និស្សិតប្រាំមួយរូប តំណាងឱ្យកម្ពុជានឹងទៅចូលរួមក្នុងកម្មវិធី«មហាសន្និបាតអន្តរសភាអាស៊ានលើកទី៤៦» នៅម៉ាឡេស៊ី
ភ្នំពេញ៖និស្សិតចំនួនប្រាំមួយរូបត្រូវបានជ្រើសរើសតំណាងឱ្យប្រទេសកម្ពុជា ចូលរួមជាសមាជិកគណៈប្រតិភូរដ្ឋសភានៃព្រះរាជាណាចក្រកម្ពុជា ក្នុង«កម្មវិធីមហាសន្និបាតអន្តរសភាអាស៊ានលើកទី៤៦» និង «5th Model AIPA» ដែលនឹងប្រព្រឹត្តទៅចាប់ពីថ្ងៃទី២០ដល់ថ្ងៃទី២២ ខែកញ្ញា ឆ្នាំ២០២៥ នៅទីក្រុងគូឡាឡាំពួ ប្រទេសម៉ាឡេស៊ី។ យុវជនទាំងប្រាំមួយរូបនេះ ត្រូវបានជ្រើសរើសដោយAIPA Secretariat ។
«កម្មវិធីមហាសន្និបាតអន្តរសភាអាស៊ានលើកទី៤៦» នឹងមានការចូលរួមពីថ្នាក់ដឹកនាំអាស៊ានទាំង១០ប្រទេស និងមានតំណាងមកពីប្រទេសចំនួន២៥ផ្សេងទៀតនឹងចូលរួមជាអ្នកចូលរួមអង្កេត។និស្សិតទាំងប្រាំមួយរូប នឹងចូលរួមផ្នែកមួយនៃកម្មវីធីដែលជាកិច្ចសន្ទនាយុវជនលើឆាកអន្តរជាតិ តំណាងកម្ពុជា ដើម្បីជជែកវែកញែកលើប្រធានបទនានាពាក់ព័ន្ធនឹងសេដ្ឋកិច្ច សង្គម និងនយោបាយ ជាមួយនឹងយុវជនមកពីបណ្តាប្រទេសអាស៊ានផ្សេងទៀត។
និស្សិតទាំងប្រាំមួយរូបរួមមាន និស្សិតមកពីវិទ្យាស្ថានសិក្សាអន្តរជាតិ និងគោលនយោបាយសាធារណ:ចំនួនបីរូប គឺ កញ្ញា ផេង ចាន់ដាលីស ជានិស្សិតឆ្នាំទី២ផ្នែកទំនាក់ទំនងអន្តរជាតិ, កញ្ញា សម្ភស្ស កន្នីថា ជានិស្សិតឆ្នាំទី៣ផ្នែក ទំនាក់ទំនងអន្តរជាតិ, កញ្ញា គឹម សុខធា ជានិស្សិតឆ្នាំទី៤ផ្នែកទំនាក់ទំនងអន្តរជាតិ។សាកលវិទ្យាល័យជាតិគ្រប់គ្រង មានលោក អៀង សុវណ្ណ ម៉ាន់ដេ ជានិស្សិតឆ្នាំទី៣ផ្នែកនីតិសាស្ត្រ កញ្ញា ម៉ុត ចាន់ស្រីទីន ជាអតីតនិស្សិតជំនាន់ទី ២៩ ផ្នែកសហគ្រិនភាពនិងនវានុវត្តន៍សកល។សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច លោក ហុក ហួរឈុនហ៊ូរ និស្សិតឆ្នាំទី៤ផ្នែកនីតិសាស្ត្រជាភាសាខ្មែរ និងជាភាសាអង់គ្លេស។
លោក អៀង សុវណ្ណ ម៉ាន់ដេ ជានិស្សិត ឆ្នាំទី៣ផ្នែកនីតិសាស្ត្រ នៃសាកលវិទ្យាល័យជាតិគ្រប់គ្រង បាននិយាយថា «ក្នុងនាមជាយុវជនមួយរូប ខ្ញុំមានសេចក្តីសោមនស្សរីករាយដែលបានតំណាងកម្ពុជាលើឆាកអន្តរជាតិតាមរយៈចូលរួមជាសមាជិកគណៈប្រតិភូរដ្ឋសភា នៃព្រះរាជាណាចក្រកម្ពុជា ដែលវាជាឱកាសឱ្យខ្ញុំ និងយុវជនកម្ពុជាប្រាំរូបផ្សេងទៀតអាចបញ្ចេញនូវសមត្ថភាព ដើម្បីបង្ហាញពីកម្ពុជាទៅកាន់ប្រទេសផ្សេងៗទៀតដែលចូលរួម ពីវប្បធម៌ និងកិច្ចសហប្រតិបត្តិការដែលកម្ពុជាបានប្រកាន់ខ្ជាប់ជាមួយថ្នាក់ជាតិ និងថ្នាក់តំបន់ ព្រមទាំងជាឱកាសដើម្បីអាចឈ្វេងយល់ពីបញ្ហាប្រឈមនានាដែលកំពុងកើតឡើងក្នុងតំបន់អាស៊ាន និងរៀនសូត្រពីគ្នា។»។
លោកបានបន្តថា តាមរយៈកម្មវិធីសន្និបាតនេះ យុវជនកម្ពុជាប្រាំមួយរូប នឹងអាចទទួលបាននូវចំណេះដឹងពាក់ព័ន្ធនឹងការអភិវឌ្ឍសេដ្ឋកិច្ច អភិបាលកិច្ច និងបញ្ហាសង្គម ពីបណ្តាប្រទេសផ្សេងទៀត និងបង្កើតបណ្តាញជាមួយនឹងយុវជនមកពីប្រទេសផ្សេងទៀត ដើម្បីបង្កើតនូវកិច្ចសន្ទនាដែលអាចចូលរួមចំណែកក្នុងការសម្រេចបាននូវសមិទ្ធផលដែលអាចផ្តល់ផលប្រយោជន៍ដល់អាស៊ាន និងប្រទេសកម្ពុជា។
គប្បីជម្រាបជូនថា កម្មវីធីជជែកវែកញែកនេះ នឹងផ្តោតលើមូលបទ “ការពង្រឹងការចូលរួមរបស់យុវជននៅក្នុងរបៀបវារៈនិរន្តរភាព និងបរិយាបន្ន” នឹងប្រព្រឹត្តទៅចាប់ពីថ្ងៃទី២០ដល់ថ្ងៃទី២២ ខែកញ្ញានៅទីក្រុងគូឡាឡាំពួ ប្រទេសម៉ាឡេស៊ី៕
ដោយ៖ម៉ាដេប៉ូ
