នាយករដ្ឋមន្រ្តីម៉ាឡេស៊ី ជួបសម្ដេចធិបតីតាមទូរសព្ទពាក់ព័ន្ធនឹងការអនុវត្តបទឈប់បាញ់កម្ពុជា-ថៃ
ភ្នំពេញ៖នាយករដ្ឋមន្រ្តីម៉ាឡេស៊ី ឯកឧត្តម អានវ៉ា អ៊ីប្រាហ៊ីម( Anwar Ibrahim) បានឱ្យដឹងថា នារសៀលថ្ងៃអង្គារ ទី១៩ ខែសីហា ឆ្នាំ២០២៥នេះលោកទើបតែបានជួបសន្ទនាតាមទូរសព្ទជាមួយសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាស្តីអំពីស្ថានការណ៍វិវត្តន៍ពាក់ព័ន្ធ នឹងការអនុវត្តបទឈប់បាញ់រវាងប្រទេសកម្ពុជានិងថៃ។
ដំណឹងនៃការសន្ទនាទូរសព្ទខាងលើ ត្រូវបានឯកឧត្តម អានវ៉ា ប្រកាសឱ្យដឹងតាមរយៈគណនីហ្វេសប៊ុកផ្លូវការរបស់លោកផ្ទាល់។នាយករដ្ឋមន្រ្តីម៉ាឡេស៊ី ដែលមានតួនាទីជាប្រធានអាស៊ានប្តូរវេនឆ្នាំនេះ បានបន្ថែមទៀត មេដឹកនាំទាំងពីរក៏បាននិយាយគ្នាផងដែរ ពាក់ព័ន្ធក្រុមសង្កេតការណ៍អន្តរកាល (IOT) ដែលបាននិងកំពុងចុះសង្កេតការណ៍ផ្ទាល់យ៉ាងយកចិត្តទុកដាក់នៅតាមតំបន់ព្រំដែននៃកម្ពុជា-ថៃ ហើយបានពិភាក្សាថែមទៀត លើចំណាត់ការផ្សេងៗបន្ថែម ដែលអាចធ្វើឡើងដើម្បីជំរុញប្រសិទ្ធភាពនៃប្រតិបត្តិការឃ្លាំមើលរបស់ IOT៕
ដោយ៖វណ្ណលុក
