(ប្រទេសសិង្ហបុរី)៖ ឯកឧត្តម សំ សិទ្ធិសិរី អគ្គនាយកនៃអគ្គនាយកដ្ឋានបច្ចេកវិទ្យា គមនាគមន៍និងព័ត៌មាន នៃក្រសួងប្រៃសណីយ៍និងទូរគមនាគមន៍ កាលពីថ្ងៃទី២៨ ខែតុលា ឆ្នាំ២០២៥ បានដឹកនាំក្រុមធុរកិច្ចថ្មីឌីជីថលចំនួន ៨ ក្រុមដែលត្រូវបានជ្រើសរើសចេញពីកម្មវិធី Plug and Play Cambodia Accelerator batch 1 ដើម្បីចូលរួមកម្មវិធី APAC Summit 2025 ដែលរៀបចំដោយ Plug and Play Asia Pacific នៅប្រទេសសិង្ហបុរី។ កម្មវិធីនេះមានការចូលរួមពីបណ្ដាក្រុមធុរកិច្ចថ្មីល្អៗជាង ៥០ ក្រុមមកពីប្រទេសផ្សេងៗក្នុងតំបន់អាស៊ីប៉ាសុីហ្វិក និងបានទាក់ទាញការចូលរួមពីអ្នកវិនិយោគ និងសហគមន៍ធុរកិច្ចថ្មីឌីជីថល ក្រុមហ៊ុនបច្ចេកវិទ្យាឌីជីថលអន្តរជាតិប្រហែល ៧០០នាក់។

កម្មវិធីនេះគឺជាវេទិកាដ៏សំខាន់មួយ ដែលផ្តល់ឱកាសដល់ធុរកិច្ចថ្មីឌីជីថលកម្ពុជាបានធ្វើបទបង្ហាញ (Pitching) ណែនាំពីផលិតផលឬសេវាកម្ម, សមត្ថភាពនវានុវត្ត, តម្រូវការវិនិយោគរបស់ខ្លួនទៅកាន់អ្នកវិនិយោគ ដើម្បីអាចពង្រីកខ្លួនទៅកាន់ថ្នាក់តំបន់ និងអន្ដរជាតិឱ្យកាន់តែទូលំទូលាយ។

ការចូលរួមរបស់ក្រុមធុរកិច្ចថ្មីឌីជីថលកម្ពុជានៅក្នុងកម្មវិធី APAC Summit មិនត្រឹមតែបង្ហាញពីសមត្ថភាពនៃសហគ្រិនកម្ពុជានៅលើវេទិកាអន្តរជាតិទេ ប៉ុន្តែថែមទាំងជាផ្នែកមួយយ៉ាងសំខាន់នៃការអភិវឌ្ឍប្រព័ន្ធអេកូឡូស៊ីធុរកិច្ចថ្មីឌីជីថលរបស់កម្ពុជា ដែលក្រសួងកំពុងពង្រឹងជាបន្តបន្ទាប់។

ក្រសួងប្រៃសណីយ៍និងទូរគមនាគមន៍ សូមជូនពរដល់ក្រុមធុរកិច្ចថ្មីទាំង ៨ ទទួលបានជោគជ័យបន្ដទៀតក្នុងការទាក់ទាញវិនិយោគ និងពង្រីកសកម្មភាពរបស់ខ្លួនទៅកាន់ទីផ្សារថ្មីៗ៕

ដោយ ៖ ង៉ាន់ ទិត្យ