អភិបាលខេត្តកំពង់ចាម៖ ការខិតខំបំពេញភារកិច្ចរបស់ថ្នាក់ដឹកនាំ និងមន្ត្រីក្រោមឱវាទធ្វើឱ្យកំណើនសេដ្ឋកិច្ចខេត្តកើនឡើង
កំពង់ចាម៖ អភិបាលខេត្តកំពង់ចាម ឯកឧត្តម អ៊ុន ចាន់ដា បានអះអាងថា ដោយសារការខិតខំប្រឹងប្រែងបំពេញការងាររបស់ថ្នាក់ដឹកនាំ និងមន្ត្រីរាជការក្រោមឱវាទគ្រប់លំដាប់ថ្នាក់ធ្វើឱ្យសេដ្ឋកិច្ចក្នុងខេត្តមានការកើនឡើង និងមានការអភិវឌ្ឍទទួលបានសមិទ្ធផលជាច្រើនក្នុងឆ្នាំ២០២៤កន្លងទៅ។
ក្នុងឱកាសសំណេះសំណាលជាមួយមន្ត្រីរាជការ និងនិវត្តន៍ជននៅសាលាខេត្តកំពង់ចាម ក្នុងឱកាសបុណ្យកាន់បិណ្ឌ ភ្ជំបិណ្ឌដោយមានការចូលរួមជាអធិបតីពីឯកឧត្តម ខ្លូត ផន ប្រធានក្រុមប្រឹក្សាខេត្តផងឯកឧត្តមអភិបាលខេត្តកំពង់ចាមបានយកឱកាសនេះសម្ដែងការអបអរសម្រាប់ការខិតខំប្រឹងប្រែងរួមគ្នាបំពេញភារកិច្ច ទាំងថ្នាក់ដឹកនាំ និងមន្ត្រីរាជការនៃរដ្ឋបាលខេត្ត ដែលធ្វើឱ្យមានការអភិវឌ្ឍទទួលបាននូវសមិទ្ធផលជាច្រើននាឆ្នាំ២០២៤ កន្លងទៅ ។
ឯកឧត្តមអភិបាលខេត្តបានបន្តថា ការអភិវឌ្ឍរបស់រដ្ឋបាលខេត្តក្នុងឆ្នាំ ២០២៤ កន្លងទៅឃើញថា កត្តាសេដ្ឋកិច្ចមានកំណើនខ្ពស់ដែលទំហំទឹកប្រាក់មានចំនួន ២.៦៥៧ លានដុល្លារ ដែលការរីកចម្រើននេះ ពាក់ព័ន្ធទៅលើវិស័យធំៗមានដូចជា វិស័យកសិកម្ម វិស័យសេវាកម្ម និងវិស័យឧស្សាហកម្ម សិប្បកម្ម ។
ឯកឧត្តមអភិបាលខេត្តបន្តថា លទ្ធផលដែលទទួលបានល្អ គឺដោយសារក្នុងនោះ ការងាររក្សាសន្តិសុខ បង្កបរិយាកាសដល់អ្នកវិនិយោគ ឱ្យមានសុវត្ថិភាពធ្វើឱ្យពួកគាត់ដាក់ទុនបន្ត។ ការបម្រើសេវាសាធារណៈ គឺសេវារដ្ឋបាល ផ្ដល់តាមរយៈអង្គភាពច្រកចេញចូលតែមួយ ដែលបង្កលក្ខណៈងាយស្រួល ផ្ដល់នូវភាពស្របច្បាប់ តាមរយៈការផ្ដល់ឯកសារនានា ឬការស្នើសុំនូវអាជ្ញាបណ្ណធ្វើអាជីវកម្មផ្សេងៗ ។
ទន្ទឹមនឹងនោះ ការកសាងប្រព័ន្ធផ្លូវគមនាគមន៍ ការកសាងសាលារៀន មន្ទីរពេទ្យ ជាការផ្ដល់សេវាបណ្ដុះបណ្ដាល សេវាគាំពារសុខភាពប្រជាពលរដ្ឋ ដែលទាំងអស់នោះគឺមានការប្រទាក់ក្រឡាគ្នា ដែលបានផ្តល់ផលប្រយោជន៍ទូទៅដល់ប្រជាពលរដ្ឋយើងុំ ។ ដូច្នេះកត្តារក្សាសន្តិសុខសណ្ដាប់ធ្នាប់បានល្អ ក៏ដូចជាការបម្រើសេវាសាធារណៈបានល្អ ធ្វើឱ្យមានអ្នកដាក់ទុនមករកស៊ីនៅក្នុងខេត្តកាន់តែច្រើន ឱកាសការងារដល់ប្រជាពលរដ្ឋក៏មានកាន់តែច្រើនផងដែរ ៕
ដោយ៖លី ពៅ
