សម្ដេចតេជោ ហ៊ុន សែន៖ ៧ មករា ឆ្នាំ១៩៧៩ បានបើកសករាជថ្មី ដែលបាននាំមកវិញនូវសិទ្ធិគ្រប់បែបយ៉ាងជូនប្រជាជនកម្ពុជាគ្រប់រូបដល់សព្វថ្ងៃនេះ
(ភ្នំពេញ)៖ ៧ មករា ឆ្នាំ១៩៧៩ បានបើកសករាជថ្មី ដែលបាននាំមកវិញនូវសិទ្ធិគ្រប់បែបយ៉ាង ជូនប្រជាជនកម្ពុជាគ្រប់រូបរហូតដល់សព្វថ្ងៃនេះ បន្ទាប់ពីថ្ងៃ ៧ មករា បានបញ្ចប់របបសករាជដ៏ខ្មៅងងឹតបំផុត ។ នេះជាប្រសាសន៍គូសបញ្ជាក់របស់សម្តេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន ប្រមុខរដ្ឋស្ដីទី និងជាប្រធានសមាគមអតីតយុទ្ធជនកម្ពុជា ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីបើកមហាសន្និបាតវិសាមញ្ញតំណាងសមាគមអតីតយុទ្ធជនកម្ពុជាទូទាំងប្រទេស នាថ្ងៃទី២៩ ខែកញ្ញា ឆ្នាំ២០២៥ នៅទីស្តីការក្រសួងមហាផ្ទៃ រាជធានីភ្នំពេញ ដោយមានការអញ្ជើញចូលរួមពីសំណាក់សមាជិកគណៈអចិន្ត្រៃយ៍ ថ្នាក់ដឹកនាំ សមាជិកសមាជិកាជាតំណាងអតីតយុទ្ធជន និងនិវត្តជនគ្រប់ប្រភេទ ព្រមទាំងភ្ញៀវកិត្តិយស សរុបប្រមាណ ៤០០នាក់ ។
សម្តេចតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន មានប្រសាសន៍ថា ជ័យជំនះថ្ងៃ៧ មករា ឆ្នាំ១៩៧៩ បានបញ្ចប់របបសករាជដ៏ខ្មៅងងឹតបំផុត និងបើកសករាជថ្មីរបស់កម្ពុជា គឺឯករាជសេរីភាព ប្រជាធិបតេយ្យ និងវឌ្ឍនភាពសង្គម ដើម្បីជួយសង្គ្រោះអាយុជីវិតប្រជាពលរដ្ឋរាប់លាននាក់ពីគ្រោះមហ្ដរាយ និងគ្រោះមរណៈ ដែលបាននាំមកវិញនូវសិទ្ធិគ្រប់បែបយ៉ាង ជូនប្រជាជនកម្ពុជាគ្រប់រូបរហូតដល់សព្វថ្ងៃនេះ ។
សម្តេចតេជោ ហ៊ុន សែន បានបញ្ជាក់ថា ដោយឈរលើមាគ៌ានេះ កម្ពុជាបានបញ្ចប់សង្គ្រាមដ៏រ៉ាំរ៉ៃ ដែលនាំមកសន្ដិភាពភាព ឯកភាពជាតិដ៏ពេញលេញ និងឯកភាពទឹកដីទាំងស្រុង ចាប់តាំងពីឆ្នាំ១៩៩៨មក ដោយមានយុទ្ធសាស្រ្ដឌីហ្វិត គឺជាយុទ្ធសាស្រ្ដមួយ ដើម្បីឈានទៅរំលាយអង្គការចាត់តាំងនយោបាយ និងយោធារបស់ខ្មែរក្រហមទាំងស្រុងតាមរយៈការអនុវត្ដដោយជោជ័យ នៃនយោបាយឈ្នះឈ្នះ ។
សម្តេច ហ៊ុន សែន ប្រមុខរដ្ឋស្តីទី និងជាប្រធានសមាគមអតីតយុទ្ធជនកម្ពុជា បានថ្លែងថា រាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា បានយកចិត្តទុកដាក់ខ្ពស់ចំពោះបងប្អូនអតីតយុទ្ធជន និងបានដាក់ចេញនូវគោលនយោបាយនានា ដើម្បីគុណប្រយោជន៍របស់អតីតយុទ្ធជន ការកែលម្អជីវភាពអតីតយុទ្ធជន និងក្រុមគ្រួសារសព អតីតយុទ្ធជន ។
សម្តេចប្រធានសមាគមអតីតយុទ្ធជនកម្ពុជា បានគូសបញ្ជាក់ថា សមាគមអតីតយុទ្ធជនកម្ពុជា នឹងត្រូវផ្លាស់ប្តូរទៅជាសមាគមអតីតយុទ្ធជន និងនិវត្តជនកម្ពុជាវិញ ដោយការសម្រេចឲ្យពួកគាត់ជ្រកក្រោមដំបូលតែមួយនេះ ដើម្បីបង្ហាញអំពីការផ្សារភ្ជាប់កាន់តែកៀកជាមួយមន្ត្រីរាជការស៊ីវិលដែលចូលនិវត្តន៍ និងអតីតយុទ្ធជន ។
សម្តេចតេជោ ហ៊ុន សែន បានចាត់ទុកថា អតីតយុទ្ធជន និងនិវត្តជន បានដាក់ក្នុងក្រោមដំបូលសមាគមតែមួយ គឺពិតជាល្អខ្លាំងណាស់ ដើម្បីកុំឲ្យពួកគាត់ឃ្លាតឆ្ងាយពីយើង ៕
អត្ថបទ៖ វណ្ណលុក
រូប៖ វ៉េង លីមហួត និង សួង ពិសិដ្ឋ
