋាភិបាល ប្រកបដោយបុរេសកម្ម សកម្ម អន្តរសកម្ម ប្រកបដោយ​គុណភាព ប្រសិទ្ធភាព និងប្រសិទ្ធផល៕

ដោយ៖ង៉ាន ទិត្យ