ក្រសួងអធិការកិច្ច សហការជាមួយ ក្រសួងអប់រំ រៀបចំវេទិកាផ្សព្វផ្សាយ ការបង្ការ ទប់ស្កាត់ហានិភ័យដោយការប្រើប្រាស់ និងចែកចាយបារីអេឡិចត្រូនិក
(ភ្នំពេញ)៖ រាជរដ្ឋាភិបាល បានសង្កេតឃើញមានការរីករាលដាលការនាំចូលលក់ចែកចាយ និងការប្រើប្រាស់ ឧបករណ៍ អេឡិចត្រូនិក និង សារធាតុគីមី សម្រាប់ជក់ និង ស៊ីស្សា ឬហៅកាត់ថាបារីអេឡិចត្រូនិក ក្នុងចំណោម កុមារ និងយុវជន ធ្វើឱ្យប៉ះពាល់ដល់សណ្តាប់ធ្នាប់ សង្គម និង សុខភាព សាធារណៈ ។
កាលពីថ្ងៃទី២១ ខែតុលា ឆ្នាំ២០២៥ រដ្ឋាភិបាលកម្ពុជាបាន ដាក់ចេញបទបញ្ជា ស្ដីពី ការដាក់ចេញវិធានការហាមឃាត់ការនាំចូល ការចែកចាយ ការលក់ ការផ្សព្វផ្សាយពាណិជ្ជកម្ម ការប្រើប្រាស់ ការកាន់កាប់ ការផលិត និងការស្តុកទុកឧបករណ៍អេឡិចត្រូនិកសម្រាប់ជក់ និងស៊ីស្សា ។
ជាមួយគ្នានេះដើម្បីបញ្ជ្រាបបន្ថែម ពីកផលប៉ះពាល់ការប្រើប្រាស់ផលិតផលទាំងនេះ ក្រសួងអធិការកិច្ច សហការជាមួយ ក្រសួងអបរំយុវជននិងកីឡា នាព្រឹកថ្ងៃទី១២ ខែវិច្ឆកា ឆ្នាំ២០២៥នេះ បានរៀបចំវេទិកាសុខភាពផ្សព្វផ្សាយ ទប់ស្កាត់ហានិភ័យ ការប្រើប្រាស់និងចែកចាយបារីអេឡិចត្រូនិចនិងសារធតុគីមីសម្រាប់ជក់ នៅទីស្តីការក្រសួងអធិការកិច្ច។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានធ្វើបទបង្ហាញ ពីផលប៉ះពាល់នៃបារីអេឡិចត្រូនិកលើសុខភាព និងបង្ហាញរូបរាងច្រើនបែបច្រើនទំហំ ជាទូទៅ ក្នុងបារីអេឡិចត្រូនិកមាន ថ្មអគ្គីសនី ប្រព័ន្ធកំដៅ និងកន្លែងផ្ទុក សូលុយស្យុង។ បារីអេឡិចត្រូនិកត្រូវបានគេ ហៅថា Vape ផងដែរ ដុតកំដៅសូលុយស្យុងបង្កើតជាចំហាយសម្រាប់អ្នកជក់ស្រូបចូលទៅក្នុងសួត។ មនុស្សនៅ ជុំវិញអ្នកជក់បារីអេឡិចត្រូនិក ក៏អាចស្រូបចំហាយដែលអ្នកជក់បញ្ចេញមកវិញដែរ។
លោកជំទាវ វង់ មយូរា មានប្រសាសន៍ថា ក្រសួងអធិការកិច្ច គឺជាក្រសួងដំបូងគេ ក្នុងចំណោមក្រសួង ស្ថាប័នរដ្ឋទាំងអស់ ដែលបានរៀបចំបើកវេទិកាសុខភាព ស្តីពីផ្សព្វផ្សាយ ការបង្ការ ទប់ស្កាត់ហានិភ័យ ការប្រើប្រាស់ ការចែកចាយបារីអេឡិចត្រូនិក និងសារធាតុគីមីសម្រាប់ជក់ និងស៊ីស្សា ដើម្បីដើម្បីបញ្ជ្រាបពីការប៉ះពាល់ការប្រើប្រាស់ផលិតផលទាំងនេះ ក្នុងចំណោមកុមារ និងយុវជន។
លោកជំទាវ ប្រធានគណ:កម្មាធិការសុខភាពសិក្សា និង ជាប្រធានក្រុមការងារបញ្ជ្រាបយេនឌ័រ នៃក្រសួងអធិការកិច្ច លើកឡើងថា ការកសាងមូលធនមនុស្ស គឺសំដៅទៅលើការពង្រឹងសុខភាព និងចំណេះដឹង ដោយឡែកវេទិកាសុខភាពនាពេលនេះពិតជាមានសារៈសំខាន់ណាស់ ក្នុងការចូលរួមចំណែកអនុវត្តគោលនយោបាយជាតិស្តីពី សុខភាពសិក្សា សំដៅលើកកម្ពស់គុណភាពអប់រំ តាមរយៈការផ្តល់នូវចំណេះដឹងពីសុខភាព ស្របតាមការលូតលាស់រាងកាយ និងស្មារតីប្រកបដោយលក្ខណៈវិទ្យាសាស្ត្រ បង្ការជម្ងឺឆ្លង ជម្ងឺមិនឆ្លង និងគ្រោះថ្នាក់ផ្សេងៗ ៕
ដោយ ៖ ហេង សម្បត្តិ+ថេត វិចិត្រ
