(ភ្នំពេញ)៖ អ្នកនាំពាក្យក្រសួងការពារជាតិបានថ្លែងដោយរំលឹកដល់ភាគីថៃ អំពីខ្លឹមសារគោលការណ៍ទាំង ១៣ចំណុចក្នុងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ(GBC)ដែលសម្រេចបានកាលពីថ្ងៃទី៧ ខែសីហា ឆ្នាំ ២០២៥នៅទីក្រុងកូឡាឡាំពួរ ប្រទេស ម៉ាឡេស៊ី ដែលក្នុងចំណោមនេះឱ្យថៃគោរព ឱ្យបានពីការមិនផ្សព្វផ្សាយ ឬចែករំលែកព័ត៌មានមិនពិត ឬព័ត៌មានក្លែងក្លាយណាមួយឡើយ ដើម្បីបន្ធូបន្ថយភាពតានតឹង កាត់បន្ថយផលប៉ះពាល់អវិជ្ជមានទៅលើសតិអារម្មណ៍របស់សាធារណៈជន និងដែលបង្កើតបរិយាកាសមិនអំណោយផលដល់កិច្ចសន្ទនា ប្រកបដោយសន្តិភាព ។

ក្នុងសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» សម្រាប់ ថ្ងៃទី២១ ខែសីហា ឆ្នាំ២០២៥ នាទីស្តីការគណៈរដ្ឋមន្ត្រី លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិបានថ្លែងដោយរំលឹកដល់ភាគីថៃ ក្នុងចំណោមគោលការណ៍ទាំង ១៣ដែលបានឯកភាពគ្នានោះ គឺភាគីទាំង ២ បានព្រមព្រៀងមិនផ្សព្វផ្សាយ ឬចែករំលែកព័ត៌មានមិនពិត ឬព័ត៌មានក្លែងក្លាយណាមួយឡើយ ដើម្បីបន្ធូបន្ថយភាពតានតឹង កាត់បន្ថយផលប៉ះពាល់អវិជ្ជមានទៅលើសតិអារម្មណ៍របស់សាធារណៈជន និងដែលមិនបង្កើតបរិយាកាសអំណោយផលដល់កិច្ចសន្ទនា ប្រកបដោយសន្តិភាព ។

អ្នកនាំពាក្យក្រសួងករពារជាតិបានបញ្ជាក់បន្ថែមដល់ភាគីថៃថា ចំពោះកម្ពុជា មិនគាំទ្រដាច់ខាតចំពោះការផ្សាយព័ត៌មានមិនពិត ឬចែករំលែក ព័ត៌មានមិនពិត ឬផលិតព័ត៌មានក្លែងក្លាយណាមួយព្រោះទង្វើទាំងអស់នេះមិនបានជួយដល់ការបន្ធូបន្ថយភាពតានតឹង និងជួយកាត់បន្ថយផលប៉ះពាល់អវិជ្ជមានទៅលើសតិអារម្មណ៍របស់សាធារណៈជនប៉ុណ្ណោះទេ ថែមទាំងមិនបានបង្កើតបរិយាកាសអំណោយផលដល់កិច្ចសន្ទនាប្រកបដោយសន្តិភាពទៀតផង។

ដោយឡែកទាក់ទិននឹងសភាពការណ៍ទូទៅតាមខ្សែបន្ទាត់ព្រំដែនកម្ពុជានិងថៃវិញ ត្រូវបានអ្នកនាំពាក្យក្រសួងការពារជាតិកម្ពុជាឱ្យដឹងថា ៖ គិតចាប់ពីម៉ោង ១២,០០រំលងអាធ្រាត្រយប់ថ្ងៃទី ២១ ខែសីហា ឆ្នាំ២០២៥ ឈានមកដល់ម៉ោង ៦,០០នាទីព្រឹកនេះដែរ ចំពោះសភាពការាណ៍ជួរមុខនៃខ្សែ បន្ទាត់ព្រំដែនកម្ពុជា-ថៃ យោធភូមិភាគទី ៤ និង យោធភូមិភាគទី ៥ ក្នុងខេត្តព្រះវិហារ ឧត្តរមានជ័យ និងបន្ទាយមានជ័យ ស្ថានការណ៍មានសភាពស្ងប់ស្ងាត់ និង ស្ថិតនៅក្រោមការគ្រប់គ្រង របស់កម្លាំងយើង ជាមួយនឹងស្មារតីប្រុងប្រយ័ត្នខ្ពស់ ជានិច្ចក្នុងការបំពេញតួនាទីភារៈកិច្ចរបស់ខ្លួន យ៉ាងខ្ជាប់ខ្ជួនបំផុតដើម្បីការពារអធិបតេយ្យភាព និងបូរណភាពទឹកដី ឱ្យខានតែបាន៕

ដោយ ៖ ម៉ាដេប៉ូ
រូបភាព ៖ វ៉េង លឹមហ៊ួត