(ភ្នំពេញ)៖ លោក សុខ ពេញវុធ អភិបាលរងរាជធានីភ្នំពេញ បានសង្កេតឃើញថា មានការចូលរួមយ៉ាងសកម្ម និងផុសផល ពីប្រជាពលរដ្ឋ ក្នុងវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សារាជធានីភ្នំពេញ អាណត្តិទី៤ នៅខណ្ឌដូនពេញ សម្រាប់ព្រឹកថ្ងៃទី១៤ ខែតុលា ឆ្នាំ២០២៥នេះ បើទោះបីសំណូមពរ និងសំណើរផ្ទាល់មាត់មានចំនួនតិចក្តី ។

ក្នុងវេទិកានេះ ត្រូវបាន ឯកឧត្តម ជួប ខុន សមាជិកក្រុមប្រឹក្សារាជធានីភ្នំពេញ តំណាងឯកឧត្តម ម៉ប សារិន ប្រធានក្រុមប្រឹក្សា បានបញ្ជាក់ថា ការខិតខំប្រឹងប្រែងរបស់ អាជ្ញាធរពីថ្នាក់លើ រហូតដល់ថ្នាក់មូលដ្ឋាន ដែលមានការសហការគ្នាបានយ៉ាងល្អ ក្នុងការដោះស្រាយបញ្ហា និងសំណូមពររបស់ប្រជាពលរដ្ឋ ដែលបានស្នើឡើង កាលពីឆ្នាំមុន ដោយសម្រេចបានស្ទើតែទាំងស្រុង ជូនដល់ប្រជាពលរដ្ឋ។

ក្នុងឱកាសនោះមានប្រជាពលរដ្ឋ បានលើកឡើងដោយផ្ទាល់មាត់ នូវសំណូមពររបស់ខ្លួន ចង់ឱ្យជួយផ្លាស់ប្តូរអំពូលភ្លើងបំភ្លឺផ្លូវសាធារណៈដែលខូចៗ និងស្នើសុំឱ្យមានការជួយសម្របសម្រួល ដល់កិច្ចការកែតម្រូវសំបុត្រកំណើត ខណៈដែលពលរដ្ឋរូបនេះ ក៏បានថ្លែងអំណរគុណដល់ រដ្ឋបាលរាជធានីភ្នំពេញ ដែលបានជួយកែលម្អហេរដ្ឋារចនាសម្ព័ន្ធផ្លូវថ្នល់ ជូនប្រជាពលរដ្ឋខណ្ឌដូនពេញ បានយ៉ាងល្អប្រសើរ ។

ជាមួយគ្នានេះ ក៏មានតំណាងគ្រូបង្រៀន ស្នើសុំឱ្យអាជ្ញាធរ ជួយដាក់គំនូសចរាចរណ៍ ប្រុងប្រយ័ត្ន នៅតាមផ្លូវតូចៗជាប់នឹងសាលារៀន ដើម្បីកាត់បន្ថយគ្រោះថ្នាក់ចរាចរណ៍ ជូនដល់សិស្សានុសិស្ស និងជួយស្តាលូ ក្នុងសាលារៀន ដើម្បីឱ្យទឹកភ្លៀងហូរច្រោះបានលឿន។

ឆ្លើយតបនឹងសំណូមពររបស់ពលរដ្ឋ ស្នើសុំផ្លាស់ប្តូរអំពូលភ្លើង និងកាត់លះមែកឈើសាធារណៈ លោក សុខ ពេញវុធ បានប្រគល់ភារកិច្ចនេះ ជូនមន្ទីរសាធារណការ និងដឹកជញ្ជូនរាជធានីភ្នំពេញ ចុះពិនិត្យនិងដោះស្រាយជូនតាមសំណូមពរ ។ ពាក់ព័ន្ធនឹងការកែតម្រូវសំបុត្រកំណើត ត្រូវបាន លោក បានបញ្ជាក់ទៅវិញថា ជាកិច្ចការមួយ ដែលមិនអាចកំណត់បានជាក់ស្តែង នូវថេរវេលានោះទេ អាស្រ័យទៅតាមការកែតម្រូវនៃសំបុត្រកំណើតនេះ ។

ចំពោះការស្នើសុំដាក់គំនូសចរាចរណ៍ នៅតាមផ្លូវជុំវិញគ្រឹះស្ថានសិក្សា លោក សុខ ពេញវុធ បានសម្តែងការគាំទ្រ និងបានបញ្ជាក់ថា កិច្ចការទាំងនេះ រដ្ឋបាលរាជធានីភ្នំពេញ បានយកចិត្តទុកដាក់ខ្ពស់ និងកំពុងតែសិក្សា ក៏ដូចជាអនុវត្តផងដែរ ធ្វើយ៉ាងណា កាត់បន្ថយនូវគ្រោះថ្នាក់នានា ដល់សិក្សានុសិស្ស និង លោកគ្រូ អ្នកគ្រូ។ ដោយឡែក សំណូមពរ ក្នុងការស្តាលូ នៅតាមគ្រឹះស្ថានសិក្សា ក៏ត្រូវបាន លោកអភិបាលរង ឯកភាព និងសម្រេចប្រគល់ភារកិច្ចជូនអង្គភាពពាក់ព័ន្ធ ដោះស្រាយជូនផងដែរ ។

លោកអភិបាលរង ក៏បានគូសបញ្ជាក់ថា ស្ថានភាពការគ្រប់គ្រងសំរាម នៅរាជធានីភ្នំពេញ ត្រូវបានសោះស្រាយបានយ៉ាងល្អជូនពលរដ្ឋ ជាពិសេសបណ្តាខណ្ឌកណ្តាលរាជធានីភ្នំពេញតែម្តង ដែលបានបំពេញតួនាទីភារកិច្ច ប្រកបដោយការទទួលខុសត្រូវយ៉ាងល្អប្រសើរ ៕

ដោយ ៖ ហេង សម្បត្តិ+ ថេត វិចិត្រ