រដ្ឋបាលខេត្តបាត់ដំបង៖សមរភូមិក្រោយ និងសមរភូមិមុខផ្សាភ្ជាប់គ្នាមិនរវាត
បាត់ដំបង៖ដំណើរសាកសួរសុខទុក្ខបន្តជាថ្មីទៀតបានកើតឡើងកាលពីថ្ងៃទី៣ ខែកញ្ញា ឆ្នាំ២០២៥ ។គណៈប្រតិភូរដ្ឋបាលខេត្តបាត់ដំបងដឹកនាំដោយឯកឧត្ដម អ៊ុយ រី ប្រធានក្រុមប្រឹក្សាខេត្ត ឯកឧត្តម សុខ លូ អភិបាលខេត្តបាត់ដំបង បានអញ្ជើញទៅសាកសួរសុខទុក្ខ និងនាំយកនូវអំណោយរបស់សប្បុរសជននានាតាមរយៈរដ្ឋបាលខេត្តទៅជូនដល់កងកម្លាំងដែលកំពុងតែឈរជើងនៅតាមខ្សែបន្ទាត់ព្រំដែនកម្ពុជា -ថៃក្នុងភូមិសាស្រ្តខេត្តបាត់ដំបង។
ជាមួយនឹងការសំណេះសំណាលនិងការនាំបណ្ដាំផ្ញើសួរសុខទុក្ខពីថ្នាក់ដឹកនាំកំពូលៗដល់កងទ័ពទាំងអស់ ឯកឧត្តម សុខ លូ ក៏បានថ្លែងអំណរគុណដល់គ្រប់កងកម្លាំងប្រដាប់អាវុធទាំងអស់ ចំពោះការលះបង់ក្នុងការតស៊ូ ក្នុងបុព្វហេតុការពារជាតិការពារមាតុភូមិ ការពារនូវបូរណភាពទឹកដី ប្រកបដោយភាពដ៏អង់អាចក្លាហាន និងឈរជើងការពារយ៉ាងរឹងមាំនៅតាមខ្សែបន្ទាត់ព្រំដែន។
ឯកឧត្តមអភិបាលខេត្តបានបន្តថា ចំពោះអំណោយរបស់សប្បុរសជននាពេលនេះ គឺជាការជួយគាំទ្រដល់កងកម្លាំងជួរមុខក្រោមស្មារតីស្នេហាជាតិនិងការចូលរួមចំណែកជួយជាតិ តាមរយៈសមរភូមិក្រោយជួយសមរភូមិជួរមុខ។
ក្នុងនាមរដ្ឋបាលខេត្តបាត់ដំបងឯកឧត្តម សុខ លូ មិនភ្លេចថ្លែងអំណរគុណជូនចំពោះសប្បុរសជននៅក្នុងខេត្ត ក៏ដូចជាក្រៅខេត្តដែលបានឧបត្ថម្ភគាំទ្រជាថវិកា គ្រឿងឧបភោគបរិភោគ និងសម្ភារប្រើប្រាស់ផ្សេងៗ សម្រាប់ចូលរួមទ្រទ្រង់ដល់ពលករខ្មែរវិលត្រឡប់ពីប្រទេសថៃ និងជួយឧបត្ថម្ភគាំទ្រដល់កងកម្លាំងជួរមុខដោយទឹកចិត្តក្លៀវក្លា។
ឯកឧត្តមលើកទឹកចិត្តឱ្យសកម្មភាពនេះបន្តជាចីរកាល៕
អត្ថបទ-រូបភាព៖អ៊ុក សំអាន បប.
