ភ្នំពេញ៖ សម្ដេចនាយករដ្ឋមន្ត្រី ហ៊ុន ម៉ាណែត និងលោកជំទាវជំទាវបណ្ឌិត បានអញ្ជើញជួបជាមួយក្រុមគ្រួសារ របស់វីរកងទ័ពកម្ពុជាទាំង ១៨រូប ដែលត្រូវបានទាហនថៃចាប់ខ្លួន​ នៅវិមានសន្តិភាព រាជធានីភ្នំពេញ នារសៀលថ្ងៃសុក្រ ទី១៩ កញ្ញា ២០២៥ ដើម្បីសាកសួរសុខទុក្ខ និងបញ្ជាក់អំពីជំហររបស់រាជរដ្ឋាភិបាល​ ដែលបាន និងកំពុងធ្វើការយ៉ាងសកម្មលើគ្រប់យន្តការទាំងអស់ ដើម្បីស្វែងរកដំណោះស្រាយ​ក្នុងការ​ការពារអាយុជីវិត​,​ សេចក្តីសុខសុវត្ថិភាព​ និងព្យាយាមឱ្យដោះលែងកងកម្លាំង របស់យើងទាំង ១៨នាក់នោះ វិលត្រឡប់មកវិញ ឱ្យបានឆាប់រហ័ស ។

នេះជាជំនួបលើកដំបូងបំផុត នៃក្រុមគ្រួសារយុទ្ធជន​ជួរមុខកម្ពុជា ជាមួយសម្តេចប្រមុខរដ្ឋាភិបាល បន្ទាប់ពី​យុទ្ធជនទាំង ១៨នាក់ ស្ថិតក្រោមការឃុំខ្លួនអស់រយៈពេល ជាង ៥០ថ្ងៃ ។ ជំនួបនេះធ្វើឡើងមុននឹងពិធី​បុណ្យភ្ជុំបិណ្ឌមកដល់ ។

កងទ័ពជួរមុខកម្ពុជាចំនួន ២០នាក់ ត្រូវកងទ័ពថៃ បញ្ឆោតចាប់​ខ្លួន​ជាឈ្លើយសឹក និងយកទៅដាក់ការឃុំឃាំងចាប់តាំងពីថ្ងៃទី ២៩ខែកក្កដា មកម្ល៉េះ គឺប៉ុន្មានម៉ោងប៉ុណ្ណោះ ក្រោយពីបទឈប់​បាញ់ ចូលជាធរមាន ។ កងទ័ពចំនួន ២នាក់ ត្រូវបានដោះ​លែង​មកវិញ។

ប្រទេសថៃ មិនព្រមដោះលែងកងទ័ពខ្មែរ ១៨នាក់ ដែលនៅសេសសល់នោះទេ ទោះជាមានការទទូច​ពីរាជរដ្ឋាភិបាលកម្ពុជា និងមានការស្តីបន្ទោសពីសហគមន៍​អន្តរជាតិ​មួយចំនួនក៏ដោយ ។

គណៈកម្មាធិការអន្តរជាតិនៃកាកបាទក្រហម(ICRC) កាលពីពេល​​ថ្មីៗនេះ បានបញ្ជាក់ថា កងទ័ពកម្ពុជាទាំង ១៨នាក់ មានសុវត្ថិភាព និងសុខភាពល្អធម្មតា ហើយពួកគេបានផ្ញើលិខិត​តាម​រយៈអង្គការអន្តរជាតិនេះ ​មកកាន់ក្រុមគ្រួសារពួកគេទៀត​ផង ៕