សិង្ហបុរី ៖ ប្រទេសសិង្ហបុរីនឹងបញ្ឈប់ការចុះបញ្ជីរថយន្តដែលប្រើសាំង ថ្មី ចាប់ពីឆ្នាំ ២០៣០ ដោយជំរុញផែនការរបស់ខ្លួន ក្នុងការបញ្ឈប់ឡានម៉ាស៊ីនចំហេះខាងក្នុង ឬ ICE ទាំងអស់ នៅឆ្នាំ២០៤០ និង ពន្លឿនការទទួលយក ដំណើរការដឹកជញ្ជូនប្រើប្រាស់ថាមពលស្អាត ជាងមុន។

ចំនួនរថយន្តអគ្គិសនី ឬ EV នៅក្នុងប្រទេសសិង្ហបុរីបានកើនឡើង ពី ២៦,២០០ គ្រឿង កាលពីដំណាច់ឆ្នាំ ទៅ ៣៩,៨០០ គ្រឿង រហូតមកដល់ឆ្នាំនេះ ដែលជាការកើនឡើង ៥២% ។

ការផ្លាស់ប្តូរនេះ បានធ្វើឱ្យមានការព្រួយបារម្ភ ក្នុងចំណោមអ្នកចូលចិត្តរថយន្ត អំពីការបាត់បង់តម្លៃវប្បធម៌ និង អារម្មណ៍នៃម៉ាស៊ីនសាំង ក៏ដូចជា សំណួរជុំវិញហេដ្ឋារចនាសម្ព័ន្ធ នៃការសាកថ្ម និង ការបន្តប្រើប្រាស់រថយន្តសាំង សម្រាប់សេវាសង្គ្រោះបន្ទាន់។

អ្នកជំនាញក៏ព្រមានថា ការផ្លាស់ប្តូរនេះ នឹងរំខានដល់ឧស្សាហកម្មស្ថានីយប្រេងឥន្ធនៈ ដោយស្ថានីយជាច្រើន អាចក្លាយជាគ្មានប្រាក់ចំណេញ ឬ ត្រូវការ ការសម្របខ្លួនដ៏សំខាន់ ហើយគូសបញ្ជាក់ ពីការសាកថ្មយឺត នៅផ្ទះ កន្លែងធ្វើការ ឬហាងទំនិញ។ តែ អាជ្ញាធរកំពុងជំរុញដំណោះស្រាយ ការសាកថ្ម ឆ្លាតវៃ ដើម្បីគ្រប់គ្រងតម្រូវការឡានអគ្គិសនី រួមទាំង ការកំណត់កាលវិភាគ និងការគ្រប់គ្រងបន្ទុក ដែលប្រសើរឡើង។

អាជ្ញាធរដឹកជញ្ជូនផ្លូវគោក ហៅកាត់ LTA រាយការណ៍ថា ប្រទេសសិង្ហបុរី គឺ ស្ថិតនៅពាក់កណ្តាលគោលដៅរបស់ខ្លួន ដែលត្រូវមានកន្លែង សាកថ្ម ៦០,០០០កន្លែង នៅឆ្នាំ២០៣០ ជាមួយនឹង ២៤,០០០ កន្លែង ដែលត្រូវបានដំឡើងរួចហើយ ហើយ ការសិក្សាកំពុងបន្តដើម្បីវាយតម្លៃផលប៉ះពាល់លើហេដ្ឋារចនាសម្ព័ន្ធថាមពល របស់ប្រទេស។

ទោះបីជាមានការរីកចម្រើនផ្នែកហេដ្ឋារចនាសម្ព័ន្ធក៏ដោយ អ្នកជំនាញសង្កត់ធ្ងន់ថា បញ្ហាប្រឈមធំបំផុត នឹងផ្លាស់ប្តូរទម្លាប់អ្នកប្រើប្រាស់ ដោយសារម្ចាស់រថយន្ត EV ត្រូវការសម្របខ្លួនទៅនឹងគំរូនៃការសាកថ្ម ដែលខុសពីការចាក់សាំង តាមបែបប្រពៃណី រួមទាំងការសាកថ្មក្នុងអំឡុងពេលសកម្មភាពប្រចាំថ្ងៃ ឬ ពេលយប់៕

ប្រភពពី VNexpress ប្រែសម្រួល ៖ សារ៉ាត