វ៉ាស៊ីនតោន ៖ ប្រធានាធិបតីអាមេរិក លោក Donald Trump និយាយថា រដ្ឋបាលរបស់លោកនឹងស្វះស្វែងរកការកាត់ទោសប្រហារជីវិត ក្នុងករណីមនុស្សឃាតទាំងអស់នៅទីក្រុងវ៉ាស៊ីនតោនឌី.ស៊ី ដែលនេះជាការពង្រីកយុទ្ធនាការច្បាប់ និងសណ្តាប់ធ្នាប់ ក៏ដូចជាផ្នែកនៃការបង្ក្រាបបទល្មើសរបស់លោកនៅក្នុងរដ្ឋធានីសហរដ្ឋអាមេរិក នេះបើតាមការចេញផ្សាយរបស់សារព័ត៌មាន CNN។

លោកប្រធានាធបតី Trump បាននិយាយនៅក្នុងកិច្ចប្រជុំគណៈរដ្ឋមន្ត្រីនៅសេតវិមាន កាលពីថ្ងៃអង្គារថា ប្រសិនបើនរណាម្នាក់សម្លាប់មនុស្សនៅក្នុងរដ្ឋធានី… ទីក្រុងវ៉ាស៊ីនតោន ឌី.ស៊ី នោះយើងនឹងស្វះស្វែងរកការកាត់ទោសប្រហារជីវិត ហើយនោះគឺជាវិធានការការពារដ៏រឹងមាំ… យើងគ្មានជម្រើសទេ។

ចំណាត់ការនេះ បានបញ្ជាក់ពីកិច្ចខិតខំប្រឹងប្រែងរបស់លោក Trump ក្នុងការប្រើប្រាស់អំណាចនៅរដ្ឋធានី ផ្អែកលើលទ្ធិប្រជាធិបតេយ្យ ដែលឧក្រិដ្ឋកម្មហិង្សាបានធ្លាក់ចុះពីការកើនឡើងកាលពីឆ្នាំ២០២៣ ប៉ុន្តែនៅតែជាចំណុចក្តៅមួយ ក្នុងការជជែកដេញដោលផ្នែកនយោបាយ។

សារព័ត៌មាន AFP បានរាយការណ៍ថា រដ្ឋធានីវ៉ាស៊ីនតោនបានលុបចោលច្បាប់កាត់ទោសប្រហារជីវិតក្នុងឆ្នាំ១៩៨១។ ហើយការអំពាវនាវចង់ឱ្យមានការកាត់ទោសប្រហារជីវិតរបស់លោកប្រធានាធិបតី Trump កើតឡើងបន្ទាប់ពីមេដឹកនាំអាមេរិករូបនេះ ទើបតែបានដាក់ពង្រាយកងទ័ពឆ្មាំជាតិទៅកាន់រដ្ឋធានីវ៉ាស៊ីនតោន ដែលគ្រប់គ្រងដោយគណបក្សប្រជាធិបតេយ្យ និងបានប្រើសិទ្ធិអំណាចគ្រប់គ្រងលើស្ថាប័នប៉ូលិលប្រចាំរដ្ឋនេះ កាលពីដើមខែសីហាកន្លងទៅ។

ទន្ទឹមគ្នា លោកប្រធានាធិបតី Trump មានវ័យ៧៩ឆ្នាំរូបនេះ ក៏បានព្រមានដែរថា រូបលោកក៏កំពុងពិចារណាដាក់ពង្រាយកងទ័ពឆ្មាំជាតិទៅកាន់ទីក្រុងមួយចំនួនទៀត ដែលដឹកនាំគណបក្សប្រជាធិបតេយ្យ មានដូចជា Chicago, New York និង Baltimore ផងដែរ៕

ប្រភព ៖ CNN និង AFP ប្រែសម្រួល ៖ ឈឹម ទីណា